Киһи көҥүлүн сокуоннайа суох быһыыга буруйданар кэргэннии Леваднайдарга тэриллибит холуобунай дьыала борокуруор көрүүтүгэр барда. Санатар буоллахха, 2017 сыл олунньутугар Леваднайдар Дьокуускай куорат Кузьмин аатынан уулуссатыгар филиппинка Ракель Фаброз де ла Круз диэн манна үлэлии кэлбит дьахтары күүстэринэн хаайан сыппыттара.
Кристина Левадная “Чистый дом” диэн дьиэни хомуйар, сууйар клининговай хампаанньалааҕа. Кини үлэһиттэрэ филиппинкалар этилэр. Эмсэҕэлээбит Ракель, үлэ усулуобуйатын тулуйбакка уурайан бара сатаабыта. Онуоха хаһаайка сөбүлээбэтэх уонна кэргэнин кытары аэропорт оройуонугар баар кыбартыыраҕа илдьэн хаайбыттар, итиэннэ кэһэтэ түһэн биэрбиттэр. Филиппинка түннүгүнэн куотарга күһэллибит. Ракель Афанасий Алексеев диэн урбаанньыкка көмө көрдөөн тиийбитэ. Онуоха быыһааччыта уопсастыбаннаска айдаан таһааран, Леваднайдар дьыалалара биллибитэ.
Былырыын олунньу 14 күнүгэр Леваднайдарга холуобунай дьыала көбүтүллүбүтэ. Кинилэри сокуоннайа суохтук киһи көҥүлүн быһыыга уорбалаабыттара. Маны таһынан, Кристина Леваднаяны сокуоннайа суох миграцияны тэрийиигэ, оттон кини кэргэнин — Александр Леваднайы (уруккута Дьокуускай куорат УБЭПК начаалынньыгын солбуйааччыта) доһуонустаах боломуочуйатын аһара туһаныыга уорбалыыллар.
Силиэстийэ сылтан ордук барда. Билигин холуобунай дьыала борокуруор көрүүтүгэр ыытыллыбыт. Борокуруор холуобунай дьыаланы бигэргэттэҕинэ аны суут көрүүтүгэр барыаҕа. Уорбаланааччылар буруйдарын билиммэттэр.
