Арассыыйа Силиэстийэлиир кэмитиэтин уонна ФСБ үлэһиттэрэ алмааһы уоран батарыынан дьарыктанар уорбаланааччылары туттулар.
Уорбаланааччылар «АЛРОСА» хампаанньаттан алмааһы уоран, сокуоннайа суох батарыынан төһө эмэ өр дьарыктаммыт.Буруйданааччылар ортолоругар хампаанньа үлэһитэ Елена Канунникова, кини куомуннааҕа гВладимир Гординскай уонна Арассыыйа, Грузия гражданстволардаах Владимир Табидзе баар.
Силиэстийэ сабаҕалыырынан, Канунникова хампаанньаттан алмаас уорар, Табидзе тиксиһиннэрэр, Гординскай батарыы иһин эппиэттиир эбит. 22 мөлүйүөн солкуобайтан тахса суумалаах алмааһы уоруу кэмигэр бу дьону миэстэтигэр туттулар. “АЛРОСА” хампаанньа тус куттал суоһаабатын сулууспата бу чахчыны бигэргэттэ уонна эбии сулууспалаах бэрэбиэркэ кытаанахтык барарын иһитиннэрэр.
Дьэҥдьиир кэмигэр кинилэр олорор миэстэлэриттэн барыта 3 мөлүйүөн дуоллартан тахса суумалаах, 2 000 караттан тахса ыйааһыннаах 500кэ чугаһыыр алмааһы уонна 11 бриллианы, аан дойдуга аатырар бреннээх киэргэл оҥоһугу, ол иһигэр бриллиант киэргэллээх 30тан тахса чаһыны, 2 мөлүйүөн дуоллартан тахса уонна 500 тыһыынча евроттан тахса суумалаах уу харчыны буллулар. Бу дьону силиэстийэ кэмигэр хаайдылар, кинилэргэ холуобунай дьыала көбүтүлүннэ.
