Бэҕэһээ, олунньу 18 күнүгэр, Дьокуускай куораттааҕы суукка судуьуйа Татьяна Егорова Ил Түмэн урукку дьокутааттарыгар – Александр Уаровка уонна Дмитрий Саввиҥҥа тэриллибит холуобунай дьыаланы салгыы көрбүт.
Бэҕэһээҥҥи суукка сууттанаачччылар кэллиэгэлэрэ – Владимир Прокопьев уонна Елена Голомарева көрдөрүү биэрбиттэр. Бу иннинэ Александр Корякин уонна Алексеев Еремеев доппуруостаммыттара. Судьуйа Уаровы уонна Саввины ыам ыйын 31 күнүгэр дылы дьиэ хаайыытыгар салгыы олороллоругар уураахтаата.
Сууттанааччылар икки сыл курдук дьиэ хаайыытыгар олороллоро, биллэн турар, кинилэр туруктарыгар үчүгэйинэн дьайбат. Хайалара да сааһыра барбыт дьон буоллахтара. Бэҕэһээҥҥи суут мунньаҕар Александр Уаров: “Мин олоҕун моҥоон олорор кырдьаҕас хахай курдук икки сыл устатыгар дьиэ хаайыытыгар олоробун. Түөрт истиэнэҕэ хааллан олоруу уйулҕа өттүнэн олус уустук, кэргэммиттэн ураты кимниин да кэпсэппэппин, кими да дьиэбэр ыалдьыттата ыҥырар быраабым суох. Дьокутаат күүстээх, киириилээх-тахсыылаах үлэтигэр биккиллибит киһиэхэ ити олус ыарахан. Киһи өстөөҕөр да баҕарбат дьыалата”, - диир. Дмитрий Саввин бу икки сыл устата хааллан олорон кимиэхэ да дабылыанньа оҥорботоҕун, эрэсиими биирдэ да кэспэтэҕин этэн туран, сымнатарга көрдөспүт. Албакааттар эмиэ көмүскээччилэрин дьиэ хаайыытыттан босхолуур уолдьаспытын, уопсайынан итинник миэрэ билигин кэлэн төрүөтэ суоҕун этиннилэр. Борокуруор Рабжирова “бу дьыала иһэ-истээх, уратылаах, сууттанааччылар сибээстэрэ элбэҕинэн, ыйааһыннаах дьон буолалларынан, дьыала хаамыытыгар араас дьайыыны оҥоруохтарын сөп”, - диэн эттэ.
Судьуйа Татьяна Омоллоновна сууттанааччылар “судаарыстыбаннай сулууспа интэриэһигэр уонна былааһы утары оҥоһуллубут ыар дьыалаҕа эриллэллэр, онон ыам ыйын 31 күнүгэр дылы дьиэ хаайыытыгар олороллоро сөп” диэн ылыммата. Салгыы кулун тутар 12 күнүгэр суут мунньаҕа салҕаныаҕа.
