Киирии

Киирии

Атах таҥаһын сахалыы тыыннаан уруһуйдуур худуоһунньук эр бэрдин билиһиннэриэхпин баҕарабын. Кини аата Геннадий Былков, Үөһээ Бүлүү улууһун Нам нэһилиэгиттэн төрүттээх. 2006 сыллаахха Дьокуускайдааҕы художественнай училищаны бүтэрэн баран   “Уран Саха” ювелирнай фирмаҕа үлэлээбитэ. Билигин урбаанньыт быһыытынан айа-тута, үлэлии-хамныы сылдьар.  

Геннадий үлэтин таһынан атах таҥаһыгар сахалыы оһуору-мандары, суругу-бичиги түһэриинэн дьарыктанар. Кини дьиэ кэргэнигэр эбии дохуот киллэрэр туһунан толкуйдаабыта ырааппыт эбит. Ону таайбыт курдук биир үтүө күн эстрада чаҕылхай ырыаһыта Сахамин кэлэн, сыанаҕа кэтэр сарыы бачыыҥкатын сонуннук уларытыан баҕарарын туһунан эппит. Геннадий сыта-тура толкуйдаан баран ылсарга санаммыт. Уонна аналлаах кыраасканан оһуор түһэрбит, тимиринэн киэргэппит. Онно дьүөрэлээн тирии кур уонна бөҕөх оҥорон биэрбит. Онтон ыла “маннык оҥорон киэҥ эйгэҕэ таһаарыахха сөп эбит” диэн өй киирэн салгыы дьарыктанан барбыт.

20190408 113932

20190408 114324

20190408 113953

Бастакы оҥоһугун социальнай ситимҥэ таһаарбытын көрөн дьон былдьаһа-тараһа кэриэтэ атыыласпыттар. Инньэ гынан, үлэх киирэ турар диэн үөрэ кэпсиир. Геннадий хас биирдии үлэтэ хатыламмат ураты буоларыгар кыһаллар. Ол курдук, ис хоһоонноох, ааттаах-суоллаах уруһуйдары эмиэ түһэрэр. Атах таҥаһын Италияттан кытта үлэһэн ылар эбит. Таҥаска эмиэ уруһуйдуур.   Ону таһынан, фанеранан арааһы барытын оҥорор.

20190408 114217

20190408 114145

20190408 114302

20190408 114107

Айар куттаах дьон туспа “буочардаах” буолуохтаахтарын туһунан санаатын маннык үллэстэр: “Атыттартан ураты суоллаах-иистээх буоллахха эрэ, элбэҕи ситиһэҕин дии саныыбын. Ол туһугар араас эйгэҕэ холонон көрүөххэ наада. Худуоһунньук айар үлэтигэр көҥүл буолуохтаах. Оннук сылдьан кини бэйэтин көрдөөн булар. Кими эрэ үтүктэр эбэтэр майгынныы сатыыр сыыһа. Мин устудьуоннуу сылдьыахпыттан сахалыы оһуору-мандары сэргиибин. Ханнык баҕар оҥоһук омугун тыынын илдьэ сылдьар буоллаҕына, ураты буолар дии саныыбын”.

20190408 114044

20190408 114155

20190408 114246

Геннадий кэргэнэ эмиэ дизайнер идэлээх. Ол иһин, үлэтин аан бастаан кэргэнигэр көрдөрөр. Үксүн кэрэ аҥаардар үлэһэр буоланнар, сорох ардыгар ыарырҕатабын диэн билинэр. Онон, кэргэнэ сөбүлээтэҕинэ эрэ үлэтин табыллыбытынан аҕаар.

20190408 114236

20190408 114136

Геннадий инники былаана киэҥ. Үөрүйэх дьоҥҥо үөрэнэн атах таҥаһын бүтүннүүтүн оҥоруон баҕарар. Уонна үлэһиттэрдээх буоллахпына оҥоһугум куруук атыыга баар буолуо этэ диэн кэпсиир. Геннадийга ситиһиилэри баҕарыахха!

Венера Охлопкова  

Тарҕат:

Комментарии

Дапсы
0 Дапсы 08.04.2019 17:18
Дьэ ураты суоллаах, нарын тарбахтаах, көҥүл санаалаах эдэр үчүгэй худуоһунньук үлэтэ саха култууратыгар саҥа кэрдиис буолуо диэн үөрэбин. Моһолу көрсүбэккэ элбэх үтүөнү оҥордун! Аҕатын көрөн билэрим
Ответить

Защитный код Обновить

Бүтэһик сонуннар