Войти

Войти

Бэҕэһээ, тохсунньу 20 күнүгэр, Дьокуускай куораттааҕы суукка судьуйа Татьяна Егорова Ил Түмэн урукку дьокутааттарыгар – Александр Уаровка уонна Дмитрий Саввиҥҥа тэриллибит холуобунай дьыаланы салгыы көрдө. Санатар буоллахха, урукку дьокутааттары Степан Охлопковтан 900 тыһ.солк. бэриги ылыыга уорбалыыллар. Дьокутааттары 2018 сыл муус устар 27 күнүгэр туппуттара. Дьыаланы балай эмэ  уһуннук көрдүлэр уопсайа отуттан тахса суут мунньаҕа буолла. Билигин көмүскэһээччилэр өттүлэриттэн туоһулары истэллэр.

 

Маны таһынан, Александр Уаровы төрөөбүт Сунтаарын улууһугар командировкаҕа барарыгар аймахтарыгар хонон-өрөөн баран, Ил Түмэн кассатыгар тиийэн гостиницаҕа хоммутун туһунан кибитээнсийэни көрдөрөн төлөппүт, инньэ гынан 159 тыһ.солк. иҥэриммит диэн силиэстийэ уорбалыыр.

Дьокутааттар албакааттара ити 900 тыһ. сыһыаннаан, икки дьокутаат куолаһынан сокуону уларытар кыахтара суоҕун, барыта элбэх куолас быһаарарынан, бэриги ылыы оруна суоҕун туруорсаллар.

Суут кэмигэр, борокуруор туруорсуутунан, былырыын ахсынньыга Сунтаар улууһугар олорор туоһулары  видеосибээһинэн доппуруостаабыттара. Бэҕэһээҥҥи суут тылбаасчыт кыттыылаах буолла, онно  “Сунтаар сонуннара” хаһыат урукку эрэдээктэрэ Иван Чагдинскай, Уаров кийиитэ Раиса Матросова уонна Бордоҥ оскуолатын урукку дириэктэрэ Руслан Иванов туоһу быһыытынан доппуруостаннылар.

15 сыл дьокутаат уопсастыбаннай көмөлөһөөччүтүнэн сылдьыбыт Иван Чагдинскай Уаровы сөмөлүөккэ көрсөн баран, арыаллыырын, хоноһолото диэн бииргэ төрөөбүт быраатыгар Юрий Ивановка Бордоҥҥо атаарарын,ол тахсан иһэн маҕаһыынтан хайаан да 3-5 тыһ. солк. бородуукта атыылаһан өттүк харалаах,илии тутуурдаах тиийэрин этэр. Кини кырыы нэһилиэктэргэ эрэ барарыгар атын сиргэ хонуктуурун этэр. Маны таһынан, Уаров быраатыгар хонон баран төннөрүгэр 5-6 тыһ. солк.бэрсэрин этэр. Инньэ гынан, Уаров аймахтарыгар туспа хоско хоно сытарын, аһын-үөлүн, суунарын-тараанарын иһин төлөһөр диэн кэпсиир. Чагдинскай Уаров 25 сыл дьокутааттыырын тухары улуус туһугар дууһатынан ыалдьарын, бэйэтин да харыстаммакка үлэлээбитин, хаста сүүстэ кырыммытын, дьокутааттары,миниистирдэри арыаллаан аҕалбытын, улуус дьонугар-сэргэтигэр элбэхтэ көмөлөспүтүн аҕынна. Итиэннэ бириигэбэр тахсарыгар Александр Сергеевич бары үтүөтүн-өҥөтүн, доруобуйатын, сааһын учуоттаан таһааралларыгар көрдөстө. Судьуйа ол хадаатайыстыбаны суут матырыйаалыгар киллэрэргэ быһаарынна.

Уаров кийиитэ Раиса Матросова суукка Уаров мэлдьи кинилэргэ туспа хоско түһэрин бигэргэттэ, итиэннэ бородуукта атыылаһарын, кэргэнэ да суоҕугар киниэхэ тус бэйэтигэр хонугун иһин 5-6 тыһ. солк. хаалларарын эттэ. Маны таһынан, Бордоҥҥо Билайн эрэ сибээс баарынан, оттон Уаров МТС сибээһинэн туһанар буолан, дьиэтээҕи төлөпүөнтэн наадаларыгар эрийэрин, онтун иһин эмиэ төлөһөрүн эппит. Раиса Матросова этэринэн, кини кэргэнэ бастакы доппуруоска силиэдэбэтэлтэн кыбыстан убайыттан харчы ыларын туһунан кэпсээбэтэҕин эппит. Үһүс туоһу – Руслан Иванов, Александр Сергеевич Бордоҥ оскуолатын тутууга өҥөлөөҕүн, куруук дьонугар кэлэригэр бородуукталыырын, хонугун иһин төлөһөрүн, оннооҕор быыбардааччыларын дьонун дьиэтигэр ыҥыран кэпсэтэрин эппит.

Судьуйа Егорова олунньу3 күнүгэр дылы суут мунньаҕар тохтобулу биллэрдэ. Ол кэннэ салгыы олунньу 4,17,18 күннэригэр суут мунньаҕа барыаҕа.

Тарҕат:

Добавить комментарий

Бүтэһик сонуннар