Аан дойдуга биллэр хаартыскаҕа түһэрээччи уонна суруналыыс Джимми Нельсон ааспыт сыл ахсынньытыгар Саха сиригэр кэлэ сылдьан, Анаабыр улууһун олохтоох табаһыттарын хаартыскаҕа түһэрбитин, устубутун социальнай ситимҥэ таһаарбыт.
Джимми Нельсон үлэлэрэ атыттарга холоотоххо олус уратылар. Кини устуудьуйаҕа кэрэ сэбэрэлээх кыргыттары, мааны таҥаһы-сабы, малы-салы түһэрбэт. Джимми Аан дойду араас муннугар олохсуйан олорор Азаро, Хули, Маори, Калам, Горока курдук норуоттары түһэрэр. Үлэлэрин “instagram” социальнай ситимҥэ @jimmy.nelson.official киирэн көрүөххүтүн сөп.
“Хабыс хараҥаҕа хас да чаас Туундара устун айаннааммыт долганнарга тиийдибит. Биригээдэ тойонуттан Романтан хайдах суолу булан айанныырын ыйыталастым. Онуоха киһим илиитинэн уҥа-хаҥас, үөһэ-аллара ыйда, ол аата кини хаары “ааҕарын” кэпсиир. Хаарынан түһүүлээх, тахсыылаах, көнөтө суох сири тутуһан айанныыллар эбит. Маннык суолу хас биирдии долган “ааҕар””.
“Олоххо киһи элбэҕи уларытыан сөп. Күн-дьыл туруга эрэ киһи былааһыгар бэриммэт. Бүгүн айылҕа биһиги диэки буолбата. Туман да туман. Манна -40 кыраадыс тымныы. Бу сырыыны иккиһин хатылыырбын саарбахтыыбын”.
“Долганнар Саха сиригэр Анаабыр улууһугар олороллор. Өрөспүүбүлүкэ киин куората Дьокуускай саамай тымныы куоратынан биллэр. Манна кыраадыс -60 тиийэ түһүөн сөп. Долган табаһыттара төгүрүк сыл бу кэрэ айылҕанан көһө сылдьан олороллор”.
“Биир түүн Кике тоҥмут ыт оҕотун булан утуйар мөһөөччүгэр суулан илдьэ сыппыта. Сарсыҥҥы күнүгэр “Көрүүй, көрүүй тыыннаах !” дии-дии ол күнү быһа үөрэ сылдьыбыта. Ол кэнниттэн ыппыт оҕото утуйар уубутун аймаабыта. Өскөтүн кинини таптаабатахха, имэрийбэтэххэ ыйылаа да ыйылаа буолара”.
“Хоту дойду дьикти, кэрэ айылҕатын устаары түргэн үлүгэрдик таҥнан-симэнэн таһырдьа ыстанныбыт. Камерабын тоҥорумаары ыга кууһа сылдьабын. Ол сырыттахпытына Роман “Бүгүн көһөр күммүт" диэн хаһытаата”".
“Күн-дьыл туругуттан долганнар көһүүлэрэ 8 чааска тиийэ уһуон сөп. 14500 тахса төбөлөөх ыстааданы батыһыннаран айаҥҥа туруналлар”.
“Биһиги эрчимнээхтик хамсана-имсэнэ сатыыбыт эрээри халыҥ таҥаспыт көнтөрүк дьону санатар. Бу караваны араас өттүттэн түһэрээри эккирэттибит”.
“Долганнар таба тириитинэн бүрүллүбүт балаакка курдук дьиэлэргэ олорбуттар. Билиҥҥи дьиэлэрэ томороон тымныыттан харыстыыр аналлаах оҥоһуллубут. Манна оһох күнү быһа умайар. Көһөллөрүгэр дьиэлэрин соһон илдьэ бараллар”.
“Манна кэлиэхпититтэн аан бастакытын халлаан сырдаан, күн уота саҕахтан быкпыта”.
