Аллараа Халыма улууһугар биир кэпэрэтиип муоста сууйааччыта 57 куул күндү балыгы уоран тутулунна. Бу туһунан СӨ ИДьМ пресс-сулууспата иһитиннэрэр.
Барыллаан силиэстийэ быһаарбытынан, уорбаланааччы дьахтар үлэлиир ыскылаатыгар сыаналаах күндү балык баартыйата харалла сытарын бэркэ диэн билэр эбит. Онно ымсыыран түүннэри салаасканан 57 куул балыгы дьиэтигэр соһон аҕалбыт. 26 куул балыгы кини ааһан иһэр ыраах айаннааччыларга (дальнобойщик) атыылаабыт, оттон ордубут 31 куулу улуус киинигэр – Черскэйгэ ыыппыт. Дьэ, онно полициялар тараччы тутан ылбыттар.
Кэпэрэтиип үлэһиттэрэ атыыга ыытаары аахпыттара, 57 куул чыыр балык итээн тахсыбыт. Дьэ, ол кэннэ тыллабыр оҥорбуттар. 650 тыһ. солк. хоромньу оҥоһуллубут. Өр-өтөр буолбакка, кинилэр 33 саастаах муоста сууйааччы кэллиэгэлэрэ түүннэри ыскылаат хаптаһынын көтүрэн уорбута биллэн тахсыбыт.
Холуобунай дьыала тэриллибит.
