Майа ытык ыалын Аграфена Ивановна уонна Семен Васильевич Эверстовтары эйэ дэмнээхтик олорбуттара 55 сылынан эҕэрдэлээтилэр. Бүгүн, Арассыыйа үрдүнэн дьиэ кэргэн, таптал уонна бэриниилээх буолуу күнэ бэлиэтэнэр.
Майа ытык-мааны ыала Эверстовтар 3 уолу күн сиригэр көрдөрөн, киһи хара оҥортоон, билигин сиэннэригэр, хос сиэннэригэр үтүө холобур буолаллар. Олоххо барытыгар көхтөөх, сэргэх кэпсээннээх кэргэнниилэр өрөспүүбүлүкэҕэ ыытыллар викториналарга көтүппэккэ кытталлар. Кинилэр Аграфена Ивановна төрөөбүт дойдутугар Чурапчыга эмиэ ытыктанар ыал буолаллар. Ытык кырдьаҕастары Итэҕэл балаҕанын салайааччыта Анна Климентова аал уоту оттон арчылаата.
Майа дьокутааттарын бэрэссэдээтэлэ Павел Судико, Семен Васильевич өр сылларга үлэлээбит “Ленинскэй знамя” билиҥҥитэ “Эркээйи” хаһыат эрэдээктэрэ Алена Докторова, “Лесной” түөлбэ аатыттан Матрена Харитонова, хомсомуол доҕотторо итии-истиҥ эҕэрдэлэрин тиэртилэр. Семен Васильевичка “Майа дойдум барахсан” бэлиэни туттардылар. Хомсомуоллар ааттарыттан Евдокия Решетникова Хомсомуол үбүлүөйдээҕи бэлиэлэрин туттартаата.
55 сыл дьоллоохтук бииргэ олоруу кистэлэҥинэн бэйэ бэйэҕэ ытыктабыллаах сыһыан, чөл олох, оҕо туһугар ахсаабат кыһамньы буолар диэн этэллэр ытык кэргэнниилэр.
Виктория Белолюбская, ulus.media
