Бу күннэргэ Горнай улууһун биир маанылаах эдэр ыала, Маҥаны бастыҥ ыччата Алексей, Ксения Вензеллэр “Тыа ыала – 2019” көрүү-күрэскэ өрөспүүбүлүкэҕэ бастыҥынан ааттанан, 300 000 солкуобайдаах сэртипикээти бэлэх туттулар. Вензель дьиэ кэргэттэрин үгүс киһи эҕэрдэлээтэ, үөрүүлэрин тэҥҥэ үллэһиннэ.
Маҥан аттаах маҥанылар эдэр ыаллара улууска эрэ буолбакка өрөспүүбүлүкэҕэ бастыҥ үлэлээхтэринэн, үгүс ситиһиилээхтэринэн биллэллэр. Горнай олохтоохторо онон киэн тутталлар, холобур оҥостоллор.
Алексей, Ксения Вензель дьиэ кэргэттэрин туһунан Маҥаны ыччатын лидерэ Анастасия Максимова бу курдук кэпсиир:
– Быйыл өрөспүүбүлүкэтээҕи “Тыа ыала – 2019” күрэххэ Горнай улууһуттан Орто-Сурт бөһүөлэгиттэн Ксения, Алексей Вензель дьиэ кэргэттэрэ кыттаннар бастакы миэстэни ыллылар. Маҥанылар үбүлүөйдээх сылы түмүктүүрбүтүгэр үөрүүлээх сонун буолла. Быйылгы күрэх арыый атына диэн кэтэхтэн буолла.
Вензель дьиэ кэргэттэрэ нэһилиэккэ инникиттэн барыга бары талааннаах, дьоҕурдаах ыаллар. Түөрт эмдэй-сэмдэй уол оҕолоохтор: улахан уол Толя – 6 кылаас, Артур – 3 кылаас уонна икки игирэ Алекс, Авдей “Кустук” оҕо уһуйаанын иитиллээччилэрэ.
Эдэр ийэ Ксения Анатольевна Маҥанытааҕы орто оскуолаҕа библиотекарынан үлэлиир. Ону таһынан оҕолорго “Ключик” иис-оҥоьук куруһуогун ыытар.
Аҕалара Алексей Петрович Маҥанытааҕы сынньалаҥ киинигэр звукооператорынан улэлиир. “Чысхаан” ВИА тыыннаах доҕуһуол улахан дьоҥҥо уонна оҕолорго дьарыктыыр. Бэйэтэ элбэх ырыа ааптара.
Бу күрэххэ кыайан “Сельская семья” форумҥа ыҥырыллан, нэдиэлэни быһа Дьокуускай куорат араас сирдэригэр, тэрилтэлэригэр сынньана, эбии дьиэ кэргэҥҥэ саҥа көрүүлэри арыйа, дуоһуйа сылдьаллар.
Уонна ахсынньы 4 күнүгэр долгутуулаах, кэтэһиилээх күннэригэр А.Е.Кулаковскай аатынан Культура киинигэр 300 тыһ. солк. сэртипикээти тутан үөрүүлэрэ үгүс.
Бу күрэххэ Сахабыт сириттэн алта араас эйгэлээх ыаллар, араас номинацияннан наҕараадаланнылар.
Түгэнинэн туһанан, Ксения, Алексей Вензель дьиэ кэргэттэрин Маҥаны нэһилиэгин олохтоохторун ааттарыттан итиитик истиҥник эҕэрдэлиибит. Баҕарабыт дьиэ кэргэҥҥитигэр үтүмэн үөрүүлээх, ситиһиилээх күннэри. Дьоллоох доруобай олоҕу!
Санатар буоллахха, Маҥаны эдэр ыаллара маннык таһымнаах күрэскэ мэлдьи ситиһиилээхтик кытталлар. Ол курдук, нэһилиэкпит баһылыга Михаил Текеянов дьиэ кэргэнинээн 2017 сыллаахха Ньурба Дьаархааныгар буолбут “Сельская семья” күрэх кыайыылаахтара. Иккис ыалбыт Ньургуяна, Афанасий Прокопьевтар – өрөспүүбүлүкэтээҕи “Сельская семья – 2017” кыайыылаахтара. Ыал ийэтэ Ньургуяна бэйэбит ыччаппыт, билигин Мэҥэ Хаҥаласка Бүтэйдээххэ ыал буолан олорор. Үһүс эдэр ыалбыт Туяра, Федот Максимовтар – “Семья года – 2018” кыайыылаахтара.
– 2018 сылга Арассыыйатааҕы Дьиэ кэргэн куонкуруһугар кыттыбыппыт. Ол түмүгүнэн, “Семья года – 2019” диэн кинигэ быйыл бэчээттэнэн таҕыста. Манна Арассыыйа араас муннуктарыттан барыта 353, ол иһигэр Сахабыт сириттэн 5 ыал киирдэ. Кинигэҕэ киирбиппит биһиги дьиэ кэргэн устуоруйатыгар умнуллубат түгэн буолла. Бастыҥ дьиэ кэргэн аатын сүкпүппүтүттэн үөрэбит, кэнэҕэски ыччаппыт өйдүү-саныы сылдьыахтара дии.
Биһиги Вензель дьиэ кэргэнин кытта телефонунан кэпсэтэ сырыттыбыт:
– Өрөспүүбүлүкэтээҕи “Тыа сирин ыала” күрэһи быйыл сонуннук тэрийдилэр. 4 араас түһүмэҕи ааһан кыайыылааҕынан буоллубут. Фестиваль кыайыылаахтарын ыҥыран, нэдиэлэ устата араас маастар кылаастарга, интэриэһинэй көрсүһүүлэргэ сылдьан билиибит-көрүүбүт кэҥээтэ. Элбэх интэриэһинэй дьону кытта көрсөн кэпсэттибит. “Туймаада” вокальнай ансаамбылы кытта биир сыанаҕа ыллаабыппыт олохпут биир умнуллубат түгэнэ буолуоҕа.
Түгэнинэн туһанан, улууспут, нэһилиэкпит дьонугар-сэргэтигэр истиҥ махталбытын тириэрдэбит. Эһиги өйөбүлгүт биһиги кыайыыбытыгар улахан тирэх, көмө буолла.
“Үлэ күүһэ” хаһыат, ulus.media/
