Войти

Войти

Бүгүн, от ыйын 15 күнүгэр, Дьокуускай куораттааҕы суукка судьуйа Анна Маркова Дьокуускайдааҕы аэропорт урукку дириэкэригэр Николай Местниковка тэриллибит холуобунай дьыаланы көрдө. Бүгүҥҥү суут мунньаҕар судаарыстыбаннай буруйдааччы бэйэтин көрүүтүн эттэ, сарсын уорбаланааччы өрүт этиниэҕэ.

Санатар буоллахха, Николай Местниковка РФ ХК 204 уонна 290 ыст. (“Кэмиэрчэскэй бэригинэн атыылаһыы”, “Бэриги ылыы”) холуобунай дьыаланы тэрийбиттэрэ, барыта 5 эпизодка уорбалыыллар. Силиэстийэ быһаарбытынан, 2014 сыл балаҕан ыйыттан 2018 с. бэс ыйыгар дылы, аэропорт иһигэр таһаҕаһы суулуур уонна аэропорт дьиэтин сууйар-сотор урбаанньыттар түүлэһии дуогабарын уһатарын уонна аэропорду кытары ыкса үлэлэһэллэрин иһин диэн, Николай Местников каартатыгар уонна уу харчынан бэрик биэрэ олорбуттар. Силиэстийэ “Николай Местников, уопсайа, 27 мөл. солк. бэрик ылбыт” диэн сабаҕалыыр.

Суут мунньахтарыгар Николай Афанасьевич кинини үҥсүбүт урбаанньыттары кытары хаһан да илэ көрсүбэтэҕин, кинилэри букатын да билбэтин, Синявскай нөҥүө бэриги көрдөөбөтөҕүн туһунан эппитэ. Маны таһынан, кини урбаанньыттары харчы иһин көмүскүү уонна көҥүл ыыта олорбутун туһунан этиини сымыйанан аахпыта.

Оттон “Олимп-Арт” диэн дьиэни сууйар, хомуйар тэрилтэни кытары дуогабары түһэрсии анал куонкурус кэннэ, хамыыһыйа быһаарыытынан барбыт. Местников, дириэктэр быһыытынан, хамыыһыйаҕа биир эрэ куолаһы ылар бырааптааҕын, онон хайдах даҕаны хамыыһыйа быһаарыытыгар соҕотоҕун дьайар кыаҕа суоҕун эппитэ. Онон “бэрик иһин ханнык да тэрилтэни, урбаанньыты көмүскүү олорботоҕум, оннук кыаҕым-быраабым да суоҕа, барыта сокуон хараҕынан этэ” диир.

Местников суут кэмигэр тэрилтэ үлэһиттэригэр, дьоҥҥо-сэргэҕэ элбэхтик көмөлөспүтүн эппитэ. Ол курдук, аэропорт бэрт элбэх үлэһитэ “Гагаринскай” уонна “Промышленнай” уокуруктарга олороллорун быһыытынан, бу уокуруктары тупсарыыга, араас социальнай хабааннаах бырайыактары өйүүргэ үгүөрү үбү ыыппытын кэпсээбитэ. Холобур, бу уокуруктарга тутуу, өрөмүөн үлэтигэр 4,5 мөл. солк., суол өрөмүөнүгэр – 3 мөл. солк., 19 мөл. тахса солкуобайы ыарыһах, кыаммат оҕолорго көмө, үөрэх тэрилтэлэригэр, биирдиилээн дьоҥҥо спонсор быһыытынан ыыппытын эппитэ.

Бүгүҥҥү суут мунньаҕар борокуруор Эверстов суукка “силиэстийэ хомуйбут дакаастабыла сууттанааччы буруйдааҕын толору дакаастыыр” диэтэ. Итиэннэ “Местников туоһуларга дьайыыны оҥорбут, кинилэри куттаабыт”, “Синявскайдаах Арбатскай Местниковка бэйэлэрэ кэлэн ый ахсын харчы биэрбэтэхэрэ, сууттанааччы ирдэбилинэн бэрик биэрэргэ күһэллибиттэрэ” диэтэ. Маны таһынан, борокуруор “Местников ылбыт харчытын көмөҕө ыыппыта диэн, кини Ил Түмэн дьокуатаата буолар интэриэһигэр сытар” диэтэ. Аны туран, урбаанньытары кытары түһэрсиллибит дуогабарга Местников илии баттаабыт, онон “суутанааччы билбэппин эҥин диирэ сыыһа, төттөрүтүн ити дуогабарга илии баттаабыта кини буруйун дакаастыыр” диэтэ. Борокуруор “Тэрилтэ акцията өрөспүүбүлүкэ бас билиитигэр сылдьар, онон судаарыстыбаннай үбү ыскайдааһын өссө кутталлаах” диэтэ. Маны таһынан, “Местников буруйун билиммэт, ол аата кини харыс да кэмсиммэтин туоһулуур, ол эрээри, кини силиэстийэни кытары актыыбынайдык үлэлэспитэ чэпчэтии буолуон сөп” диэтэ. Борокуруор Николай Афанасьевиһы 15 сылга кытаанах эрэсиимнээх күлүүс хаайыытыгар симэллэригэр уонна 400 мөл.солк. ыстыраабы төлөтөрүгэр көрдөстө.

Николай Афанасьевич өрөспүүбүлүкэ дьонугар-сэргэтигэр элбэх үтүөнү оҥорбутун, көмөлөспүтүн туһунан элбэх киһи ахтар. Чуолаан, “Кыым” хаһыат эрэдээксийэтигэр ити туһунан элбэх биллэр-көстөр дьон илии баттааһыннаах суруктара эмиэ бааллар. Суруйбут дьон, сүнньүнэн, “Местников хайдах да оннук гыныа суохтаах этэ, ханнык эрэ туора күүстэр ити дуоһунастан олохтоох киһини туората сатыыллар. Ити барыта соруйан оҥоруу” диэн курдук хабааннаахтык суруйаллар.

“Бу дьыалаҕа тиһэх туочуканы суут быһаарыыта ууруо, түмүгэ хайдаҕыттан тутулуга суох, кырдьык өрөгөйдүө” диэн эрэнэбит.

Тарҕат:

Комментарии

Защитный код Обновить