Киирии

Киирии

Бүгүн, ыам ыйын 24 күнүгэр Дьокуускай куорат Перинатальнай Киинигэр – мэдиссиинэ билимин хандьыдаата, Дьокуускай куорат Дууматын дьокутаата, СӨ үтүөлээх бырааһа, РФ доруобуйа харыстабылын туйгуна, Дьокуускай куораттааҕы килииникэ балыыһатыгар 1992 сылтан кылаабынай бырааһынан үлэлиир Николай Николаевич ВАСИЛЬЕВ 60 сааһын бэлиэтиир үбүлүөйдээх күнэ буолла.

Николай Николаевиһы эҕэрдэлии өрөспүүбүлүкэ салалтата, мэдиссиинэ эйгэтигэр бииргэ үлэлиир кэллиэгэлэрэ, тэрилтэ салайааччылара, чугас дьоно муһуннулар. Ил Түмэн спикерэ Петр Гоголев, АГиП салайааччытын солбуйааччы Евгений Федоров, Дьокуускай куорат гордуматын спикерэ Альберт Семенов, куорат мээрэ Сардана Авксентьева, “Ситим” медиа бөлөх генеральнай дириэктэрэ Мария Христофорова, Ил Түмэн дьокутааттара о.д.а. истиҥ-иһирэх тылынан Николай Николаевиһы эҕэрдэлээтилэр.

DSC 0033

Тыл эппит дьон үксэ Николай Николаевиһы киһи быһыытынан олус боростуойун, дьону эдэриттэн-кырдьаҕаһыттан тутулуга суох барыларыгар биир тэҥник сыһыаннарын, куораттааҕы килииникэ балыыһата кини салайар кэмин устата (27 сыл) материальнай-тэхиниичэскэй базата тупсубутун тоһоҕолоон бэлиэтээтилэр.

Николай Васильев оҕо сааһын, устудьуоннаабыт сылларын маннык ахтар:

DSC 0016

 

– Дэриэбинэҕэ сылга биирдэ быраастар кэлэн нэһилиэнньэҕэ булгуччулаах мэдиссиинэ көрүүтүн ыыталлар этэ. Арай биирдэ оскуолабыттан дьиэбэр кэлбитим дьиэм иһэ толору ыалдьыт. Урут доруобуйа харыстабылын министиэристибэтигэр үлэлии сылдьыбыт Егор Борисов Ньурбаҕа хирург быраас этэ, кини уонна өссө 3-4 киһи баара. Кинилэри көрөн наһаа соһуйдум уонна хоспор киирэн саһан хааллым. Дьонум аһылыкка ыҥыраллар даҕаны, тоҕо эбитэ буолла, куттанаммын тахсыбаппын.

Оччолорго 5-с кылааска үөрэнэрим. Ийэм бастакы группалаах инбэлиит, улаханнык ыарытыйара. Ол иһин буолуо, улааттахпына эмчит буолуом диэн санаа оччолортон киирбитэ. Дьонум кэпсииллэринэн, оҕо уһуйааныгар сылдьан наар эмчит буола ооньуур үһүбүн.

Факультеппытыгар 28 буолан үөрэммиппит. Ол саҕана Татьяна Ивановна Крылова диэн деканнаах этибит, сүрдээх сатабыллаах салайааччы, учуонай дьахтар этэ. Бары олус түмсүүлээх, эйэлээх интернациональнай састааптаах бөлөх этибит. Арменияттан, Бурятияттан кэлэн үөрэммиттэрэ. 6 сыл устата бөлөхпөр солбуллубат староста этим. Бүтүн куурус оҕолоругар түҥэтиллиэхтээх истипиэндийэлэрин суумкабар уктан баран сылдьааччыбын. Аны санаатахха наһаа да сэрэхтээхтик сылдьар эбиппин.

Кууруспут оҕолоро бары истиҥ, доҕордуу сыһыаннаах этибит. Мэдиссиинэ факультетыгар, ол саҕан хирургия, терапия, акушер специализациялара баар этэ. Мин терапевт-быраас идэлээх бүтэрбитим. Онтон Харьков куоракка гастроэнтерологияҕа үөрэнэн, гастроэнтеролог-быраас идэтин ылбытым.

Аан бастаан үлэлии кэлэрбэр 25 саастаах этим. Ол бастаан үлэлии кэлбит күммүн олох умнубаппын. Кэлбит күммэр 2 палаатаны анаан кэбистилэр. Фонендоскоппун, тонометрбын туппутунан анаабыт палааталарыгар киирбитим, 4 дьахтар сытар эбит. Бастакы ыарыһахпын көрөн баран, фонендоскоппунан тыҥатын иһиллии олордум, арай тыынара иһиллибэт. “Хайдах баҕайыный?” диэн испэр мунаахсыйдым, бэйэм долгуйан нэһиилэ олоробун. Ыарыһаҕым, фонендоскобум кулгаахпыттан түһэн хаалбытын эппитигэр, сүрдээҕин кыбыһынным. Бастакыбын оннук сүрэхтэнэн турардаахпын, ону олох умнубаппын.

Профсоюз мунньаҕын быыбара. Бэрэссэдээтэли талыахтаахтар. Кистээбэккэ эттэххэ, испэр “миигин талаллара буоллар” диэн сүрдээҕин баҕаран, кычыгылана олоробун. Оччолорго бу дуоһунас, билиҥҥи кэмнээҕэр, сүрдээҕин сыаналанара. Миигин талыахтара диэн улахан эрэл суоҕа, миигиннээҕэр уһун кэмҥэ үлэлээбит уопуттаах дьон бааллара. Онтон түмүккэ, мин кандидатурабын куоластаабыттарыгар сүрдээҕин долгуйбутум уонна эдэр киһи “абаансанан” бу дуоһунаска тиксибиппин өйдөөбүтүм, бэйэбэр ирдэбилим өссө улааппыта.

Биир кэмҥэ бары-барыта “дефицит” буола сылдьыбыт кэмнэрдээҕэ. Харчы баар – наадыйар табаарыҥ суох. Оччолорго мин “секретная” диэн анал паапкалаах буолааччыбын. Онно үлэһиттэрим саамай наадалаах табаардарын (таҥас, атах таҥаһа, ис таҥас) бары кээмэйэ баар буолааччы. Мин, дьэ, бу паапкабын хонноҕум анныгар кыбыммытынан араас инстанцияларынан сылдьан, үлэһиттэрбэр, кинилэр оҕолоругар таҥас-сап “үҥэн-сүктэн” көрдөһөн ылар буоларым. Профсоюз лиидэрин быһыытынан сүрдээҕин да үлэ ыыппыт эбиппин диэн астына ахтабын.

DSC 0025

DSC 0038

DSC 0048

Николай Николаевич Васильевы үбүлүөйдээх күҥҥүнэн “Ситим” медиа бөлөх уонна “Кыым” хаһыат ааҕааччыларын аатыттан истиҥник эҕэрдэлиибит! Мэдиссиинэ курдук чэпчэкитэ суох үлэлээх эйгэҕэ өссө үрдүк ситиһиилэри, чэгиэн доруобуйаны, дьолу баҕарабыт!

Саргылаана БАГЫНАНОВА.

  

           

Тарҕат:

Комментарии

Защитный код Обновить