Киирии

Киирии

«Zavod» үҥкүү бөлөҕө саҥаттан саҥа сулустары киэҥ эйгэҕэ таһаарар, өрөспүүбүлүкэ аатын ааттатар. Чахчыта, да оннук. Ньургуйаана Яковлева кэргэниниин Андрей Степановтыын өрөспүүбүлүкэҕэ эрэ буолбакка, бүтүн аан дойдуга биллэр «Zavod» үҥкүү бөлөҕүн ситиһиилээхтик салайаллар.

Быйылгы аан дойду путбуолга чөмпүйэнээтин кэтээбэтэх-манаабатах, сураспатах, интэриэһиргээбэтэх киһи аҕыйах буолуо. Дьэ, хаһааҥҥытааҕар да сомоҕолоһон туран, дойдубут туһугар күүскэ долгуйдубут.

Оттон биһиги киэн туттуубут – «Za­vod» үҥкүү бөлөҕүн иитиллээччитэ Сер­гей Сидоров-Серго. Кини Лос-Анджелес биллиилээх хореограба Фрэдди Педерсен-Сонни ыҥырыытынан, аан дойду путбуолун үөрүүлээх сабыллыытыгар кытынна. Эдэр үҥкүүһүт суон сураҕырар «Лужники» аренатыгар голливуд сулуһа Уилл Смити кытары үҥкүүлээн имитэн, барыбытын сөхтөрүөн-сөхтөрдө, соһутуон-соһутта. Аан дойду сулустарын кытары тэҥҥэ туран, бэйэтин талаанын чаҕылхайдык көрдөрбүт, Саха сирин ааттаппыт Серго – «Тэбэнэт» бүгүҥҥү ыалдьыта.

28763294 156762221705395 7458328924183855104 n e1531655620686

– Сергей, кэпсэтиибитин саҕа­лыахха...

– Мин 16 саастаахпын. «Айыы Кы­һата» оскуолаҕа үөрэнэбин, быйыл күһүн 10-с кылааска киирэбин.

– Дьиэ кэргэниҥ туһунан кэпсии түспэккин ээ...

– Бииргэ төрөөбүт төрдүөбүт, бары уолаттарбыт. Мин ыал иккис оҕотобун. Бу орто дойдуга саамай чугас өйдүүр-өйүүр киһим – күн күбэй ийэм. Туох баар кыайыыларбын, ситиһиилэрбин барытын киниэхэ аныыбын... Ийэм миигин үҥкүү алыптаах эйгэтигэр сыһыар­быт, талааммын сайыннарарбар кыах биэрбит саамай чугас, күндү киһим.

36159704 205878660247413 3098925402073071616 n

– Үҥкүүгэ дьырыккын хаһан уонна хайдах саҕалаабыккыный?

– Быраатым миигиттэн биир сыл кыра. Ол иһин игирэ кэриэтэ бииргэ улааппыппыт. Бастаан утаа үҥкүүнэн иккиэн тэҥҥэ үлүһүй­бүппүт. Мин оччолорго 5-с кылаас этим. Оттон төлө­пүөн эҥин үйэтэ кэлэн, быраатым бу хайысхаҕа баҕата сыыйа-баайа умуллан барбыта. Маны таһынан, ийэбит икки оҕону үҥкүүгэ сырытыннарара ыарахаттардаах этэ. Онтон мин баҕам күнтэн күн күүһүрэн, «Ютуб» ханаалыгар биидьийэлэри көрө-көрө, араастаан хамсанан, үҥкүүлээн бөҕөтө буолбутум. Өссө тустуунан дьарыктана сылдьыбытым эрээри, үҥкүүлүүр дьоҕурум баһыйбыта диэххэ сөп. Бу санаатахха, букатын кыра эрдэхпиттэн араастаан хамсана, эрчиллэ сатыыр эбиппин. Кыра сылдьан, сиэркилэ иннигэр туран, биллиилээх дьон үҥкүүлэрин үтүктэрим (күлэр).

30590600 359066151164737 2003777452479873024 n

– Билигин эн номнуо «Zavod» иитиллээччитэ буолбутуҥ хайыы үйэ биэс сыл буолбут эбит...

– Этимэ даҕаны, бириэмэ олус түргэн! Билигин араас истиилгэ бэйэбин холонон көрөбүн. Биллэн турар, барытын сатыыр буоллаххына эрэ салгыы эрэллээхтик хардыылыыгын. Бу сылга мин Красноярскайга буолбут чөмпүйэнээккэ бастакы миэстэ буолбутум уонна Москубаҕа «Hip-Hop International» Арассыыйа чөм­пү­йэнээтигэр ТОП 4 бастыҥ үҥкүү­һүттэрин ахсааныгар киирбитим. Оттон хамаандабытынан төрдүс миэстэ буолары ситиспиппит.

36534057 1906644742968996 2672771454109483008 n

– Ордук ханнык хайысхалары биһириигиний?

– Үс баар. Холобур, «Hip-Hop», «Popping» уонна «Хореография». Билигин Арассыыйаҕа, тас дойдуларга аныгы үҥкүү истииллэрин өрө тутар буоллулар. Араас биэриилэр да элбээтилэр. Мин кыах баар буоллаҕына, улахан сыаналарга тахсан үҥкүүлүүр, күрэстэһэр баҕалаахпын.

inx960x640

– Үҥкүү эн олоххор суолтата тугуй?

– Бэйэбэр эрэлим улаатта. Ол эрээри атыттартан ураты талааннаахпын дэммэппин. Урут сыанаҕа тахсарбыттан, элбэх дьоннуун алтыһарбыттан олус кыбыстар этим. Киһи хас күн аайы сайдан иһэр эбит.

– Эн «Айыы Кыһата» оскуолаҕа үөрэнэр эбиккин дии. Бииргэ үөрэ­нэр доҕотторуҥ туһунан тугу этиэххиний?

– Доҕотторум элбэхтэр. Кинилэри олус убаастыыбын. Ураты эйгэлээх оскуолам туһунан кэпсээтэххэ, бу үөрэх кыһатыгар бастакы кылааска киирбитим. Биһиги учууталларбыт киэҥ билиилээх үөрэнээччилэри олох киэҥ аартыгар үөрэтэн таһаараллар. Билигин мин төрөөбүт тылбынан ыраастык саҥарабын, саха норуотун үтүө үгэстэрин үчүгэйдик билэбин. Мин онон киэн туттабын. Киһи киэҥ сирдэринэн сылдьан, төрөөбүт дойдуга таптала, убаастабыла уонна киэн туттуута биллэ улаатар. Аны, билиҥҥи сайдыылаах олох сиэринэн, омук тылын баһылаабыт киһи!

– Инники олоххун ханнык идэни кытары ситимниир былааннааххыный?

– Аангылыйа тылын үчү­гэйдик үөрэ­тиэхпин баҕа­рабын. Арааһа, инники олохпун тылы кытары ситимниирим буолуо. Эбэн эттэххэ, үҥкүү мин олохпор өрүү баар буолуоҕа. Үҥкүүтэ суох сатаммаппын.

– Үөрэххэр мэһэйдэппэккин дуо?

– Мин оскуолаҕа «5» уонна «4» сыанаҕа үөрэнэбин. Уопсайынан, киһи сыаллаах-соруктаах уонна баҕалаах буоллаҕына, барыта табыллар. Биллэн турар, киһи ыгылыйар, ыарахаттары көрсөр түгэннэрэ бааллар. Хата, дьонум-сэргэм өйөбүллэринэн эрэллээхтик хардыылыыбын.

– Дьэ, Сергей, эн путбуолга бүтүн аан дойду чөмпүйэнээтин үөрүүлээх сабыллыытыгар үҥкүүлээн, биир дойдулаахтаргын олуһун үөртүҥ, долгуттуҥ, дьоллоотуҥ даҕаны...

– Этимэ-э, барыта да түүл курдук (мичик гынар). Кылгастык үҥкүү устуоруйатын кэпсиэм сөп.

Ол курдук, ыам ыйын саҕатыгар иэйиим киирэн, сиэркилэ иннигэр туран, үҥкүү хамсаныыларын толкуйдаабытым. Сарсыҥҥы күнүгэр омуннаахтык Ньургуйаана Николаевнаҕа тиийэн: «Мин саҥа хореография толкуйдаатым», – диэн кэпсээбиппэр, кини сөбүлэһэн, «биидьийэҕэ устуохха наада» диэн буолбута. Ол кэннэ эксээмэннэрбин туттаран баран, биидьийэ таҥан, «Ютубка» таһаарбыппыт. Ол үҥкүүбүтүн Чөмпүйэнээт кэмигэр Арассыыйа ханаалыгар көрдөрбүттэрэ. Биһиги хамаанда бэйэбитин Бастакы ханаалга көрөн, үөрүү-көтүү, соһуйуу-өмүрүү бөҕөтө буолбуппут.

Бу соторутааҕыта биһиги өрөспүү­бүлүкэбитигэр аан дойдутааҕы «Интеллектуальнай оонньуу» күрэҕэ буолбута. Онно бэлэмнэнэн буһа-хата сырыттахпына эмискэ эрийэн: «Дорооболоруҥ, эйигин аан дойду путбуолга Чөмпүйэнээтигэр ыҥырабыт», – диэн соһуппуттара. Мин олус долгуйан, мух-мах буолан хаалбытым. Тэрийээччилэр билиэппин тута ыыппыттара. Дьэ, ол кэнниттэн түргэнник-тарҕаннык хомунан, Москубаҕа көппүтүм.

– Эйигин кинилэр хайдах талбыт эбиттэрий?

– «Sony Musiс» менеджерэ интэриниэт хасыһа олорон, миигин булан ылбыт уонна сүрүн хореограф Фрэдди Педерсен-Соннига көрдөрбүт эбит. Уопсайа алта үҥкүүһүт баар буолуохтааҕын, биир киһи тиийбэккэ сылдьыбыт. Хамаандабытыгар ТНТ ханаалыгар «Танцы» диэн биэрии кыайыылааҕа Виталий Уливанов, Майамиттан сылдьар кыыс уонна үс Арассыыйа биллиилээх үҥкүүһүттэрэ бааллара. Биллэн турар, кинилэр киэҥ сиргэ үлэлиир-хамсыыр буоланнар, таһымнаахтар. Ол да буоллар мин кинилэртэн хаалсыбакка тэҥҥэ үөрэммитим. Төһө да эрэпэтииссийэҕэ икки күн хойутаан тиийдэрбин, үҥкүүнү хаалбыт күн иһигэр үөрэтэ охсубутум. Эрэпэтииссийэ биэс күннээх абытайдаах дьарык этэ. Сарсыардаттан киэһээҥҥэ диэри дьарыктанарбыт.

e238812c b760 4767 a768 f9c5cb8fc707 1

– Дьэ, Голливуд сулустарын кы­тары мээнэ киһи биир сыанаҕа үҥ­күү­лээбэт буоллаҕа. Уилл Смиттиин кэпсэппитиҥ дуо?

– Биһиги бэлэмнэнии бэһис күнүгэр кинини кытта нүөмэрбитин туруоран көрбүппүт. Хантан да кэлбитэ биллибэккэ, биирдэ арыанаҕа баар буола түспүтэ. Суон, улахан баҕайы куоластаах киһи. Барыбытын кытары кэлэн аламаҕай баҕайытык үөрэ-көтө дорооболоспута.

– Улахан сыанаҕа тахсан баран, төһө долгуйбуккунуй?

– Ол иэйиини киһи тылынан сатаан быһаарбат, тиэрдибэт ээ. Олохпор хаһан да итинник улаханнык долгуйбатаҕым. Миигин хас эмэ тыһыынчанан киһи көрөрүн өйдүүр этим. Өссө биир дойдулаахтарым – эһиги бары – күүс-көмө буолбуккутун билэбин. Биир дойдулаахтарым үтүө тыллара, баҕа санаалара миигин элбэххэ кынаттыыр. Барыгытыгар махтал!

– Бэйэҥ путбуолу төһө интэ­риэ­һир­гиигиний?

– Оо, олус буоллаҕа дии! Кы­лаа­һын­ньыктарбын кытары өрүү көрөбүт, бириэмэ баар буоллаҕына, путбуоллуубут. Оттон, дьиҥнээх пут­буолу илэ хараҕынан көрөр диэн – букатын атын эбит. Аны туран, путбуол сулустарын илэ харахпынан үгүстэрин көрбүтүм. Барыта түүл курдук этэ. Мин Франция хамаандатыгар ыалдьыбытым, кинилэр кыайбыттара.

img 20180715 wa0008

– Бииргэ үҥкүүлээбит доҕот­тор­гун кытары билсэҕин дуу?

– Билсэн бөҕө буоллаҕа дии. Күн­нэтэ интэриниэккэ суруйсабыт, сити­һиилэрбитин кэпсэтэбит.

– Эн отой омук уолун курдук ис­тииллээххин. Уобараскын ким толкуйдууруй?

– Салайааччыларым Ньургуйаана Николаевна уонна Андрей Егорович сүбэ-ама буолаллар. Кинилэр уонна «Zavod» үҥкүү бөлөҕүн оҕолоро – мин иккис дьиэ кэргэним буолаллар. Бу хамаандаҕа киирбиппиттэн, ситиһиилээхтик үлэлии сылдьарбыттан, күннэтэ сайдарбыттан астынабын.

Биллэн турар, туох эмэ эппиэтинэстээх быһаарыныы ылынаары гыннахпына, хайаан да ийэбиниин кэпсэтэбин, сүбэлэһэбин. Холобур, баттаҕым бүрүчүөскэтин уларытарбар бастаан ийэбиттэн ыйыппытым.

– Эн ханнык улуустан төрүттээх­хиний?

– Уус Алдан, Кэбээйи уонна Нам улуустарыттан төрүттээхпин. Ол эрээри, бэйэбин ордук Кэбээйибин дэнэбин. Бу улуустарга дөрүн-дөрүн тиийэ сылдьар үгэстээхпин.

31878261 1730690560340010 6527633739051171840 n e1531125932321

– Үүнүөн-сайдыан баҕалаах оҕо­лорго тугу этиэххиний?

– Киһи иитиититтэн олоҕо тутулуктаах. Ол иһин кыра сааскытыттан үлэһит, үтүө майгылаах уонна күүстээх санаалаах буоларга үөрэниҥ. Миигин олоххо тус көрүүлээх, сыаллаах-соруктаах буоларга ииппит ийэбэр, оскуолам учууталларыгар, «Zavod» үҥкүү бөлөҕүн кэлэктиибигэр уонна доҕотторбор махталлаахпын. Салгыы үөрэҕи, сөбүлүүр дьарыгы дьүөрэлээн, этэҥҥэ саҥа саҕахтары арыйыахпын баҕарабын!

– Сергей, истиҥ кэпсээниҥ иһин махтанабын! Бу курдук өрүү ситиһии үктэллээх, олоххо эрэллээх буол!

Кэпсэттэ

Екатерина АФАНАСЬЕВА.

Тарҕат:

Комментарии

Защитный код Обновить