Куйаас халлаан, нуорматтан тахса итии буолара күүтүллэр бэс ыйыгар Саха сиригэр, оттон атырдьах ыйа кураан буолуо, диэн иһитиннэрэр Гидрометцентр салайааччыта Роман Вильфанд.
«Муус устартан балаҕан ыйыгар диэри, күн-дьыл туруга бүтүн дойду үрдүнэн нуорма чугаһыгар уонна үрдүнэн куоһарара күүтүллэр. Тымныы саас, күһүн буолаллара күүтүллүбэт. Бэс ыйыгар нуорматтан арыый үөһээ күн-дьыл Красноярскай кыраайга итиэннэ Саха сиригэр сабаҕаланар», - диэн ТАСС Вильфанд этиитин бигэргэтэр.
Гидрометцентр салайааччыта бэлиэтииринэн, от ыйыгар куйаас күн-дьыл буолара Арассыыйа европейскай чааһыгар, Ураалга уонна Арҕаа Сибииргэ күүтүллэр. Атырдьах ыйыгар сылаас салгын долгуна Таймыырга, Ямалга уонна Байкаал эҥээр олохсуйуоҕа.
Ону таһынан, Роман Вильфанд бэлиэтииринэн, Арассыыйа европейскай, соҕуруу өртүн олохтоохторугар сөҥүү кырыымчык буолара сабаҕаланар. Бэс ыйа Красноярскай кыраайга кураан буолара сабаҕаланар. Маны таһынан, от ыйыгар нуорматтан быдан аҕыйах сөҥүү Иркутскай уобаласка уонна Сибиир соҕуруулуу-арҕаа өртүгэр түһэрэ күүтүллэр. Оттон атырдьах ыйа Саха сиригэр кураанынан бэлиэтэниэҕэ.
Эрдэтинэ, бу күннэргэ Вильфанд, Сибииргэ уонна Уһук Илиҥҥэ нэдиэлэ устата, Арассыыйа эрэгийэннэрин ортотугар саамай сылаас халлаан туруо диэн бэлиэтээбитэ. Манна күн-дьыл туруга нуорматтан 8-10 кыраадыс сылаас буолуоҕа.
