Бүгүн Хаҥалас улууһугар халаанынан сибээстээн ыксаллаах быһыы-майгы балаһыанньата биллэрилиннэ.
“Хаҥалас улууһугар ыам ыйын 15 күнүгэр Өлүөнэ өрүскэ уу таһыма эмискэ үрдээн, олорор дьиэлэри, уһаайбалары уу ылбытынан сибээстээн, баһылык уурааҕынан ыксаллаах быһыы-майгы балаһыанньата биллэрилиннэ”, - диэн улуус дьаһалтата иһитиннэрэр.
Өктөмҥө 214 дьиэ баар уһаайбатыттан дьону көһөрөллөр. Бүгүн 12 ч. туругунан онно уу таһыма 479 см тэҥ этэ, биир чаас иһигэр уу 15 см үрдээбит (кутталлаах таһыма 480 см). Билигин миэстэтигэр быһыты кытаатыннарар үлэни ыыталлар. Быстах кэмнээх олорор пууҥҥа 38 киһи киирбит, ол иһигэр 12 оҕо. Хотуччугу олохтоохторун үрдүк сиргэ көһөрбүттэр. 11 оҕо уонна 3 дьахтар оскуолаҕа олохтоммуттар.
