Войти

Войти

Бүгүҥҥү ыалдьыппытын билиһиннэрэр улахан наадата да суох курдук. Кинини сахалыы саҥнаах, сахалыы тыллаах барыта билэр. Кини ырыаларын үгүс көлүөнэ саха дьоно истэн улааппыта, күн бүгүнүгэр диэри уоһуттан түһэрбэккэ ыллыы сылдьар.

Ол эрээри бүгүн биһиги Аркадий Алексеевы кытта кини тус айар үлэтиттэн, успуортан арыый тэйэн, олох-дьаһах, дьон-сэргэ, көрөөччү сыһыанын, дьылҕа, өлөр өлүү, таптал уонна дьол туһунан кэпсэттибит. Кини олох баарын тухары өй-сүрэх, санаа-толкуй мөккүөрэ буолбут үйэлээх өйдөбүллэр тула бэйэтин санаатын үллэһиннэ, бар дьонугар аман өһүн анаата. Онон ааҕыҥ, көрүҥ, сыта-тура сыаналааҥ.

Аркадий Михайлович Алексеев. 1937 сыллаахха ахсынньы 12 күнүгэр Мэҥэ Хаҥаласка төрөөбүтэ. Саха хомсомуолун бириэмийэтин лауреата, ССРС физическэй култууратын туйгуна, СӨ култууратын үтүөлээх үлэһитэ, СӨ норуодунай артыыһа, СӨ ускуустубатын үтүөлээх диэйэтэлэ, Мэҥэ Хаҥалас, Кэбээйи, Үөһээ Бүлүү, Амма улуустарын, Дьокуускай куорат бочуоттаах олохтооҕо, СӨ бочуоттаах олохтооҕо, Арассыыйа, Саха сирин Суруналыыстарын сойууһун чилиэнэ.

 

– Аркадий Михайлович, ыллаабытыҥ олох ырааттаҕа...

– Ырааттаҕа, бэйэбин өйдүөхпүттэн.

– Оччотооҕу, 1960-1980-с сс. уонна билиҥҥи култуура дьоно, интэлигиэнсийэтэ төһө уратылаахтарый?

– Саамай сүрүнэ маннык. Бу санаатахха, урут ырыабыт да аҕыйах эбит. Сүрүннээн, хаан-уруу баартыйабыт, холкуоспут, үлэ-хамнас дьонун туһунан патриоттуу ырыалары ыллыырбыт. Холобур, “Биригэдьиир Марыына”, “Былааһы – Сэбиэккэ”, “Хаан-уруу баартыйаҕа”, “Долгунча”, “Герой Попов туһунан ырыа”, о.д.а. Ону сэргэ арыт, була сатаан, нуучча ырыаларын тылбаастаан, сахатытан толорорбут.

Урукку артыыстар эт куоластарынан ыллыыр буоллахтарына, билиҥҥи дьон уратыта диэн – бары микрофоннаахтар. Онон билигин куоластаах да, куолаһа да суох киһи ыллыыр кэмэ кэлэн турар. Микрофон, бэл, киһи тыынарын, салгыны эҕирийэрин кытта тупсарар. Кэпсээн-хоһоон ырыалаах рэпердэр эҥин урут кыайан ыллаабаттара. Биһиги куоласпытын икки сүүстэн тахса киһилээх кулуупка истэр буолаллара. Байаанньыттаах эрэ.

– Оттон майгы-сигили, тутта-хапта сылдьыы чааһыгар туох уратылаахтарый?

– Урут репертуар, чахчы, мөлтөҕө. Ол эрээри ырыа барыта үчүгэй буолара. Санаарҕабыллаах, санаа түһүүлээх ырыа соччо ылламмата. Хомсомуол, пионер – барыта оннук. Сэбиэскэй дьон этибит. Ону сэргэ урут фольклор жанрдара бааллара – чабырҕах, олоҥхо... Холобур, мин Устин Нохсооробу, Гаврил Колесовы эт кулгаахпынан истибитим.

– Эдэр ырыаһыттар туохтара тиийбэт дии саныыгыный?

– Билигин бары-барыта баар. Ырыаһыт элбээтэ. Былыр аҕыйах буолара. Тоҕо диэтэххэ, куолаһа суох буоллаххына, кумаар дыыгыныырын курдук ыллаатаххына, ырыаһыт аатырбаккын.

Кэлин олохпут сайынна. Үөрэх-хаар дэлэйдэ. Таҥас-сап тубуста.

– Билиҥҥи оҕолору ордук саныыгын дуо артыыс быһыытынан?

– Тугу да ордук санаабаппын. Ханнык да кэмҥэ үлэһит киһи сатаан, булан олорор диэн өйдөбүллээхпин. Сүрэхтээх уонна үлэһит эрэ буолуохха наада. Мин билиҥҥи да олоххо төрөөбүтүм буоллар, син биир тугу эрэ булан дьарыктаныам этэ. Холобур, муусукабынан. Ол эрээри хайдах ырыалары айыам эбитэ буолла? Дьэ, ол – туһунан боппуруос.

Тас көрүҥ быһаарбат

– Аркадий Михайлович, туораттан көрдөххө, кыраҕа ымыттыа суох, кытаанах майгылаах киһи курдук көстөҕүн.

– Кырдьык, инньэ дииллэр.

– Ол эрээри таптал туһунан, арамаантыканы ыллыыгын. Уопсайынан, ырыаларыҥ хайдах үөскээн тахсалларый?

– Ол – дууһа иэйиитэ дэнэр. Оттон дууһа иэйиитин киһи тас көрүҥэ, дьүһүнэ быһаарбат. Үөрэнээччибин – Асколон Павловы – көрөбүн. Көрөн-истэн уол оҕото буоллаҕа. Биир кэм өрө дьигиһитэн олорор. Лэгэнтэй эмиэ. Ол эрээри ити олус уйан уолаттар. Уопсайынан, мин санаабар, айар үлэһит хайаан да уйан буолуохтаах. Ытыахха да, хомойуохха да сөп. Куруук Ньургун Боотур курдук туттан-хаптан ыллыы-туойа сылдьыбаккын. Олох табыллардаах-табыллыбаттаах буоллаҕа.

Мин тас дьүһүммүн көрөн “иэйиигэ чугаһа суох киһигин” диэччилэр. Кырдьык, майгыбынан олус сытыары-сымнаҕас киһи буолбатахпын. Ийэлээх аҕам оннук төрөттөхтөрө. Ол эрээри дьулуурдаахпын билэбин. Бэйэм бэйэбэр булгуруйбат сокуоннаахпын: сатаммат, кыайтарбат диэн суох. “Туохтан да иҥниэ суохтаахпын” диэн сыал-сорук туруорунан үлэлиибин. Бука, майгым оннугуттан буолуо.

ark

Уол үчүгэйдик ыллыыр

– Аркадий Михайлович, эн оччотооҕу саха ырыатыгар саҥа сүүрээни киллэрбит, этэргэ дылы, өрөбөлүүссүйэни оҥорбут киһигин. Эстрада, үҥкүү тэтимэ эн ырыаларгын кытта быһаччы ситимнээхтэр. Аан бастакы аныгылыы ырыаларгын дьон-сэргэ хайдах ылыммытай?

– “Уол үчүгэйдик ыллыыр” диэн оскуола саҕаттан хайгыыллара, куолаһым үчүгэй этэ. Мэлэдьиис да буолуом иннинэ ыллыыр-туойар этим буоллаҕа.

Уопсайынан, мин дьылҕабар Москубаҕа үөрэммитим элбэҕи быһаарбыта (1959-1963 сс. И.В. Сталин аатынан Ленин уордьаннаах Судаарыстыбаннай Киин физкультура института – “Кыым”). Онно үөрэнэ сылдьан, бастатан туран, дьону-сэргэни, ырыа хайдах сайдан эрэрин билбитим. Оччолорго Саха сиригэр эстрада диэн өйдөбүл өссө үөскүү илигэ. Оттон Москубаҕа поляктар, грузиннар, молдаваннар, дьоппуоннар, ол быыһыгар эмиэрикэлэр, о.д.а. норуот бэрэстэбиитэллэрэ “эстрада да эстрада” дэһэр кэмнэрэ этэ.

Оччолорго Горькай аатынан паарка олус улахан кэнсиэрдиир түһүлгэлээҕэ. Онно сылдьан ити этитэлээбит омуктарым кэнсиэрдэрин көрөрүм. Олортон ордук поляктары уонна чехословактары астынарым. Туох да сүрдээх дьон этилэр. Биир күн поляктары, чахчы, сөхпүтүм. Сыанаҕа букатын сампаан иһэ-иһэ ыллаан ньиргиппиттэрэ. Дьон таһыныы бөҕө. Эстрада аркыастыра, үҥкүү-битии, туттуу-хаптыы сүрдээх.

Ити саҕана өссө М.Магомаев, А.Бабаджанян, Л.Зыкина, К.Бельды, биллэрээччи Б.Бобров, арыый да кэлин П.Бюль-Бюль оглы аатыра сылдьаллара. Ырыаларын тэтимэ биһиэниттэн букатын атын этэ. Вальс, танго, о.д.а. Мин ол муусукатын, саамай сүрүнэ үҥкүү тэтимин, саха ырыатыгар киллэрэн көрдөххө хайдах буолуой диэн, үөрэхпин бүтэрэн дойдубар кэлэрбэр номнуо чопчу сыаллаах-соруктаах этим.

1963 с. Саха сиригэр кэлээт, тута ырыа суруйан киирэн барбытым, устудьуоннар, куорат тэрээһиннэригэр араас ырыаны (Москубаттан кэллэҕим) оонньуурум. Бэйэм да баҕалаах буоллаҕым.

– Оттон саастаах көрөөччү-истээччи хайдах ылыммытай?

– Куоракка буоллун, улуустарга буоллун – олус үчүгэйдик ылыммыттара. “Саха ырыатын уларытар”, “тосту-туора ыллыыр” диэбэтэхтэрэ. Ол – дьылҕам эбит. Баччаҕа кэлиэх быабар, барыта хайдах эрэ табыллан испитэ.

exo ykt ru 30680c

Көрөөччү майгыта

– Көрөөччү артыыска сыһыана, майгыта уларыйда дии саныыгын дуо?

– Билиҥҥи көрөөччү интэриэһэ уларыйда, элбээтэ. Холобур, эдэр дьон туспа интэриэстээх, саастаахтар – атын. Ырыа жанра да үгүс. Урукку, төрүт сахалыыттан саҕалаан рэпкэ, рокка, реггигэ тиийэ баар буолла.

Аны туран, барыта – харчы. Холобур, дьон кэнсиэргэ балачча харчыны төлөөн киирэр. Улахан, биллиилээх артыыстарбыт сыаналара да сүрдээх. Ол да сиэринэн, билиҥҥи көрөөччү кэнсиэргэ, артыыска ирдэбилэ үрдээтэ. Урукку курдук “сыгынньах” сыанаҕа тахсан ыллыырыҥ сатаммат. Сыана киэргэтиитэ, декорацията, уота-күөһэ, артыыс таҥаһа-саба – барыта улахан болҕомтоҕо ылыллар уонна кэнсиэр “сыаната” барыта ол түмүгүнэн, кини төһө силигин сиппитинэн, быһыллар буолла. Аҥаардас куолас үчүгэйинэн-кэрэтинэн буолбатах.

– Аркадий Михайлович, билигин даҕаны ыллыы-туойа сылдьаҕын. Оттон ыллыаххын баҕарбатах, “сөп буолуо, түксү” диэбит кэмнэрдээххин дуо?

– Суох, оннук кэмнэр кэлэ сылдьыбыттара диирим табыллыбат. Арай, “хаһан ыллаан бүтэрим буолла?”, “тохтоон хааларым дуу?” диэн толкуйдуурум.

– Хаһан инньэ дии санаабыккыный?

– Аан бастаан Уус Алдан Бороҕонугар успуорт хомондьуруопкатыгар сылдьан биир биллэр, улахан артыыһы көрөн баран, инньэ дии санаабытым. Киһим сыанаҕа тахсан турар, улахан холуочук. Дьон күлүү гыннаҕын, таһыннахтарын аайы түксүлүөҕүн билбэккэ, өссө эбии баран иһэр. Оннук туран, сорох дьон сөп буолуо дииллэрин истибэккэ, аҕыс ырыаны ыллаата. Онно олус хомойбутум уонна “кэбис, мин манныкка тиийбэтэхпинэ, эрдэтинэ киһилии тохтоотохпуна табыллыыһы” дии санаабыттааҕым.

Иккис түгэн. Опера уонна балет тыйаатырыгар Анастасия Лыткина бүтэһик кэнсиэригэр сылдьан баран, улаханнык хомойбутум. Туох да суох. Онно улахан ырыаһыт эстэн хаалбытын көрбүтүм уонна кэмигэр бүтүөххэ наада эбит дии санаабытым.  

Ол гынан баран, Эдьиий Марыына 87-гэр өлбүтэ. 86 сааһыгар диэри ыллыы сылдьыбыта. Мин киһини үтүктүбэппин эрээри, киһи дьон сэҥээрэрин тухары ыллыан баҕарар. Онон билигин кыра-кыралаан ыллыыбын.

Дьиҥэр, кэмэ кэлбитин дуу, арыый илигин дуу быйылгы кэнсиэр кэннэ көрүллүө буоллаҕа. Баҕар, дьон-сэргэ “Аркадий Михайлович, сөп буолуо” диэтэхтэринэ, манан бүтэн да хаалыам. Аҥаардас ааккынан-суолгунан эрэ тахсан ыллыы сылдьар табыллыбат буоллаҕа. Киһи бэйэтин билиниэхтээх. Онон доруобуйа уонна истээччи быһаарыахтара.

exo ykt ru 30681c

Хомойуох иһин, бааллара

– Эстрадаҕа, култуура эйгэтигэр илин-кэлин түсүһүү, бэрт былдьаһыы диэн урут да, билигин да баар. Эн онтон оҕустарбыт, тэмтэрийбит түгэннэрдээххин дуо?

– Суох. Мин өйүм-санаам атын, бэрт былдьаһыыттан куота сатыыбын. Миигин сэмэлии, намтата сатаан (кинилэри ааттаталыыр санаам суох) тыллаһааччылар, хомойуох иһин, бааллара. Ону билбэтэҕэ-көрбөтөҕө буоларым. Тоҕо диэтэххэ, кинилэри син биир кыайан көннөрбөккүн. Этэн да, аахсан да туһа суох. Ол – хаптайан биэрии дэммэт. Кинилэрдиин иэхсэн сэниэбин барыы сатаабаппын.

Бэрт былдьаһарга киһи сэниэтэ баранар. Холобур, кими эрэ бүдүрүтэ сатаан сэниэҕин барытын барыаҥ буоллаҕа. Онон мин онно кыһаммаппын.

Дьол, куттал, хайҕал

– Сахаҕа былыр-былыргыттан “ырыаһыт дьоло суох буолар” диэн өйдөбүл баар. Холобур, олоҥхоһут, тойуксут, ырыаһыт... Ону кытта сөбүлэһэҕин дуо?

– Эс, доҕоор. Ону кытта сөпсөспөппүн. Мин “киһи дьылҕата Үөһээ суруллан турар, ону Дьылҕа Хаан быһаарар, кини киһи хаһан төрүүрүн-өлөрүн ыйар-кэрдэр” дииллэрин кытта эмиэ сөбүлэспэппин. Киһи дьылҕатын киһи эрэ быһаарар. Киһи төрүөхтээх да, өлүөхтээх даҕаны. Хайдахтаах да улуу буоллун. Өлбөт киһи диэн суох. Ол иһин киһи олох сокуонун тутуһуохтаах. Онтон саамай сүрүнэ – киһиэхэ, дьоҥҥо куһаҕаны оҥорумуохха наада. Иккиһинэн, айылҕа сокуонун тутуһуохтаахпыт. Киһи айылҕаны кытта сатаан кэпсэтэр буолуохтаах.

– Аркадий Михайлович, оччоҕо киһи туохтан куттаныан сөбүй? Эн туохтан куттанаҕыный?

– Ол аата?

– Холобур, сааһырбыт киһи кыаммат буолуом, күн сарсын тыыным быстыа, өлүөм-сүтүөм диэн...

– Суох, куттаммаппын. Олоҕу ким сирбит үһүнүй? Олох диэн наадатын наада. Түөһэйбэккэ, оҕолору эрэйдээбэккэ кэмигэр барар – ол сөп. Мэлдьи инньэ дииллэр. Өлүүттэн куттанабын диэн хайдах күнү быһа титирэстии сылдьыахпыный? Кэмигэр кэлиэҕэ – барыахтааххын.

Арай, мин эдэрбиттэн саамай куттанарым – хайҕал. Онтон куттаныахха наада.

– Бай, тоҕо?

– Хайҕал диэн мүччүркэйэ бэрт, киһи төбөтүн эргитиэн сөп. Киһи кинини сөпкө өйдүөн наада. Оччоҕо эрэ ону кыайаҕын, уйаҕын.

Ону тэҥэ киһиэхэ аат-суол барыыта диэн баар. Ол эмиэ кутталлаах. Холобур, арай мин, Аркадий Алексеев, итирэн баран, таһырдьа охто сытар буолуум. Аатым-суолум алдьаннаҕа, киһи буолан бүттэҕим ол дии. Олоххо ситиспит ситиһииҥ барыта биир түгэҥҥэ сотуллар.

etu5Th11d k

Таптал уонна муза

– Аркадий Михайлович, оттон таптал диэн тугуй?

– Айылҕа бэлэҕэ. Кинини араастаан өйдүөххэ сөп. Киһи эрэ барыта тапталга түбэспэт. Ону эмиэ таба тутуоххун наада. Куоттардаххына, сыыһа өйдөбүл үөскүөн эмиэ сөп.

– Оттон эн тапталы туппутуҥ, тапталгар табыллыбытыҥ дуу?

– Тапталы харыстыахха наада. Мин кэргэммин Агния Абрамовнаны кытта 1961 сыллаахха холбоһон ыал буолбуппут. Кини – 20, мин 23 саастааҕым. 58-с сылбытын бииргэ олоробут.

– Эн курдук ырыаһыт, спортсмен уолу, бука, элбэх кыыс көрөрө, батыһара, сурук суруйара буолуо. Ол эрээри кэргэҥҥин хайдах, тугун иһин сөбүлээн, таптаан кэргэн ылбыккыный?

– Ким билэр, доҕоор. Киһиэхэ луоһун быһыытынан этэрим туох да суох. Ол эрээри кини өйдөөх, билиилээх-көрүүлээх уонна киһи киһитэ. Хайдахтаах да киһи, бастатан туран, Киһи буолуохтаах. Кини үчүгэй ийэ, үчүгэй хаһаайка, миигин өйдүүр-өйүүр. Билигин төһө да күн аайы уураспатахпыт-сылласпатахпыт-таптаспатахпыт иһин, саамай чугас киһим – кини – мин кэргэним. Миэхэ киниттэн ордук чугас киһим суох. Туох баар эрэйи-кыһалҕаны барытын кинилиин, кини баар буолан бииргэ туораабыппыт.

– Оттон таптал уонна муза диэн биир дуо?

– Эс, хайдах оннук буолуой? Өйдөбүлэ биир буоллаҕа.

– Холобур, улахан бэйиэттэр хоһооннорун хайа эрэ дьахтарга аныыллар, кими эрэ көрөн, таптаан баран дириҥ иэйиилээх айымньыны суруйаллар....

– Ээ, оннук баар буолуон сөп. Киһи буолан баран хараххын хатыыр дьахтарыҥ хайдах суох буолуой. Ол эрээри үчүгэйдик ырытан көрдөххө, биир даҕаны ырыам-хоһоонум чопчу дьахтарга анамматах эбит. Биир да суох. Баҕар, ырыа айбыт хоһооннорум ааптардара хоһооннорун кимиэхэ эрэ анаабыт буолуохтарын сөп. Мин ону билбэппин.

Анабыл ырыа диэн суос-соҕотох биир эрэ ырыалаахпын. Ол – Леонид Попов хоһоонугар суруллубут “Илиибин уунабын эйиэхэ” ырыа. Ону даҕаны доҕорум Валерий Ноевка анаабытым.

exo ykt ru 30681c

Киһи буолуохха наада

– Дьол диэн тугуй?

– Дьол диэн – түгэн. Ол – киһи олоҕор күннэтэ кэлбэт көстүү. Киһи олоҕун дьоло кыра-кыра дьоллоох түгэннэртэн таҥыллар. Оттон оннук көрдөххө, мин дьоллоох киһибин, дьоллоох олоҕу олордум. Бачча сааспар кэллим, кэмигэр ыал буолбутум, оҕоломмутум, дьиэлэммитим-уоттаммытым.

– Оттон олохпор саамай дьоллоох түгэним диэн тугу этиэҥ этэй?

– Туох да саарбаҕа суох оҕо сааспын этиэм этэ. Сайылыкка үөскээбит оҕо сааспын туохтааҕар да ордоробун. Сытыган диэн күөл үрдүгэр, эһэм олоҕор, олорбуппут. Онно икки эбэм, икки эһэм иккиэн бааллара. Дьиҥэр, киһи мээнэ олорбот алааһа. Суол кытыыта буолан, ийэм абааһы көрөрө. Быыкаа алаас этэ. Оо, үчүгэй да этэ, булда-алда. Кыыстыын-уоллуун бары бултууллара. Ол үтүө өйдөбүлү туохха да биэрбэппин, олус истиҥник, чугастык саныыбын.

– Билигин Сытыгаҥҥа туох эмэ баар дуо?

– Дьиэлэрин-ампаардарын 1955 сыллаахха барытын Майаҕа көһөрөн киллэрбиттэрэ. Билигин онно чөҥөчөктөр уонна дьаамалар эрэ бааллар. Дөлүһүөммүт уга сол курдук турар. Оонньообут мастарым эмиэ үүнэн тураллар.

– Аркадий Михайлович, оттон олоххо саамай күндү, сыаналаах туох эбитий?

– Олоххо, саамай сүрүнэ, Киһи буолуохха наада. Киһини киһи чочуйар эбит. Мин дьон ортотугар үөскээбиппин ордордум. Киэн тутта этээччибин, этэбин даҕаны – мин сахалар чочуйбут киһилэрэбин.

– Сыанаҕа өр тахсыбатаххына, көрөөччүнү суохтуугун дуо? Сорох артыыстар “ыалдьан барабыт, туохпут эрэ тиийбэт буолар” диэччилэр.

– Суох. Хайаан даҕаны ыллыахтаахпын диэн буолбатах.

– Кыайан ыллаабат, куолаһа суох киһи ырыаһыт буолуон сөп дуо?

– Суох. Киһини күүһүнэн ырыаһыт оҥорор табыллыбат. Ол – күүһүлээһин.

– Киһи мыыммат сааһыгар үктэнэн олороҕун. Олоҕуҥ уһаабытыгар туох көмөлөһөрө буолуой?

– Ким билэр, доҕоор. Дойдубун таптыырым буолуо. Билигин куруорка да, соҕуруу да сылдьыбаппын. Онно барар санаам да суох. Хата, айылҕаҕа сылдьабын, айылҕаны таптыыбын. Сахам сирим айылҕатын.

14482723 647563575416426 9063839848921563136 n

Олох сокуона

– Кэпсэтиибит түмүгэр бар дьоҥҥор тугу этиэҥ, тугу тиэрдиэҥ этэй?

– Эппитим курдук, төһө да сурукка суруллубатар, олох сокуоннарын тутуһуохха, дьону, киһини өйдүөххэ-өйүөххэ, дьонтон тэйимиэххэ, дьону сэнээмиэххэ, сэмэлээһини уйуохха, хайҕалтан сэрэниэххэ, киһини таптыыр буоллахха, итэҕэстэрин эмиэ таптыахха, солото суох, дьарыктаах буолуохха, таптыыр үлэҕин үлэлиэххэ, айыахха-тутуохха наада. Уустук, ыарахан кэм кэллэ диир табыллыбат, сатаммат. Инньэ дии олорбокко, ону туоруур, аһарынар суоллары тобулуохха наада.

Өссө биир этэрим диэн, биһиги баһылыкпытын быыбарга таллыбыт даҕаны (М.Е. Николаев, В.А. Штыров, Е.А. Борисов, А.С. Николаев, С.В. Авксентьева да буоллуннар), кинини өйүөхпүтүн наада. Биһиги кинини сөбүлээбэппититтэн дуу, өйөөбөтөҕүттэн дуу өрөспүүбүлүкэ атахтаныа-адаҕаланыа, нууччалыы эттэххэ, “страдайдыа” суохтаах. “Ону көмөлөспөтө”, “маны туттарбата” диэн бытархай өйдөбүл суох буолуохтаах, умнуллуохтаах. Түмсүүлээх буолуохтаахпыт. Оччоҕо сайдыахпыт, үлэ-хамнас таһаарыылаах буолуо.

– Аркадий Михайлович, кэпсээниҥ иһин махтал!

Даҕатан эттэххэ, Аркадий Алексеев ахсынньы 12 күнүгэр төрөөбүт күнүн бэлиэтиир. Ол күн Суорун Омоллоон аатынан Опера уонна балет тыйаатырыгар “Төрөөбүт күнүм ыллыыр...” диэн улахан кэнсиэр бырагырааматын бар дьон дьүүлүгэр таһаарар.

 

Альберт Капрынов.

Тарҕат:

Добавить комментарий