Билиҥҥи кэм кэрэ аҥаардара талааннарын, сатабылларын туһанан дьиэ кэргэттэрин туһугар үлэлииллэр-хамсыыллар, олохтон үчүгэйин эрэ сомсон ыларга дьулуһаллар. Биһиги кэккэбитигэр бэйэ-бэйэлэригэр майгыласпат ураты көрүүлээх, холобур буолар дьон элбэх. Мин билиһиннэрэр дьоруойум аҕыс оҕолоох, сиэннээх, таптыыр, таптатар кэргэннээх дьоллоох дьахтар. Кини Елена Васильева диэн, Уус Алдан улууһуттан төрүттээх Тойбохой кийиитэ.
Улахан оҕолоро номнуо устудьуоннар. Биир кыыһа ыал буолан атын оройуоҥҥа олохсуйан олорор. Игирэ кыргыттара доруобуйаларыгар хааччахтаах буоланнар, ийэ киһи күннээҕи түбүгүн киһи сэрэйэр эрэ.
Тыа сиригэр үлэ булар уустук. Елена Тойбохойго аан маҥнай кэлэригэр сөптөөх үлэ көстүбэтэҕэ. Онтон сылтаан олорон хаалбакка, сөбүлүүр дьарыгын сөргүтэн баайыынан дьарыгыран барбыта. Үлэлэрин олохтоох урбаанньыт Антонида Габышева маҕаһыыныгар туттаран атыылаттарара. Дьон олус сэргээн, ким маннык кэрэтик баайарын сураһан, бэйэлэрин баҕаларынан үлэх биэрээччи элбээбитэ. Инньэ гынан Елена Антонида Николаевнаҕа махтала муҥура суох.
Елена үрдүк хаачыстыбалаах сабынан баайарга дьулуһар. Талааннаах киһи ураты буочара үлэлэригэр тута көстөр. Хотуобай таҥастан туох да уратылара суох диэтэхпинэ, бука, сыыспатым буолуо. Аҥардас өҥү сатаан дьүөрэлиирэ, оҥоһукка ураты, кэрэ көстүүнү биэрэр, тупсарар. Билигин үлэх куораттан, илин эҥэртэн, хоту оройуоннартан тиийэ киирэ турар.
Елена аан бастаан оҕо сылдьан сэттэ саастааҕар балтытыгар сибиитэрэ баайан турардаах. Ол кэмтэн ыла төһөлөөх элбэх араас таҥаһы-сабы, аксессуардары баайбыта буолуой? Киһи ааҕан сиппэт. Билигин Тойбохой нэһилиэгэр кэрэ аҥаардарга аналлаах “Ситим” диэн түмсүүлээх. Манна сааһыттан тутулуга суох баҕалаах дьон баайарга буор босхо дьарыктаналлар. Елена ыытар куруһуога уратылаах. Ол курдук, хас биирдии киһиэхэ учуутал кэриэтэ быһааран биэрэр, дьиэтээҕи сорудахтарын бассаабынан хонтуруоллуур. Хаачыстыбалаахтык, кэрэтик эрдэ баайан бүтэрбиттэргэ сэмэй бэлэх биэрэр. Оннооҕор өрөбүл күннэргэ Сунтаартан тахсан үөрэнэллэр. Онон күннээҕигэ кэтиллэр уонна араас муодунай быһыылаах таҥастары баайарга үөрэммит кэрэ аҥаардар элбээн иһэллэр.
Елена баайбыт таҥастара “lengeriya” диэн этикиэткэлээхтэр. Талаанын таба тайанан, дьоҕус бизнес тэринэн дьиэ кэргэнигэр эбии дохуот киллэрэр. Инстаграм социальнай ситимҥэ ити аатынан киирэн үлэлэрин көрүөххүтүн сөп.
Елена олоҕун аргыһа Андрей дьиэ ис-тас үлэтигэр көмөлөһөн абырыыр. Ону таһынан бэлэм оҥоһуктарга этикиэткэлэри иилэн, суулаан күүс-көмө буолар.
Сатабыллаах киһи санаата күүстээх. Аны билигин камвольнай фабрикаттан баайар саптары кууһунан атыылаһыыга үлэлэһэн эрэр. Елена хас биирдии үлэ тупсаҕай көстүүлээҕин ааһан, хаачыстыбалаах, бөҕө-таҕа буолуохтаах диэн санаанан салайтаран үлэлиир. Араас маастар-кылаастары ыытан эбии харчы киллэринэр. Кини дьону буор босхо баайарга үөрэтэрин сөҕөр-махтайар дьон элбэх. Онуоха Елена хоруйа судургу: “Киһиэхэ талааны таҥара биэрэр, ону өйдөөн тулалыыр дьоҥҥо тарҕатан, сөпкө туһаныахха наада. Билигин ас-таҥас ыарахан кэмигэр күннээҕи араас муодунай таҥаһы бэйэлэрин илиилэринэн оҥорон таһааран кэтиэхтэрин сөп. Ону ааһан үлэххэ баайан, эбии харчы киллэриниэхтэрин сөп. Куруһуокка сылдьар кэрэ аҥаардар кэпсэтэн-ипсэтэн, биир сыаллаах-соруктаах үлэлиибит. Бары олус сүрэхтээх, баҕалаах кыргыттар. Талааммынан тулалыыр дьоммун үөрэтэ-такайа сылдьарбыттан олус астынабын, сэргэхсийэбин. Айбыт айыы таҥараҕа ис сүрэхпиттэн махтанабын!».
Куруһуокка дьарыктанар кэрэ аҥаардар санааларын үллэстэллэр:
Любовь Максимова, Тойбохой олохтооҕо:
– Биһиги куруһуокпут салайааччыта Елена Гаврильевна кэлбит киһи хайаан да саҥаны билэн-көрөн, сатаабатын сатаан барарын ситиһэр. Кини олус талааннаах, киһи быһыытынан холкута, үөрүнньэҥэ, сатабыллааҕа дьону түмэр. Инники былааммыт өссө да киэҥ.
Диана Пай, Сунтаар олохтооҕо:
– Лена оҕолоругар эрэ буолбакка, элбэх кэрэ аҥаарга үтүө холобур буолар. Киирэн-тахсан, ханнык да түгэҥҥэ санаатын түһэрбэт. Эйэҕэс, холку майгылаах буолан кинини куруук элбэх дьон тулалыыр. Тойбохойдор талааннаах кийииттэнэммит баайарга үөрэнэн абырана, сэргэхсийэ сылдьабыт.
Саха сирин кыра нэһилиэгин далбар хотуна бэйэтин оҥоһугун кэлии таҥастааҕар ордуктук оҥорон, атыыга таһаарара кэрэхсэбиллээх. Елена сатаабатаҕа диэн суох. Улахан оҕолор атахтарыгар туран, сорохтор Монголияҕа үөрэх кыһатыгар үөрэнэллэр, кыралар да сэмэй ситиһиилэринэн ийэлэрин күннэтэ үөрдэллэр. Кинилэр холобур оҥостор, күүстээх санаалаах, ылсыбытын ыһыктыбат күндү киһилэрэ – ийэлэрэ!
Юлия АЛЕКСЕЕВА, Сунтаар.
