Войти

Войти

Ааспыт сылга биэстэн элбэх оҕолоох 117 ыал “Сокуоннай саастарын ситэ илик биэстэн элбэх оҕолоох ыалы олорор дьиэнэн хааччыйыы” бырагыраамманан, дьиэ ылалларыгар  социальнай төлөбүрү ылбыттар. Бу туһунан СӨ тутуу министиэристибэтин пресс-сулууспата иһитиннэрэр.

 Бырагыраамма бу сылга эмиэ үлэлиир. Ааспыт сыл ахсынньытыгар өрөспүүбүлүкэ бүддьүөтүгэр 350 мөл солк үп ууруллубут.

Элбэх оҕолоох ыал олорор усулуобуйаларын тупсаралларыгар аналлаах судаарыстыбаннай өйөбүлү биэрэр бырагыраамма 2012 сылтан үлэлиир.  Ол эрэн үбүлээһин тиийбэт буолан өр кэмҥэ  үчүгэйдик үлэлээбэтэҕэ. Ол курдук, 2017 сыллаахха тоҕус эрэ ыал көмө харчынан туһаммыта. Оттон 2018 сыллаахха бырагыраамма үбүлэммэтэҕэ”, — диэн пресс-сулууспа иһитиннэрэр.

Бу усулуобуйа 2018 сыл бүтүүтэ тосту уларыйбыт. Өрөспүүбүлүкэ бүддьүөтүгэр 350 мөл солк үп ууруллубут.

Элбэх оҕолоох ыал саҥа эбэтэр иккис ырыынактан дьиэ атыылаһалларыгар, чааһынай дьиэ тутталларыгар төннөрүллүбэт төлөбүр кээмэйэ дьиэ кэргэн чилиэнин ахсааныттан  тутулуктаах. Ол курдук, 2,5-5 мөл солк диэри хамсыыр.

2019 сылга Мэҥэ-Хаҥалас улууһугар саамай элбэх – 136 ыал учуокка турбут. Оттон Сунтаарга – 135, Ньурбаҕа – 130.  Үөһээ Бүлүүгэ биир эрэ ыал учуокка турар. Ол эрэн бу тоҕус оҕолоох ыал буолар.

Ааспыт сыл көрдөрүүтүнэн, Саха сиригэр уопсайа 1749  ыал баара биллэр. Олортон улахан аҥара киин улуустарга олороллор.

news.ykt.ru/

Тарҕат:

Добавить комментарий