Хаар Эбэ мэкчиргэ - сэдэх көтөр. Киин Саха сиригэр көтөн киирэрэ да ахсааннаах. Улахан кыһалҕаттан эрэ сылдьар, төрүүр-ууһуур ыырыгар булда-алда баранан, сир уларытан ыраах тэлэһийэ көтүөн сөп.
Быйыл, тымныы тыйыс кыһын ааһан элбэх хамсыыр-харамай кыһыны уустуктук туораата. Ол туһуттан туртастар, бэл саһыллар дьон олорор сиригэр чугаһаан кэбиһиилээх отторго, бөх быраҕар помуойкаларга аска наадыйан киирэтэлиир түгэннэрэ элбээтэ. Атын кыра чыычаахтар, бочугурастар тыаҕа тоҥон өлүтэлээбит түбэлтэлэрэ да дьону соһутта, дьиксиннэрдэ.
Син ол курдук эмиэ, баҕар тымныы кыһынтан кыһарыйтарда буолуо, туох баар тыынар-тыыннаах ньимийэ саһан, аһыыр-бултанар кыаҕа суоҕуттан, сахаҕа былыр-былыргыттан ытыктанар ытык көтөр Хаар Эбэ барахсан быйыл Туймаада хочотугар, Дьоллоох Дьокуускай килбэйэр киинигэр кыстыы кэлбитин үгүс куорат олохтоохторо кэрэхсии, биһирии, кэрэхсии көрбүттэрэ буолуо.
Ону баара хайа эрэ хара санаалаах урдуустар, ис кыймалара батарбакка, тугунан эрэ ытан эчэтэн ытык көтөрү суорума суоллуу сыспыттарын үтүө санаалаах куорат олохтоохторо буланнар, Щорс күөлүн таһыгар баар ветеринарнай килииникэҕэ аҕаллылар.
Твиттер социальнай ситим туһанааччыта (@lerajeya), Интернет эйгэтигэр бу туһунан суһал иһитиннэрии таһаарбытын, дьон-сэргэ иилэ хабан ылан көтөрү сэймэктээбит хара санаалаахтары кытаанахтык сэмэлээтилэр. «Хаар Эбэ ветеринарнай чинчийии түмүгүнэн билигин улаханнык мэйиитин доргуппут уонна кынатын тоһуппут” – диэн суруллар иһитиннэриигэ.
Хойутуу соҕус бу социальнай ситим туһанааччыта эбэн суруйбут: “Көтөр кынаттарын эппэрээссийэлээн , икки өртүттэн синньигэс тимирдэринэн туттардыбыт, хомойуох иһин быстыбыт кынатын иҥиирдэрэ чөлүгэр түспэт гына сэймэктэммиттэр. Көтөр билигин стационарга олорор, хараҕа уокка көрөр буолла, арыый да бэттэх кэллэ», - диэн бэлиэтээбит кини.
Эмсэҕэлээбит көтөр хос устун бэйэтэ хаамар буолла, ол эрээри киһи көмөтө суох бэйэтэ аһыыр кыаҕа суох. Маннык үлүгэр кыыллыы кэбилээһин кэнниттэн, уруккутун курдук сүдү көтөр аны төрөөбүт айылҕатыгар олорор кыаҕа суох. Эмтэнии кэнниттэн Хаар Эбэни куоракка баар биир чааһынай зоопаркаҕа биэрэр санаалаахтар.
Сахаҕа – тыҥырахтаах көтөрү атаҕастааһын – улахан аньыы. Ону билэ-билэ аанньа ахтыбакка ытык, сүдү көтөрү эчэтии, кэбилээһин – сааттаах, киһи өйүгэр баппат быһыы.
