Саха норуотун национальнай идеята
Билиҥҥи туругунан, Саха сирин өрүстэрэ хас биирдии киһи куттаммакка ылан иһэригэр сөптөөх ыраастар. Оттон кыраанынан кэлэр “кирдээх уу” кыһалҕата олох атын суолталаах, иһэ истээх. Онно “кир” – өрүс ыраас уутун биологията, турба сөҥүүтэ буолар. Хата, дьолго, саха дьоно дьэ дьиҥнээх сүһүрбүт, кирдээх уу кыһалҕатын билэ иликпит – аан дойдуга, биһиги дойдубутугар сытыытык турар, бырамыысыланнаска химия булкастаах сүһүрбүт уу биһиэхэ суох.
Ил Түмэн дьокутаата Виктор Федоров Саха сирин күөллэригэр уонна өрүстэригэр уу хаачыстыбатын харыстыырга сыһыаннаах видеороликтары устубут. Онно кини: “Саха сирин национальнай киэн туттуута көмүс да, алмаас да, ньиэп дуу, гаас дуу буолбатах. Биһиги өрөспүүбүлүкэбит саамай сүрүн баайа – экологическай ыраас уу. Ол ууну хайдахтаах да харчыга атыыласпаккын. Инньэ гынан, ити сүдү баайбытын харыстыырга бары кыаҕы, күүһү ууруохтаахпыт. Биһиги күөллэрбит, өрүстэрбит национальнай идея буолуохтаахтар”, - диир.
Саха сирин хостонор баайа бырамыысыланнай сайдыытын түстүүр. Ол сайдыыттан биһиги бүддьүөппүтүгэр дохуот киирэр. Маныаха оҥорон таһаарыыны олохтуурга Хоту сир уйан экологиятын энчирэтиэ суохтаах.
Дьокутаат санаатын ыччат уонна блогердар толору өйүүллэрин биллэрбиттэр.
Бүгүн, муус устар 10 күнүгэр Виктор Федоров баҕалаахтары “Саха сиригэр экология уонна бырамыысыланнаһы баһылааһын” диэн киэҥ кэпсэтиигэ ыҥырар. Кэпсэтии киэһэ 18 ч. “Полярная звезда” көстүүнэй конференц-саалатыгар буолар. Мунньахха бырабыыталыстыба бэрэстэбиитэллэрэ, норуот дьокутааттара, уопсастыбанньыктар, баһылыктар кыттыыны ылыахтара.
