Киирии

Киирии

Дьокуускай куораттааҕы суукка “дьокутааттар” дьыалалара салҕанар. Бэҕэһээ Ил Түмэн урукку дьокутааттара Александр Уаров уонна Дмитрий Саввин Степан Охлопковтан “900 тыһ. солк. бэрик ылбыттарын” туһунан дьыаланы көрдүлэр, сүрүн туоһу Охлопков көрдөрүү биэрдэ. Бүгүн дьыала салгыы көрүллэр.

Бэҕэһээҥҥи истиигэ албакааттар Степан Охлопковтан Александр Уаровтан уонна Дмитрий Саввинтан аан бастаан хайдах бэриги ылбытын, хайдах көрдөөбүттэрин туһунан ыйыттылар. Санатар буоллахха, Охлопков дьокутааттары кытары тус-туһунан көрсүбүт, иккиэннэрин кытары хаһан даҕаны бииргэ бэрик туһунан көрсөн кэпсэппэтэхтэр.

“Миэхэ Алексндр Сергеевич “быраат, эн боппуруоскун быһаардыбыт. Харчы киирдэ да биллэрээр” диэбитэ. Кини киирбит харчыны кыра диэн мыыммыта, ороскуот олус элбэх, онон эбии харчы наада диэбитэ. Онон кыра-кыралаан киллэрэ турарбар эппитэ”, - диэн туоһу суукка кэпсээтэ. Охлопков этэринэн, ити кэпсэтиилэр 2012-2014 сс. Уаров кэбиниэтигэр буолуталаабыттар. Онно кини 50, 100 тыһ. солк. туһунан эппит. Оттон Саввиҥҥа сыһыаннаан ыйытыыга, Охлопков “Дмитрий Саввин “кыыһым кирэдьиит хабалатыгар ыктарда, онон отой харчы кыһалҕатыгар киирдибит” диэбитэ уонна харчы киллэрэн биэрэрбэр эппитэ. Ити кэпсэтии Саввин дьокутаат буолуоҕуттан биир ый ааспытын кэннэ кэбиниэтигэр буолбута”,-  диэн туоһу көрдөрүү биэрдэ.

Санатар буоллахха, Уаров уонна Саввин Ил Түмэн сис кэмитиэтин чилиэннэригэр “Сахаплемобъединение” тэрилтэни харчынан өйүүргэ ыххайбыттар. Онон тэрилтэни өйүүр туһунан быһарыныы 2014 сыллаахха ылылллыбыт уонна бүддьүөттэн сүөһүнү сиэмэлээһиҥҥэ 47 мөл. солк. көрүллүбүт. “Сахаплемобъеденениеҕа” биир мөл. солк. итэҕэс баарын бэрэбиэркэ быһаарбыта уонна салайааччыга холуобунай дьыаланы тэрийбитэ. Силиэстийэ икки сыл устата барбыта, ити кэмҥэ Охлопковы үлэтиттэн туораппыттара. Ол кэмҥэ Охлопков кэргэнэ ыарытыйбыта, уола быстахха былдьанан өлбүтэ. Степан Охлопков ити кэннэ барытын ыраас мууска ууран биэрэргэ быһаарыммытын эппитэ.

2014 сыл ахсынньы 31 күнүгэр Степан Охлопков биир ХЭУо кассатыттан 1 мөл. солк. устубут. Ону кини “тэрилтэҕэ хаһан баҕарар суһаллык харчы наада буолар. Холобур, ГСМ төлөһөргө. Ол иһин ити харчыны устубутум” диэн быһаарбыт. Ону таһынан, кини ити харчыттан дьокутааттары кытары “төлөһөрүгэр” эмиэ туһаммытын эппит. Кини ол күн 100 тыһ. солк. Дмитрий Саввиҥҥа, онтон тохсунньуга эмиэ 100 тыһ. солк. Александр Уаровка биэрбит. Охлопков ити харчынан дьокутааттар үтэһэлэрэ туолуо дии санаабыт да, анарааҥылара сөп буолбатахтар, эбии харчы көрдөөбүттэр.

“Кинилэр кыһалҕаҕа кыпчарыйтарбыттарын эппиттэрэ, кирэдьиит бөҕөҕө ыйаммыттарын, оҕолоругар көмөлөһүөхтээхтэрин эҥин туһунан эппиттэрэ уонна харчыны аҕаларбар кикпиттэрэ. Маны таһынан, кинилэр хас биирдии дьокутааты итэҕэтэр уонна сөбүлэҥнэрин ылар ыараханын эппиттэрэ”, - диир Охлопков. Маны таһынан, Степан Охлопков “мин ити утубут 1 мл. Солк. 200 тыһ. солк. кассаҕа төннөрөр былааннааҕым, ол эрээри дьокутааттар эбии көрдөөбүттэрин иһин тохтообутум”диэн быһаарда. Албакааттар “оччотугар тоҕо тута быраабы араҥаччылыыр уорганнарга үҥсүбэтэхиний?” диэн ыйыттылар.Онуоха “полицияҕа үҥсүбэтэҕим, тоҕо диэтэр кинилэр ити харрчыны син биир ылыахтаахтарын, ситиспитэрин эппиттэрэ. Итиэннэ сокуону оҥорооччулар бэйэлэрэ көрдүүр буоланнар улахаҥҥа уурбатаҕым”, - диир.

Онтон 2015 сыл олунньу, кулун тутар ыйдарга дьокутааттар 100 уонна 50 тыһ. солк. ылыбыттар. Охлопков кулун тутарга Уаровка ити бэриги “Юность” стадион аттыгар илдьэн биэрбитин аҕынна. Уаров массыынаттан утары бэйэтэ тахсыбыт, онон өссө ким баарын кыайан көрбөтөҕүн эттэ. Оттон атын түгэннэргэ кини кэбиниэттэригэр илдьэн биэрбитин эттэ.

Маны таһынан, Степан Охлопков дьокутааттарга Лас-Вегаска көҥүл тустууга аан дойду чөмпүйэнээтигэр баралларыгар харчы көрдөөбүттэригэр 150 тыһ. солк. илдьэн биэрбитин эттэ. Туоһу этэринэн, дьокутааттар уопсайа 900 тыһ. солк. ылбыттар. Оттон хаалбыт 100 тыһ. кини “тэрилтэ дьыалаларыгар туһаммытым” диир.

ysia.ru Источник: http://ysia.ru/stepan-ohlopkov-ne-zayavlyal-o-vzyatke-potomu-chto-uarov-i-savvin-ubedili-chto-zasluzhili-etih-deneg/

Тарҕат:

Комментарии

Защитный код Обновить