Войти

Войти

Бүгүн, олунньу 27 күнүгэр Саха Өрөспүүбүлүкэтин Үрдүкү Суутугар Чурапчы улууһун баһылыгар Андрей Ноговицыҥҥа тэриллибит холуобунай дьыаланы хос көрдүлэр.

Санатар буоллахха, Ноговицыҥҥа Арассыыйа ХК 160 ыст. 3 ч. тэриллибит дьыаланы Аммаҕа Мэҥэ Хаҥаластааҕы оройуоннай суут былырыын ахсынньы 19 күнүгэр көрбүтэ уонна буруйун дакаастаабакка эппиэтинэстэн толору босхолообута. Онуоха борокуратуура ону кытары сөпсөспөккө салгыы ааһыммыта. Силиэстийэ сабаҕалыырынан, Андрей Тимофеевич 2017 сыллаахха Чурапчытааҕы үөрэтэр производственнай кэмбинээт дириэктэригэр бэйэтин тиэргэнин туттарыгар ылбыт тутуу матырыйаалын бүддьүөт харчытытан төлөтөргө дьаһайбыт. Былырыын кулун тутарга Ноговицыны туппуттара уонна дьиэ хаайыытыгар утаарбыттара. Силиэстийэ кэмигэр дуоһунаһыттан босхолообуттара, онтон  ахсынньыттан үлэтигэр хос тахсыбыта.

Ноговицын албакааттара - Местникова уонна Платонов, итиэннэ 4 уопсастыбаннай албакаат бастакы суут бириигэбэрэ саамай сөптөөҕүн этиннилэр, Ноговицын оҥорбут үтүөтүн-өҥөтүн аҕыннылар. Тамара Местникова “силиэстийэ счету эрэ булан иҥнэр, оттон ити счет иннинэ хайаан даҕаны дуогабар, аакта эҥин баар буолуохтаах. Оттон ол суох ээ, оччотугар тоҕо ити счет сүрүн дакаастабыл буолуохтааҕый?” диэтэ. Албакаат Платонов “суукка Ноговицын бу дьыаланы оҥороругар өһүөннээх хос санаатын кыайан дакаастаабатаххтара, ол иһин саамай сөпкө көтүрбүттээрэ” диэн санааны тутуста. Эмсэҕэлээччи өрүт албакаата Хомподоев "суут бастакы уурааҕын оннунан хаалларыҥ, уларытымаҥ" диэн туруорсубута соһуччу буолла. Ол да буоллар борокуруордар Постникова уонна Докторова "дьыаланы саҥаттаан көрөргө" диэн туруорустулар.

Бүгүҥҥү суукка Ноговицыны өйөөн 20-чэ киһилээх бөлөх мустубут. Кинилэр истэригэр норуодунай суруйааччы Сэмэн Тумат, уопсастыбаннай кэрэспэдьиэн Иван Пономарев, "Сомоҕо күүс" салайааччыта Михаил Мяриканов,  фермердэр, баһылыктар уо.д.а. Саала иһигэр биир өйөөччү аргыый аҕайдык сахалыы сиэринэн алаадьы уура сатаабытын суут бириистэбэ “маннык көҥүллэммэт” диэн бопто. Мэҥэ Хаҥаластааҕы суукка баһылыгы өйөөччүлэр кымыстаах, алаадьылаах, сахалыы сиэринэн иччилэртэн көрдөспүттэрэ. Бу сырыыга ити да көмөлөспөтө: Үрдүкү Суут кэллиэгийэтин бэрэссэдээтэлэ Игорь Верхотуров баһылыкка тэриллибит холуобунай дьыаланы саҥаттан көрөллөрүгэр бириигэбэрдээтэ. Онон дьыала хаттаан көрүллэр буолла.

Тарҕат:

Комментарии

Защитный код Обновить

Бүтэһик сонуннар