Амма эбэбит барахсан быйыл бэйэтин хаатыттан улаханнык тахсан улуус дьонун эрэ буолбакка, өрөспүүбүлүкэ дьонун-сэргэтин барытын аймаата. Буолар буоллаҕа. Урукку сылларга аммалар улахан халаан уутугар ыллара илик этибит. Онон дьон-сэргэ айманара сиэрдээх. Ол эрээри биһиги бу ыарахан кэммитигэр соҕотох буолбатахпытын биллибит. Саха сирин бары муннуктарыттан дьон биһигини кытта бииргэ буолалларын биллэрбиттэрэ барыбытын долгутта.
Амма урбаанньыттара бэйэлэрин көмөлөрүн тута оҥорон барбыттара. Ол курдук ким бородууктанан, ким таҥаһынан-сабынан хайа кыалларынан көмө оҥордулар. Амма улууһугар урбаанньыттары өйүүр киин салайааччыта Дьулустан Юшков этэринэн, улууска баар бородуукта маҕаһыыннаах урбаанньыттар ууттан эмсэҕэлээбит дьону наадалаах аһынан-үөлүнэн хааччыйдылар. Онтон "Утум", "Урсун", "Дом торговли" маҕаһыыннар салайааччылара Людмила Куприянова үтүө санаа акциятын оҥорон, күннээҕи олоххо наадалаах табаарынан хааччыйа олорор. Онтон хас да маҕаһыын ситимин директора Руслан Федотов эмиэ табаарынан уонна аһылыгынан көмөлөһөр. Көмөлөһөөччүтэ Николай Алексеев эппитинэн, нэһилиэктэр дьаһалталара биэрбит испииһэктэринэн хас биирдии эмсэҕэлээбит дьоҥҥо, 2000-3000 солк. суумалаах көмө оҥоһуллунна.
Күн бүгүҥҥү туругунан, улуус дьаһалтатын нөҥүө Аммаҕа, Чапчылҕаҥҥа, Абаҕаҕа, Мээндигигэ, Амма-Наахараҕа ууттан эмсэҕэлээбит дьон бары бородуукта нобуорун ыллылар. Бу үлэ өссө да салҕанан бара турар.
Дьокуускайга олорор биир дойдулаахтарбыт биир санааҕа түмүллэн, халаан уутун туоратыыга штаб тэриннилэр. Ол курдук таҥас-сап, бородуукта, харчынан хомуллан, Аммаҕа ыытылынна. Манна "Ирбис" судноларын салайааччыта Борис Строев Аммаҕа ыытыллар таһаҕаһы босхо таһаарар.
Бу курдук хас биирдии улуус олохтооҕо, республикабыт дьоно-сэргэтэ улахан халаан уутугар күүс-көмө, өйөбүл буола тураллара чахчы да саха дьоно маннык ыарахан күннэргэ биир сомоҕо, биир сутурук буоларын көрдөрөр.
Наталья Бубякина
