Өлүөнэ өрүскэ муус хаһааҥҥытааҕар да эрдэлээн, 3-5 күн иннинэ устуоҕа. Бу туһунан Гидрометеорология уонна тулалыыр эйгэни кэтээн көрөр управление иһитиннэрэр.
Өлүөнэҕэ муус Иркутскай уобаласка 2-4 күн эрдэлээн устуоҕа. Ленскэй, Өлүөхүмэ улуустарыгар муус ыам ыйын 4-12 күннэригэр устуоҕа. Ити хас да сыллааҕы кэтээн көрүүттэн 4-5 күн эрдэ. Өлүөхүмэ аннынан 3-4 күн эрдэлиэҕэ, Дьокуускай эргин муус ыам ыйын 14-16 күннэригэр, Сангаарга – ыам ыйын 19-21 күннэригэр, Күһүүргэ ыам ыйын бүтүүтэ муус устара сылыктанар.
Хотугу өрүстэр, итиэннэ Алдан, Амма, Бүлүү нуорматтан 2-4 күн эрдэлээн усталлара сылыктанар.
Ленскэй улууһугар уу таһыма урукку сыллардааҕар ортотунан 2 миэтирэҕэ тиийэ үрдүүрэ күүтүллэр.
Сааскы халаан Өлүөнэ бассейныгар муус харыытыттан тахсыан сөп. Муус харыыта Өлүөхүмэ, Хаҥалас, Нам улуустарыгар уонна куорат кытыытынааҕы нэһилиэнньэлээх пууннарга, итиэннэ Амма орто сүнньүгэр уонна Халыма өрүс сүүрүгүн хотугулуу аллара туруон син. Онтон сылтаан уу таһыма 1,5-2 м үрдүөн сөп. Оччоҕо хаһаайыстыбалаах эбийиэктэр, массыына суоллара ууга барар кутталлаахтар.
Маны таһынан, күһүн олус элбэх сөҥүү түһэн, хаар халыҥ буолан Орто Халыма улууһугар Сыбаатай, Арҕахтаах, Березовка нэһилиэктэрэ, Аллараа Халымаҕа Андрюшкино уонна Абыйга Индигиир өрүс үрдүгэр турар нэһилиэктэр ууга барар кутталлаахтар. Онно уу таһыма сайыннары-күһүннэри түһэн биэрбэккэ, ааспыт сыллааҕы хартыына хатыланыан сөп.
