Гидрометцентр үлэһиттэрэ эппиттэринэн, билигин Арассыыйа арҕааҥҥы уобаластарыгар уонна Уһук Илин федеральнай уокуругар, икки олус күүстээх антициклон кэлбитин түмүгэр, олоҕурбут нуорманы 10 кыраадыһынан куоһарар уот куйаас түһэн турар. Бу куйаас нэдиэлэ курдук туруо үһү.
Онон РФ сүрүн бырааһа Геннадий Онищенко “күҥҥэ аҕыйахтык сылдьыҥ, бэргэһэни кэтэргитин умнумаҥ, элбэх ууну иһиҥ. Куйааска киһи элбэхтик тиритэр буолан, хаана хойдор. Ол түмүгэр, киһи этигэр-хааныгар кислород тиийбэтиттэн, инсульт-инфаркт куттала улаатар” диир.
Оттон Саха сирин баһыйар өттүгэр өҥүрүк куйаас бу ый бүтүөр дылы сатыылыаҕа. Онтон сылтаан баһаар тахсар куттала ордук 4 улууска суоһуур: Мииринэй, Сунтаар, Хаҥалас уонна Томпо улууһун соҕуруу өттүгэр.
Сарсын, бэс ыйын 24 күнүгэр, Дьокуускайга куйаас арыый намырыа дииллэр. Сарсыарда уонна күнүскү өттүгэр кыратык этиҥнээх ардах түһэрэ күүтүллэр. Салгын температурата күнүскү өттүгэр +27+29 буолуо диэн күнү-дьылы кэтээн көрөөччүлэр сылыктыыллар.
