Киирии

Киирии

От ыйын 1 күнүгэр Ньурба улууһугар үлэ уонна тыыл бэтэрээнин, Хоро нэһилиэгин бочуоттаах олохтооҕун Николаева Мария Львовнаны 105 сааһынан эҕэрдэлээтилэр. Мария Львовна биэс оҕо ийэтэ, 34 сиэннээх, 4 хос сиэннээх. Бу туһунан СӨ үлэ министиэристибэтин пресс-сулууспата иһитиннэрэр.

Билигин Мария Львовна оҕолорун, сиэннэрин кытта төрөөбүт дойдутугар Хоро нэһилиэгин Сайылык диэн сэлиэнньэтигэр олорор. Эдэр сылдьан колхуоска ыанньыксытынан, оттон биэнсийэҕэ тахсыар диэри уһуйааҥҥа ньээҥкэнэн үлэлээбитэ. Хоро нэһилиэгин үгүс олохтооҕо оҕо саастарын олус күндүтүк саныыллар. Тоҕо диэтэххэ, уһуйааҥҥа Мария Львовна оҕолорго утуйуохтарын иннинэ араас остуоруйалары ааҕара, биһик ырыатын ыллыыра. Мария Львовна билигин да олус үчүгэйдик ыллыыр. Нэһилиэк иһинэн ыытыллар тэрээһиннэргэ көхтөөхтүк кыттар.

Ытык кырдьаҕаһы Хоро нэһилиэгин баһылыгын солбуйааччы Николай Николаев, нэһилиэнньэ социальнай көмүскэлин уонна үлэ Ньурбатааҕы салалтатын салайааччы Ирина Находкина эҕэрдэлээтилэр. Мария Львовнаҕа РФ бэрэсидьиэнин Владимир Путин, Ил Дархан Айсен Николаев, Ил Түмэн дьокутаата Владимир Прокопьев уонна улуус, нэһилиэк дьаһалталарын, нэһилиэнньэ социальнай көмүскэлин салалтатын ааттарыттан эҕэрдэ суруктары туттардылар.

News.Ykt.Ru

Тарҕат:

Комментарии

Защитный код Обновить