Киирии

Киирии

Бэҕэһээҥҥиттэн, муус устар 11 күнүттэн, Дьокуускай куораттааҕы суукка урукку куорат аэропордун генеральнай дириэктэригэр Николай Местниковка тэриллибит холуобунай дьыаланы көрүү салгыы саҕаланна. Судьуйа Анна Маркова.

 

Тырааныспар борокуратууратын бэрэстэбиитэлэ  икки чаас устата аэропорт урукку генеральнай дириэктэрин туохха буруйдуулларын иһитиннэрбитэ.  Буруйдуур өрүт этэринэн, Николай Местников 2014-2018 сылларга уопсайа 27 мөл. солк. суумалаах таһаҕаһы суулуур өҥөнү оҥорор урбаанньыттартан бэрик ылбыт.  Суут бастакы мунньаҕа кулун тутар 12 күнүгэр буолбут. Онно Местников оһуобай бэрээдэктээх сууттан аккаастаммыт. Маннык бэрээдэктээх суут уорбаланааччы буруйун барытын билинэр эрэ буоллаҕына ананар уонна суут хаамыыта судургу, элбэх туоһуну эҥин истэ барбакка ыытыллар. Маны таһынан, буруйданар киһи көмүскэнэр кыаҕа көтүрүллэр, уураах таҕыстаҕына хайдах да салгыы суут үөһэ инстанциятыгар ааһынара кыаллыбат.

Местников “оһуобай бэрээдэктээх суукка сөбүлэһэбин” диэн өссө Иркутскайдааҕы СИЗОҕа хаалла сытан илии баттаабыт эбит. Санатар буолаха, былырыын от ыйын 6 күнүгэр тырааныспар полициятын үлэһиттэрэ Местниковы тутаат даҕаны Иркутскайга илдьэ барбыттара. Ити кэмҥэ Николай Местников быыбарга турунан үлэ бөҕө ыыта сылдьар этэ. Местниковы атын эрэгийиэҥҥэ хомбуойдаан илдьэн хаайбыттара элбэх толкуйдары үөскэппитэ. Сокуон быһыытынан, буруй тахсыбыт да буоллаҕына, ханна оҥоһуллубут сиригэр силиэстийэлэниэхтээх уонна экэнэмиичэскэй буруйга уорбаланар дьон атын силиэстийэлэнээччилэри кытары бииргэ хааллыа суохтаахтар. Инньэ гынан, Николай Местников Иркутскай түрмэтигэр сытан “оһуобай бэрээдэккэ” сөбүлэспитин сэрэйэн эрэ көрүөххэ сөп.

Дьыала тэриллээтин кытары , билэр дьон “соруйан оҥоһуу, тырааныспар ситимин өттөйөн былдьааһын” диэн ааттаабыттара. Местников салайарын саҕана, киин куорат аэропуордугар улахан суумалаах уларыта тутуу үлэлэрэ саҕаламмыттара. Көтөр аал балаһалара уларыйдаҕына, Дьокуускай аэропуордугар араас уйуктаах сөмөлүөт барыта түһэр кыахтаныахтаах. Билиҥҥитэ 2022 сылга диэри үлэ торумнанан барыахтаах. Мантан да сиэттэрэн сабаҕалаатахха, киин куораппыт аэропорда улахан харчы эргийэр сиригэр кубулуйуохтаах. Оттон ханна харчы хамсыыр да, кирдээх үлэ сыстара мэлдьэх буолбатах.

Билиҥҥитэ Местников дьиэ хаайыытыгар Дьокуускайга кэлэн олорор. Бу иннинэ балыыһаҕа эҥин эмтэнэн сыппыта. Буолумуна, баччалаах ыгыы-түүрүү кэмигэр киһи доруобуйата айгырыыра сонун буолбатах. Николай Местниковы аэропуорт терминалыгар чымадааннары, таһаҕаһы салапаанынан суулуур өҥөнү оҥорор урбаанньыттар тырааныспар борокуратууратыгар “бу киһи биһигиттэн бэрик ылар, төлөөбөт буоллаххытына пуортан таһааран кэбиһэбин диэн суоһурҕанар” диэн үҥсүбүттэрэ.

Бэҕэһээҥҥи суут истиитигэр Синявскай сүрүн туоһу быһыытынан доппуруостаммыта. Кини “Север сервис” ХЭУо, ИП Попова уонна ИП Чепина диэн атын киһиэхэ бэлиэтэммит тэрилтэлэрэ киниэхэ харчыны хаһыйан биэрэр, “подставной” тэрилтэ буолалларын албакаат ыйытыытыгар бигэргэттэ. Ол тэрилтэлэр биир да нолуогу төлөөбөтөхтөр эмиэ көстөн кэллэ. Бу Синявскайбыт ити тэрилтэлэр боппуруостарын быһаарар үлэлээх эбит.  Дэбиэриннэһэ кэлиҥҥи ыйынан, түҥ-таҥ оҥоһуллубута көстөн кэллэ.  Аны туран, гособвинитель ыҥырбыт туоһулара бары аймахтыы буолан тахсаллар эбит. Дьикти. Бүгүн сарсыарда Синявскай ойоҕо Нина Синявская суукка ыҥырыллыбыта. Ол гынан баран, кини албакаата суукка кыайан кэлбэккэ тохтоото. Нина Синявская “Север сервис” ХЭУо генеральнай дириэктэрэ, аэропуорт терминалыгар сууиканы суулуур өҥөнү оҥоруунан дьарыктаммыт. Кини кыыһа суукка эппитинэн, Нина Синявская урут кэрэ сэбэрэни оҥорор салон аһан үлэлэппит, онто кыайан табыллыбакка Синявскайдыын таһаҕаһы суулааһынан дьарыгырбыттар. Кинилэр кыыстарын аатыгар ИП А.Р. Попов диэни арыйбыттар. Бу ИП нөҥүө аэропуорка миэстэни түүлэспиттэр. Маннык ньыманнан Синявская аны бииргэ төрөөбүт балтын аатыгар ИП арыйан эмиэ түүлэһии дуогабарын оҥорсубут. Онон Синявская кыыһа да, балта да Местников диэн кимин, уопсайынан бу “тэрилтэлэрин” үлэтин-хамнаһын туһунан тугу да билбэттэрин эттилэр. Кинилэр Местниковка “бэриллибит бэрик” туһунан эмиэ тугу да билбэттэрин этэллэр.

Тарҕат:

Комментарии

Защитный код Обновить

Бүтэһик сонуннар