Бииргэ төрөөбүт эдьиийдии-балыс Наталья Акимова уонна Ирина Федорова сахалыы оһуордаах-мандардаах, эҥин араас быһыылаах суумка арааһын тигэллэр. “Нарын иис” диэн устуудьуйа-мастарыскыай тэринэн үлэлээбиттэрэ номнуо уонча сыл буолбут. Кыргыттар төрөппүттэрэ худуоһунньук идэлээхтэр. Онон оҕо эрдэхтэриттэн кэрэ эйгэҕэ улааппыт буоланнар, Наталья дизайнер оттон Ирина ювелир идэтин баһылаабыттар. Билигин иккиэн ыал ийэлэрэ.
Наталья: Биһигини иискэ ийэбит Айталина Александровна үөрэппитэ. Кыра сылдьан бэйэбитигэр таҥас-сап тиктэн кэтэр этибит. Оттон суумка тигиитинэн кэлин дьарыктанар буолбуппут. Бастаан дьүөгэлэрбит, аймахтарбыт көрөн сөбүлээн үлэһэр буолбуттара. Ол кэмҥэ иккиэн оҕолонон олорор этибит. Инньэ гынан, таах олоруохтааҕар сөбүлүүр дьарыкпытын үлэ оҥостон урбаанньыт буоларга санаммыппыт. Ийэбит иистэнньэҥ буолан биһиэхэ куруук күүс-көмө буолар, сүбэлиир-амалыыр. Ааттарбыт инники буукубаларынан “Нарын иис” диэн кини толкуйдаабыта. Төһө кыалларынан араас таһымнаах быыстапкаларга кытта сатыыбыт. Быйыл мастарыскыайбытын кэҥэтээри сылдьабыт. Уонна маастар-кылаастары ыытар былааннаахпыт. Ону олус элбэх киһи ыйытар.
Ирина: Туттар матырыйаалбытын Москубаттан үлэһэн ылабыт. Хас биирдии үлэбит үрдүк хаачыстыбалаах буоларыгар улахан болҕомтобутун уурабыт. Саҥа сүүрээни киллэрэр туһуттан Наталья Атакова диэн иистэнньэҥи кытта үлэлээн эрэбит. Кини оҕуруонан олус кэрэтик тиһэр. Инньэ гынан, кэлин оҕуруонан киэргэтиллибит суумкалары оҥорор буоллубут. Дьон ордук сахалыы истииллээх суумкалары сэҥээрэр. Оннооҕор Казахстантан кытта үлэһэллэр. Арааһа, бэйэлэрин оһуордарыгар майгыннаталлар быһыылаах. Ону таһынан, портмоне, кумааһынньык оҥоробут. Илиинэн эбэтэр массыынанан быысапка түһэрэн, тириинэн аппликация киллэрэн уонна ааты-суолу түһэрэн киэргэтэбит.
Хаартыскаҕа Наталья уонна Ирина Studio_tata түһэриитэ.
Венера Охлопкова.
