Муус устар 5 күнүнээҕи көрдөрүүнэн, барыллааһын быһыытынан өрөспүүбүлүкэҕэ өссө биир киһи коронавируһунан ыалдьыбыт. Кини дьахтар, соторутааҕыта Нидерландыттан кэлбит.
“Кулун тутар 28 күнүгэр Нидерландыттан кэлбит дьахтар анаалыһа барыллаан “положительнай” түмүгү көрдөрбүт. Бу дьахтар билигин Дьокуускайга инфекционнай балыыһаҕа сытар. Кини атын дойдуттан кэлээт да “самоизоляцияҕа” олорбут. Чугастык алтыспыт дьонуттан анаалыс ылыахтара”, – диэн суһал штаб иһитиннэрэр.
Эрдэ Ил Дархан субуотаҕа икки киһи үтүөрэн тахсыбыттарын туһунан иһитиннэрбитэ. Билигин балыыһаҕа тоҕус киһи сытар.
Кулун тутар 11 күнүгэр Доруобуйа харыстабылын аан дойдутааҕы түмсүүтэ “COVID-19” диэн коронавирус саҥа инфекцията тарҕаммытын туһунан иһитиннэрбитэ. Аан дойду үрдүнэн 1 мөл тахса киһи ыалдьыбыт, 50 тыһ тахса киһи өлбүт.
