Режиссер, норуоттар икки ардыларынааҕы киинэ бэстибээллэрин лауреата Ева Белова, уопсастыбанньык, волонтер Антон Васильев туһунан киинэ уста кэллэ.
“Антон туһунан алҕас билбитим. Билэр дьонум кини туһунан ыстатыйа сыылкатын ыыппыттара. Онтон ыла кини олоҕун, хайдах волонтер буолбутун туһунан интэриэһиргээбитим. Киинэ устарга олус интэриэһинэй дьоруой дии санаабытым”, – диэн Ева кэпсиир.
Кини РФ култуура министиэристибэтэ ыытар куоҥкуруһугар сайаапка ыыппыта биһирэнэн, бу ый 23 күнүгэр устааччытын кытта Дьокуускайга кэллилэр.
“Биһиги Антон ыарахан ыарыыттан хайдах волонтер буолбутун туһунан көрдөрүөхпүтүн баҕарабыт. Ону таһынан, тус олоҕун, уопсастыбаннай үлэтин эмиэ сырдатыахпыт”, – диэн режиссер кэпсиир.
Оттон сүрүн дьоруой Антон Васильев киинэҕэ уһулларга тута сөбүлэспит.
Ева Белова “Бункер-42. Капсула времени”, “Скорая небесная”, “Неизвестный Тургенев. Свет и тень”, “Содружество независимых”, “Где дремлют мамонты”, “Глаза города” уо.д.а. документальнай киинэлэри устубута. Кини Арассыыйа уонна норуоттар икки ардыларынааҕы таһымнаах киинэ бэстибээллэригэр хаста да кыттан лауреат буолбута.
