Икки тыһы бизон биирдии ньирэйи төрөппүттэр, тыһы уонна атыыр тамыйахтары.
Муус устар 19 күнүгэр «Уус-Буотама» бизоннар питомниктарыгар быйылгы бастакы ньирэйдэр төрөөтүлэр, диэн иһитиннэрэр өрөспүүбүлүкэтээҕи айылҕа баайын дириэкксийэтин пресс-сулууспата, учаастак салайааччытыгар Семен Егоровка сигэнэн.
Икки тыһы бизон Марта уонна Агнесса, биирдии ньирэйи төрөттүлэр, атыыр уонна тыһы ньирэйдэри. Билигин питомникка 38 бизон мэччийэр, онтон 14 сиппит-хоппут төрүүр кыахтаах тыһы кыыл.
«Исписэлиистэр салгыы ньирэй төрөөһүнүн күүтэллэр, бүгүҥҥү күн туругунан, бу быйыл төрөөбүт ньирэйдэри ааҕан туран Саха сиригэр бизон ахсаана 252 кыыл буолар, бу ахсаантан 80 бизон Горнай улууһугар “Сиинэ” айылҕа пааркатыгар көҥүл сылдьар үөр», - диэн этиллэр иһитиннэриигэ.
Тыа бизонун Саха сирин Киин улуустарыгар олохсутар бырайыак 2006 сылтан саҕалаан ситиһиилээхтик үлэлиир. Бүгүҥҥү күн туругунан Саха сиригэр бу тосхол үүнэрин-сайдарын туһугар үс питомник тэрилиннэ: Хаҥалас улууһугар “Уус-Буотама”, Горнай улууһугар «Тыымпынай» уонна Сунтаар улууһугар «Тумара».
Ону таһынан бизоннар Мииринэй улууһугар «Айылҕа тыыннаах алмаастара» диэн ааттаах айылҕа пааркатыгар итиэннэ Хаҥалас улууһугар баар өрөспүүбүлүкэтээҕи «Орто Дойду» зоопаркаҕа бааллар.
