Войти

Войти

94 саастаах ытык кырдьаҕас Михаил Сергеев номнуо 60 сыл кыһыҥҥы, муус аннынан күөгүлээһининэн үлүһүйэр. Кини этэринэн, чуолаан бу дьарык, куруук сибиэһэй салгыҥҥа, айылҕаҕа сылдьара кини үйэтин уһатар.

«Михаил Семенович туох да омуна суох 60 сыл тухары кыһыҥҥы, муус аннынан күөгүлээһини сөбүлээн, дьоҥҥо-сэргэҕэ көҕүлээн, үөрэтэн-такайан күн бүгүнүгэр диэри олох үөһүгэр сылдьар. Биир «ыарыынан ыалдьар» доҕотторун ортолоругар кини саамай аҕам саастаахтара, ытык кырдьаҕастара. Биир санаалаах, үлүһүйүүлээх балыксыт доҕотторо өрөспүүбүлүкэ бары муннуктарыгар бааллар. Муус аннынан балыктааһын бэйэтэ туһунан ускуустуба, араас ымпыга-чымпыга элбэх, ылбычча киһи сатаабат. Ол кистэлэҥнэрин, албастарын кини үөрэ-көтө сиэдэрэйдик эдэр доҕотторугар үллэстэр. Хайдах быһыылаах-таһаалаах күөгүнү талары, кивок, мормышка хайдаҕын таллахха балык ордук хабымтыа буоларын, хайдах сөпкө уу дириҥин, түгэҕин быһаарары. Билигин кини сааһа ыраатан сатыы кыайан сылдьыбат, доҕотторо массыынанан тиэйэн аҕалан биэрэллэр. Ол эрээри ойбонун оҕонньор буурунан бэйэтэ тэһэр. «Урут Өлүөнэ Эбэ балыга билиҥҥигэ холоотоххо үс төгүл өлгөм этэ”! – диэн ахтар үлэ тыыл бэтэрээнэ, Социалистическай Үлэ Дьоруойа, Дьокуускай куорат бочуоттаах олохтооҕо. Кини билигин да тэтиэнэх, кэлэр-барар, онно барытыгар Ийэ Айылҕа күүс-сэнии биэрэр», - диэн кэпсииллэр Дьокуускайдааҕы Социальнай Көмүскэл салалтатыгар.

Михаил Сергеевич олох эдэр эрдэҕиттэн үлэтин килбиэннээх аартыга арыллыбыта. Оскуоланы бүтэрээт, Өлүөхүмэ оройуонугар, Муҥку сопхуоһугар үлэлии киирбитэ. 1944 сыл, бэс ыйыттан «Якутстрой» тэрилтэ иһинэн бары араас үлэҕэ барытыгар үлэлээбитэ: столярынан, паркетчигынан, мас дьиэлэр витринщигынан, ыччат комсомуол этэрээтин биригэдьииринэн. Улахан сүдү бырайыакка - Дьокуускай аэропордун тутууга кыттыбыта, куорат бастакы - 9 уонна 12 нүөмэрдэрдээх таас оскуолаларын дьэндэтиигэ, 14 нүөмэрдээх тэрилтэ тутуутугар, итиэннэ Ленин быраспыага уулуссаҕа, Нуучча тыйаатырын таһынан, 202 микрорайоҥҥа элбэх киһи олорор саҥа таас дьиэлэри тутууга актыыбыннай кыттыыны ылбыта.

Пятилетка былаанынан - үгүс оҥорон таһаарар кыахтаах тэрилтэлэри, олорор дьиэлэри, култуурнай суолталаах эбикиэктэри олоххо киллэрсибит үтүө, көхтөөх кылаатын иһин Михаил Сергеев 1971 сыллаахха, Социалистическай Үлэ Дьоруойун үрдүк аатын сүкпүтэ, Ленин уордьанын уонна «Серп и Молот» кыһыл көмүс мэтээлинэн наҕараадаламмыта.

Тарҕат:

Добавить комментарий