Муус устар 14 күнүгэр “Сэргэлээх уоттара” култуура киинигэр “Ыллаа, ыллаа...”диэн Александр Самсонов – Айыы Уолун сырдык кэриэһигэр анаммыт аһымал кэнсиэр буолан ааста.
Александр Иннокентьевич Самсонов – Айыы Уола 1978 сыллаахха тохсунньу 7 күнүгэр Хаҥалас улууһун Улахан-Аан нэһилиэгэр күн сирин көрбүтэ. Кини 30 ырыа, икки альбом ааптара. Баара-суоҕа 20 сааһыгар ыарахан ыарыыттан олохтон туораабыта.
Бу кэнсиэр көрөөччүлэр көрдөһүүлэринэн иккиһин ыытылынна. Туруорааччы режиссер Егор Васильев – JEADA, Саргылаан, Гай Николаев, Гаврил Менкяров, Милена Борисова, Ыра Чаҕаан, Алексей Львов, Сандал, Урсун Громов уо.д.а. кыттыыны ыллылар. Айыы Уолун ийэтэ Марфа Иннокентьевна Самсонова “Ийэҕэ махтал” диэн ырыаны толордо уонна көрөөччүлэргэ, тэрийээччилэргэ улахан махталын тиэртэ.
Марфа Самсонова: “Миэхэ Николай Иванов салайааччылаах эдэр дьон уолум Сашенька сырдык аатын үйэтитэргэ кини скверигэр пааматынньык туруорар туһунан этии киллэрбиттэрэ. Улахан пааматынньык туруорар төһөлөөх элбэх үбү ирдиирин билэр буоламмын саарбахтаабытым. Уолаттар ороскуоту барытын бэйэбит уйунабыт диэн уоскуттулар. Түгэнинэн туһанан кинилэргэ улахан махталбын тиэрдэбин”.
Николай Иванов “SaydarPlus” салайааччыта: “Биһиги көлүөнэ ыччат үгүспүт Айыы Уолун ырыаларыгар улааттахпыт дии. Мин уруккуттан Айыы Уолун кэриэһигэр кэнсиэр тэрийэр ыра санаалаах этим. Биһиги Александр төрөөбүт дойдутугар баар скверигэр пааматынньык туруорарга быһаарыммыппыт. Оннук этиилээх ийэтин Марфа Иннокентьевнаны кытта көрсүбүппүт. Кини биһигини олус өйөөбүтэ. Инньэ гынан, Анжела Качановская режиссердаах бастакы кэнсиэри тэрийбиппит. Иккиc кэнсиэри JEADA туруорда. Кэнсиэргэ киирбит харчы пааматынньыгы тутууга туттуллуоҕа”.
Виктор, Айыы Уолун сүгүрүйээччитэ: “Александр Самсонов ырыалара барыта “хит” буолбуттара. Күн бүгүнүгэр диэри ылланаллар. Мин оскуолаҕа үөрэнэ сылдьан кини ырыаларын сөбүлээн ыллыыр этим. Биллэн турар, кэнсиэргэ ыллаабыт артыыстар курдук буолбатах. Ордук Урсун Громов диэн уол ыллыырын сөбүлээтим”.
Дмитрий Оконешников – Сулусхан, Иван Никифоров хаартыскаҕа түһэриилэрэ.
