Киин Саха сиригэр, Охуоскай муора диэкиттэн кэлбит циклон хойуу хаары аҕалла.
Муус устар 10 күнүгэр 6,4 мм сөҥүү түспүт буолааҕына, ол түүнүгэр өссө эбии 6 мм хаар түстэ.
Кэнники сыллар кэтээн көрүүлэринэн, сөҥүү таһыма муус устар ый саҥатыгар 2 мм кэриҥэ буолар эбит. Хаар таһыма нуорманы хас да төгүл куоһаран, сорох сирдэргэ киһини тобугунан буолбут.
Дьокуускай куорат Аҕа баһылыга Евгений Григорьев муус устар 11 күнүгэр суһал быһыыны-майгыны туоратар хамыыһыйа мунньаҕын ыытта.
«Куораттааҕы суол сулууспаларыгар, уопсастыбыннай тырааныспар сырыытыгар бу – кытаанах тургутуу. Суол үлэһиттэрэ үс симиэнэнэн тохтоло суох үлэлииллэр, хаар ыраастыыллар. Кылгас тохтобуллар тиэхиникэни сапыраапкалыырга уонна симиэнэ эрэ уларыйар кэмигэр буолуталыыллар. Инники күөҥҥэ сылдьар үлэһиттэрбитигэр бүгүн итии аһылыгынаан хааччыллыы тэриллиэҕэ», - диэн бэлиэтээтэ Евгений Григорьев.
Уустук күчүмэҕэйдэри хаар Табаҕа, Хатас, Марха, Маҕан, Тулагы-Киллэм бөһүөлэктэригэр үөскэттэ. Куоракка муҥутуур бэлэмнэнии эрэсиимэ киллэрилиннэ.
Куорат баһылыга ордук күүстээх болҕомто уопсастыбыннай тырааныспар сылдьар суолугар-ииһигэр, социальнай инфрастурктура эбийиэктэрин суолларыгар, куорат тас өртүгэр баар бөһүөлэктэргэ ууруллуо диэн чорботон бэлиэтээтэ. Итиэннэ, маны таһынан хаар ыраастыыр үлэлэргэ тас бэдэрээтчиктэргэ баар ханнык баҕар тиэхиникэни тардыахтара.
Күнү-дьылы билгэлээн көрөөччүлэр сабаҕалааһыннарынан хаар түһэрэ, бэнидидиэнньиккэ кытары салҕаныан сөп.
