Аан дойду барыта коронавируска ылларан, "паника" бөҕө буолан сылдьар. Ыарыы Азиянан, Европанан, Эмиэрикэнэн курдуу тарҕаныыта түргэнэ сүрдээх. Эмиэрикэҕэ биллиилээх киинэ актера Том Хэнкс кэргэнинээн ыалдьыбыттар. Ираҥҥа улахан салайааччылара өлөллөр.
Арай Арассыыйаны эрэ тумнубут курдук. Ыалдьыбыт дьон 30-ча буолла, бары омук сириттэн кэлбиттэр эбэтэр кэлии дьонтон сыстыбыттар. “Тоҕо биһиэхэ биллибэтий?” диэн, ити кистэлэҥин таайа сатаан сорохтор дьиҥнээх информацияны кистииллэр дииллэр. Сорохтор бассаабка тарҕанар арыгыны элбэҕи истэххэ сыстыбат үһү дииллэрин итэҕэйэр. Киһи араас.
Кытайдар коронавируһу үөрэтэн баран ыарыы тарҕанар саамай табыгастаах температурата +5 уонна +8,72 кыраадыс икки арда, салгын сиигэ 35-50 % буолуохтаах диэн быһаарбыттар. Вирус +8,72 кыраадыс кэннэ актыыбынаһа намыраан барар, оттон +30 кыраадыска тарҕаммат буолар.
Онон буоллаҕына, биһигини баччааҥҥа диэри ыарыы тарҕанарыттан тымныыбыт көмүскээн турар эбит. Билигин Киин Арассыыйаҕа эмискэ сылыйда. Коронавирус ыарыыта элбээтэҕинэ, кытай учуонайдара сөпкө эппиттэр диэххэ сөп. Суох буоллаҕына, атын быһаарыы көрдүү сатыырбыт буолуо. Саха сиригэр +5 кыраадыс харалдьык тахсыыта, кус кэлиитэ диэн этиэххэ сөп буолуо. Онон Үрдүк Айыыларбытыттан аан дойдуга ити ыарыы түргэнник намырайан, тарҕаммат буоларын көрдөһүөҕүҥ.
Владимир Степанов.
