Арассыыйа уонна Саха өрөспүүбүлүкэтин народнай артыыһа Семен Оконешников уһун ыарыы кэнниттэн олохтон туораата.
Семен Оконешников 1944 сыллаахха атырдьах ыйын 29 күнүгэр Нам улууһун Бөтүҥ нэһилиэгэр күн сирин көрбүтэ. 1962 сыллаахтан айар үлэтэ саҕаламмыта. Ол курдук, музыкальнай-драматическай тыйаатыр уонна араадьыйа кэмитиэтин хоругар үлэлээбитэ. Дьокуускайдааҕы музыкальнай училищаҕа үөрэммитэ. Сулууспалыыр кэмигэр Забайкальскай байыаннай уокурук ырыа уонна үҥкүү Кыһыл знамялаах ансаамбылыгар солистаабыта.
1975 сыллаахха Ураллааҕы судаарыстыбаннай консерваторияны бүтэрэн баран, Дьокуускайдааҕы музыкальнай тыйаатырга опера солиһынан үлэлээбитэ. 1991 сыллаахтан Опера уонна балет тыйаатырыгар солистаабыта.
Семен Оконешников ордук биллэр оруолларынан буолаллар: Чайковскай “Евгений Онегин” оператыгар Ленскэй, Даргомыжскай “Русалка” оператыгар кинээс, Моцарт “Волшебной флейте” оператыгар Жрец, Верди “Травиата” оператыгар Альфред уо.д.а.
Өрөспүүбүлүкэ оройуоннарынан үгүстүк гостуруоллаабытын иһин “Отличник культурного шефства над селом” диэн бэлиэнэн наҕараадаламмыта.
1980 сылларга “Эҥсиэли” диэн биллэр квартетка ыллаабыта. Семен Петрович бар дьонугар дириҥ кутурҕаммытын тиэрдэбит.
