Кангаласс оскуолатын урукку дириэктэрэ, Дьокуускай куорат Уопсастыбаннай палаататын чилиэнэ Алексей Юрченко итирик туруктаах сылдьан икки киһини түҥнэри көтөн өлөрбүтүн туһунан урут суруйан турабыт.
2016 сыллаахха ахсынньы 6 күнүгэр Юрченконы Арассыыйа ХК 264 ыст. 2 ч. тэриллибит холуобунай дьыаланы Дьокуускай куораттааҕы суут көрбүтэ. Судьуйа Павел Оконешников Юрченконы буруйдааҕынан аахпыта уонна 5 сыл 6 ый холуонньа-поселениеҕа уураахтаабыта. Ону кытары сөпсөспөккө, Юрченко Үрдүкү Суукка ааһыммыта . Онуоха апелляция суута 3 сыл, 11 ыйга диэри кыччатан биэрбитэ.
Икки эдэркээн оҕону – 25 саастаах суоппары уонна олорсон испит 24 саастаах кыыһы – итирэн баран, харах быччайарынан “Мерседеһинэн”көтүтэн иһэн, суорума суоллаабыт киһи холугар ити “холуонньа-поселение” диэн “ырай олоҕо” буоллаҕа. Сэрэйиллибитин да курдук, “бэрт бэрээдэктээх” итириксит Юрченконы болдьоҕун иннинэ бэҕэһээ босхолоон кэбистилэр.
Уорбаланааччы Юрченкоҕа Арассыыйа Холуобунай кодексатын 264 ыст. 6 ч. холуобунай дьыала тэриллибитэ. Ол эбэтэр, “итирик туруктаах сылдьан алҕаска икки эбэтэр онтон элбэх киһини өлөрүү” диэн. Бу ыстатыйа ирдииринэн, буруйа толору дакаастаммыт сууттанааччы 4 сылтан 9 сылга диэри хаайыллыан сөп этэ. Ону таһынан 3 сылга диэри туһааннаах дуоһунастарга үлэлиирэ бобуллуохтаах. Суут кэмигэр Юрченко “ураты бэрээдэгинэн сууттуургутугар (особый порядок)” диэн көрдөспүтүн эмсэҕэлээччи өрүттэр, судаарыстыбаннай буруйдааччы уонна судьуйа да ылыммыттара. Инньэ гынан, суут ураты бэрээдэгинэн салаллыбыта. Ол эбэтэр, Юрченко суут инниттэн буруйун билиммитин быһыытынан судьуйа суут кэмигэр холуобунай дьыала чэрчитинэн хомуллубут матырыйаалларга дириҥии барбакка, бириигэбэри уталыппакка таһаарбыта. Инньэ гынан, суут кэмигэр сууттанааччы характеристикаларын ырытан тахсыбыттара. Юрченко “карьера үктэлинэн” кимиэллээхтик тахсан испит. Бииртэн-биир дуоһунаска талыллан, ытыс үрдүгэр сылдьыбыт, наҕараадата да элбэх. “СӨ Ыччат бэлиитикэтин туйгуна” анал бэлиэлээх. 32 сааһыгар Алексей Анатольевич “СӨ Үөрэҕириитин туйгуна” ааты ылбыта. Суукка биир үксүн Юрченко “үчүгэйэ, көнөтө, дьоһун майгылааҕа, үлэһитэ, уопсастыбаны убаастыыра...” ахтыллан тахсыбыта. Бачча үчүгэй үлэлээх, үтүө майгылаах, күөх оту тосту үктээбэт эдэр киһи салгыы кынаттаах курдук көтүө эбитэ буолуо да, атырдьах ыйын 22 күнүнээҕи быһылаан барытын туора сотон кэбиспитэ. Суут уурааҕынан, үс сыл дуоһунастаах үлэҕэ сылдьара бобуллубута.
Суут кэмигэр сууттанааччы “сэтинньи 25 күнүгэр уол оҕолоннум” диэн туоһу сурук аҕалбыта. Дьиҥинэн, Юрченко ыам ыйыгар официальнайдык эр-ойох буолууттан аккаастаммыт эбит. Ол эбэтэр, хат сылдьар кэргэнин кытары арахсыбыт. Биллэн турар, олоххо араас буолар, ол эрээри үүнэр көлүөнэҕэ үтүө сыаннастары иҥэриэхтээх “туйгун учуутал”, оскуола дириэктэрэ ити хобдох холобурунан идэтин аналын туора сотор буолбатах дуо? Аны туран, кини дьалаҕайыттан өлбүттэр бэйэлэрэ эмиэ оҕолоохтор ээ... Кырачааннар тулаайах хаалбыттара улаханнык суолталаммата...
Ама да буолбутун иһин, итирик сылдьан, харах быччайарынан туох да буруйа суох эдэркээн, элбэҕи эрэннэрэр ыал оҕолорун, төрөппүттэри өлөрөн баран, онто да суох сымнаҕас бириигэбэрин болдьоҕор диэри олорбокко, УДОҕа биэрэрэ төһө сиэрдээҕий? Бу киһиэхэ уопсайынан суобас диэн баар дуо? Сокуон хараҕынан суут сиэрдээхтик көрбөт буоллаҕына, Таҥара суутуттан өссө ким да куотунар кыаҕа суох...
Дмитрий ИВАНОВ.
