Киирии

Киирии

Бу тухары Дьөгүөр таксига үлэлээн күттүөннээҕи сыҕарыйбыта биллибэт. Наар “хамсыы” сылдьар курдук да, олоҕор уларыйыы суох. Бу тухары дьоҥҥо хамначчыттаан кэллэ. Дьоҥҥо үчүгэй буоллун диэн буолбакка, хайдах эмэ гынан харчыласпыт эрэ киһи диэн санаалаах сырытта. Тугу өлөрбүтүн айаҕар уонна куортамыгар төлүүрэ.

Хата, куортамын дьоно кинини хаһан да ыган төлөппөт буолан абырана сылдьыбыта. Сыл баһыгар-атаҕар кэлэн, кыра хос дуомугар олорор куортамнарын харчытын элбэппэккэ абыраатылар. Сыллааҕы куортамын харчытын таксист киһи Дьокуускайга биирдэ баран кэллэ да, холкутук таһаарар кыахтаах. Ол да буоллар куортам харчытын олох кыһаллыбат буолан, най баран хаалаахтаата. Кэлин өссө киитэрэйдээн, кыра-кыралаан ый быһаҕаһын аахпакка аахсар буолан, кини курдук киитэрэй киһи суоҕун курдук санана сырытта. Ол эрээри бу дойдуга туох барыта үчүгэй үчүгэйинэн, куһаҕан куһаҕанынан ытыйан тахсар идэлээх. Бу мин тылым буолбатах – олох сокуона...

Дьөгүөр дьону албыннаатаҕын аайы олоҕун отуора букатын хамсаан эрэр. Түүн баттатан уһуктара элбээтэ. Наар куһаҕаны санаабыт дьоно түүлүгэр кииртэлиир буоллулар. Күн-түүн аайы ол дьоно мөҕөллөрө хойдон иһэр.

Бу курдук олорон эрэ атын куоракка «суһал көмө суоппарын үлэтэ таҕыста» диэни истээт, күрээн, сыл аҥаардааҕы куортам харчытын биэрбэккэ баран хаалла. Ону кытта этэ-сиинэ аһыллан, мөлтөөбүт киһиэхэ алдьархай аана бэйэтэ арылынна, улаханнык күүттэрбэтэ. Таксилаатах буолан, Ньурба диэки сылдьан, Дьөһөгөй оҕотун түҥнэри көтөн кэбистэ! Сылгы барахсан өлөөрү мөхсө сытан Дьөгүөрү көрбүтэ, билигин да санаатыттан тахсыбат. Хата, ол оннугар эбиитин күн аайы түүлүгэр киирэн, кистээн дьырылатан барар, өрүү санатан ааһар буолла!

Айаннаан иһэн сылгыны көрдө да, дьик гынан ыларын бэйэтэ да билбэт буолан хаалла. Саха киһитэ маанылаах миинэр миҥэтин, Дөһөгөй оҕотун кылгас тыыннаабыта ханан эрэ киириэхтээҕин өтө көрө-билэ сылдьар. Үтүө үтүөнэн, мөкү мөкүнэн!

Дьөгүөр санаатын уоскутаары, аһыы утах диэки хайыһан эрэр. Төһө да суһал көмөҕө үлэлээтэр, санаата барыта урукку алҕастарын хайдах эмэ гынан көннөрбүт киһи диэн. “Мөлтөх Дьөгүөр, Кыаммат Дьөгүөр” билигин санаа баттыгаһын уйбакка токуччу түһэн эрэр.

Куортамнаан олорбут дьоно харчыга төһө да ыктарбыттарын иһин, Дьөгүөр кэлэн төлүө диэн сэмээр кэтэһэллэр эрэ. Бастаан утаа Дьөгүөр сүтэ-сүтэ күөрэйэр кэмигэр ити-бу төлүө диэн кэтэһээхтээбиттэрэ. Бүтэһиккэ “бэнидиэнньиккэ суһал көмөҕө үлэлээбит хамнаһым кэлэр, онно төлөһүөм...” диэн баран, сарсыныгар төлөпүөнэ олох да арахсан хаалла... Ол аньыытынан. Дьөгүөр – суобаскар!!! Бэйэҕиттэн буолбатаҕына, бэдэргиттэн! Өйдөн!

Буркун.

Тарҕат:

Комментарии

Защитный код Обновить