Москуба куорат Симоновскай суута "Восточнай" космодром тутуутуттан үлүгэрдээх үбү айбардаабыт түөкүттэри 4,5 сылтан 8 сылга диэри күлүүс хаайыытыгар уураахтаата.
Түөкүттэртэн сылтаан бүддьүөккэ 1,3 млрд солк. хоромньу оҥоһуллубут.
Сергей Дегтяреву 8 сылга хаайдылар уонна 1,5 мөл. ыстараабы төлүүргэ уураахтаатылар. Кини кыыһа Евгения 4,5 сылга барда уонна 1 мөл. солк. ыстараабы төлүөхтээх (кини Волго-Вятскайдааҕы тутуу хампаанньатын урукку генеральнай дириэктэрэ). Хампаанньа урукку менеджерэ Александр Базанков 6 сылга барда уонна 1 мөл. солк. ыстараабы төлүөҕэ. Оттон Марат Матуев 5,5 сылга барда уонна 1 мөл. солк. ыстараабы толуйуоҕа.
Суут борокуратуура туруорсубут бириигэбэриттэн арыый сымнаҕас болдьоҕу биэрдэ. Борокуратуура Дегтяреву – 10, кини кыыһын – 8, Базанкову уонна Матуевы 7-лии сылга ыытарга туруорсубута. Суут бириигэбэри биэс күнү быһа аахта. Бириигэбэр сокуоннай күүһүгэр киирэ илик, көмүскэһээччи өрүт салгыы ааһынар санаалаах.
Уопсайынан, "Восточнай" космодром тутуутугар көрүллүбүт харчыны элбэх киһи былдьаһа-тарыһа уорда. Өссө холуобунай дьыала бөҕө силиэстийэлэҕэ сылдьар.
