Нам сэлиэнньэтигэр суолга саахал түмүгэр мотоцикл ыытан испит киһи эчэйдэ, таһаҕас тиэйэр массыынаҕа кэтиллэн. 41 – саастаах эр киһи реанимацияҕа киирдэ.
Саха сиринээҕи ГИБДД иһитиннэрэринэн, ыам ыйын 5 күнүгэр Чернышевскай аатынан уулуссаҕа олус түргэнник айаннаан испит мотоциклист иннигэр айаннаан иһэр Газ маркалаах улахан массыынаҕа сааллыбыт. Эчэйбит киһи көмүскүүр шлема суох айаннаан испитэ биллибит.
«Түмүгэр, мотоциклист төбөтүгэр ыар эчэйиилээх реанимацияҕа тиэрдиллибит. Эр киһи суоппар дастабырыанньата суоҕа уонна ыытан испит тимир көлөтө ГИБДД учуотугар турбатаҕа быһаарыллыбыт. Эчэйбит киһитттэн хааныгар арыгы уонна наркотик эттиктэрэ баалларыгар чинчийэр анаалыс ылыллыбыт», - диэн этиллэри иһитиннэриигэ.
Улахан таһаҕас тиэйэр массыына суоппара уонна кини пассажира чэгиэннэр, эчэйбэтилэр, диэн бэлиэтээтилэр биэдэмистибэҕэ. Чинчийээһин көрдөрөрүнэн суоппар арыгы испэтэҕин көрдөрдө. Саахалы силиэстийэлээһин салҕанар.
