Зульфия Степанова Дьокуускай куорат 29-с №-дээх оскуолатын 2015 сыллаахха үөрэнэн бүтэрбитэ. Элбэх оҕолоох дьиэ кэргэн 2-с оҕото. Кыра эрдэҕиттэн уруһуйдуурун олус сөбүлүүр. Ордук таҥаска-сапка фантазиялаан айар үлэтэ оскуола саҕаттан саҕаламмыта. Оскуолаҕа үөрэнэ сылдьан, куорат оскуолаларын үөрэнээччилэрин ортотугар куукула оҥоһуутугар бириистээх миэстэҕэ тиксэн турар. Ол ситиһиитэ – инникитин ылар идэтигэр олук буолбута саарбаҕа суох.
Идэни таба талыы – табыллыы мэктиэтэ
Оскуоланы бүтэрээт Зульфия Санкт Петербурдааҕы бырамыысалыннас технологиятын уонна дизайн университетын иһинэн аһыллан үлэлиир Инженернай таҥас оскуолатын (ИШО-колледж) технолог-конструктор идэтигэр үөрэнэ киирбитэ. Бу күннэргэ үөрэҕин кыһыл дипломунан үөрэнэн бүтэрэн, аны бу университет үрдүк үөрэҕэр бакалаврга кэтэхтэн үөрэххэ туттарсаары былааннанар. Үөрэҕин быыһыгар Санкт-Петербург куоракка брендовай маҕаһыыҥҥа сыаналаах былаачыйалары тигэр ательеҕа конструкторынан үлэлиир.
Киинэ эйгэтигэр боруоба
Зульфия устудьуоннуур сылларыгар Санкт-Петербург киинэ устуудьуйата уһулбут “Журналист” киинэтигэр массовкаҕа уһуллан киинэ эйгэтин кытта эмиэ билсиспитэ. Ол киинэҕэ 80-с сыл эдэр ыччатын сынньалаҥа көстөр эпизодугар уһуллубута. Онно уһуллубутун маннык кэпсиир: “Киинэҕэ кастинг биллэрбиттэрин интэриниэккэ түбэһэ ааҕан, харчыланар баҕаттан барбытым. Кастины этэҥҥэ ааспытым. Соҕотох азиатка этим. Устудьуон хармааныгар сөп түбэһэр гонорар ылбытым. Киинэ эйгэтэ диэн интэриэһинэй эбит. Икки күн устата уһулбуттара.
Дьон мөссүөнэ ордук табыллар
— Бэйэм ордук дьон мөссүөнүн уруһуйдуурбун ордоробун. Бииргэ үөрэммит устудьуон кыргыттарым сакаастарынан, кинилэр табаарыстарын уруһуйдаан биэрээччибин. Оруобуна уруһуйдуубун быһыылаах, астыналлар. Оскуолаҕа 11 кылааска үөрэнэ сылдьан ийэм үлэлиир тэрилтэтигэр, дьахталлар бырааһынньыктарыгар анаан бииргэ үлэлиир 20-чэ дьахтар мөссүөнүн хаартыскаттан көрөн олорон уруһуйдаан биэрбитим. Онон үгүстүк дьон мөссүөнүн уонна таҥаска-сапка моделлары айан уруһуйдуурбун ордук сөбүлүүбүн. Айылҕаны, кыылы-сүөлү уруһуйдаан көрө иликпин. Ити эйгэттэн тэйиччибин быһыылаах. Бииргэ төрөөбүт балтым Иванна уруһуйдуурун эмиэ олус сөбүлүүр. Кини билигин ХИФУ архитектура идэтигэр 1-кы кууруһу ситиһиилээхтик үөрэнэн бүтэрдэ. Онон 5 оҕоттон иккиэн айар куттаахпыт. Эдьиийбит Нюрбина быйыл Хабаровскайдааҕы университет педагогика идэтигэр магистратураны үөрэнэн бүтэрэн, дипломун туйгуннук көмүскээтим.
Төрөппүттэрбит идэ ыларбытыгар көҥүл биэрэллэр, орооспоттор. Онон бары сөбүлүүр идэбитигэр үөрэнэн идэ баһылаан эрэрбититтэн үөрэбит, киэн туттабыт. Киһи санаата сытар идэтигэр дьаныһан туран үөрэнэр, киэҥ билиилээх испэсэлиис буолан тахсарга дьулуһар. Биһиэхэ колледжка производственнай быраактыкабыт элбэх буолан, үөрэнэргэ олус интэриэһинэй. Таҥас-сап тигэргэ маастар хонтуруолунан тигэбит, үөрэнэбит.
Куонкурустарга кыттан уопут ылабын
—Үөрэнэр колледжым ыытар Арассыыйа таһымнаах куонкурустарыгар кыах баарынан кыттабын. Былырыын 2-с кууруска үөрэнэ сылдьан, орто анал үөрэхтэр ортолоругар ыытыллыбыт куонкуруска “Технология легкой промышленности” идэҕэ 3-с бириистээх миэстэҕэ тиксэммин, анал дипломунан наҕараадаламмытым. Быйыл “Дыхание весны” куонкуруска эмиэ ситиһиилээхтик кыттынным. Маннык Арассыыйа таһымнаах куонкурустарга бэйэ айар үлэтинэн кыттан киһи элбэҕи билэр, үөрэнэр уонна уопут ылар эбит. Онон кылаабынайа кыайыы буолбакка – кыттыыта буолар. Бэйэ кыаҕын холонон көрүү ситиһиигэ кынаттыыр. Киһи сайдыы хайдах таһымыгар сылдьарын билэр, сыаналанар.
Футбол чемпионатыгар волонтердаатым
— Аан дойдутааҕы футбол күрэҕэ Санкт-Петербург куоракка ыытылларынан сибээстээн, быйыл кыһын волонтердары сүүмэрдиир күрэх ыытылларын истэн, докумуоннарбын туттарбытым. 4000 кэриҥэ докумуон киирбититтэн, баара-суоҕа 2000 киһини аһардыбыттар этэ. Ол иһигэр миигин эмиэ ылбыттара. Кэпсэтиигэ ыҥырбыттара. Английскай тылга “пробеллаах” да буолларбын, бэйэбин кытта утары көрсөн олорон кэпсэтэн ылбыттара. Уопсай суумата 17000 солкуобай суумалаах волонтер анал таҥаһынан хааччыйдылар. Онон мин түөрт нэдиэлэ устата Питер Пулково аэропордугар омук сириттэн кэлэр футболу көрөөччүлэри көрсөөччүнэн сырыттым. Ол сылдьан бэйэм курдук волонтердуур биир саха уолун көрсүбүтүм. Бу аан дойду таһымнаах тэрээһиҥҥэ кыттыыны ылбыппыттан киэн туттабын. Элбэҕи биллим-көрдүм, сайынным. Арассыыйа киин куоратыгар үөрэнэр ыччат олоҕу көрүүтэ ураты буолар эбит.
