Войти

Войти

Биһиэхэ, Булуҥ Бороҕонугар, бөрө мэнээктээтэ. Биһиги хаһаайыстыбабыт дьиэ табатын иитиинэн дьарыктанар. Сирбит-уоппут тыа быыстаах туундара буолан, булт да, балык да суох, бултаммат. Онон дьиэ табатын үчүгэйдик ииттэхпитинэ эрэ туруктаах олохтонор дьоммут.

Кэнники сылларга табабыт ахсаана 8 тыһыынчаттан 3,5 тыһыынчаҕа диэри түстэ. Ол биир сүрүн төрүөтэ – бөрө.

Биһиги бөрөнү кытта охсуспат буолбатахпыт. Мин хаһаайыстыба салайааччытынан 30-ча сыл үлэлээбитим тухары 300-чэҕэ тиийэр ардай аһыылаҕы бултаатыбыт. Ол да үрдүнэн сыл аайы 10-чалыы бөрө кэлэн, син биир эрэйдиир үгэстээх.

Бу кыһын 3 эрэ бөрөнү ыллыбыт. Тоҕо диэтэххэ, биһиэхэ хапхаан да, туһах да барсыбат. Тыаллаах буолан сотору-сотору тибэн кэбиһэр, хомурахтыыр. Онон омук “бурааннарынан” бултуурга күһэллэбит. Онтубут олус ороскуоттаах – сапчааһа, уматыга, о.д.а. Онон мин өрөспүүбүлүкэ салалтатыттан, Ил Дархан Айсен Сергеевич Николаевтан бөрөнү бултуурга эбии көмө эрэйэбин.

10 сыллааҕыта Е.А. Борисов тохсунньу бырааһынньыктарын саҕана бөрө элбээбитинэн ыксаллаах быһыыны-майгыны биллэрэн, элбэх кыыл уодьуганнаммыта. “Быйыл даҕаны инньэ гыныах” диэн этиилээхпин.

Кэлин илин эҥээргэ, Бүлүү сүнньүгэр уонна соҕуруу бөрө мэнээктээбитэ иһиллэр. Дьиҥэр, манна бөрө ахсаана өссө элбэх. Аҥаардас 2020 с. биһиги хаһаайыстыбабыт 327 табатын сиэтэ. Ону харчытыгар таһаардахха, 6 мөл. тахса солкуобай буолар. Бу – улахан ороскуот.

Өскөтүн өрөспүүбүлүкэ салалтата суһал миэрэни ылбатаҕына, аҕыйах сылынан дьиэ табата эстэр кутталланна.

Петр Николаевич Бурцев,

“Бороҕон” МУП дириэктэрэ, Булуҥ улууһа.

Тарҕат:

Добавить комментарий