Бүгүн, балаҕан ыйын 10 күнүгэр, Усуйаана улууһугар от ыйыгар сураҕа суох сүппүт табаһыт Егор Кривошапкин көһүннэ. Бу туһунан Ulus.media “Заря Яны” хаһыакка сигэнэн биллэрэр.
Санатар буоллаха, от ыйыгар Кривошапкин ыстаадаттан улуус киинигэр кэлбитэ. От ыйын 11 күнүгэр Депутатскай бөһүөлэгин Арктика түөлбэтигэр баар дьиэттэн тахсан баран, сураҕа суох сүппүтэ.
Ууга тааһы бырахпыттыы сүтэн хаалбыт Егор Кривошапкины бастаан утаа кэллиэгэлэрэ, онтон полиция үлэһиттэрэ көрдөөбүттэрэ. Дьааҥыттан аймахтара анаан-минээн кэлбиттэрэ, көрдүүр үлэҕэ волонтердар кыттыспыттара.
Табаһыты ыстаада кыһыҥҥы тохтуур сириттэн биригэдьиир Будимр Никулин булбут. Кэпсииллэринэн, табаһыт бэйэтин түһэр сиригэр дылы сатыы хааман тиийбит.
“Кини мунан баран силиэбийэҕэ (кыстык сиргэ) тиийбит. Хата онно бородуукта хаһааһа баарын онон үссэнэн сылдьыбыт. Ити кэмҥэ Силээннээх туундаратыгар ойуур уота туран, ону соҕотоҕун умуруоран үүтээни уонна биригээдэ малын-салын быыһаабыт. Дьолго, киһибит тыыннаах, доруобуйата этэҥҥэ. Билигин кинини Депутатскайга кэтэһэн олороллор” , — диэн ыстатыйаҕа суруллар.
