Дириҥник ытыктыыр, сүгүрүйэр киһибит Дора Кобякова-Эдьиий Дора, ахсынньы 3 күнүгэр олоҕун биир бэлиэ сааһын бэлиэтээтэ. Бу күн Опера уонна балет тыйаатырын киэҥ саалатыгар кини үтүө аатыгар сүгүрүйэ, истиҥ эҕэрдэ, махтал бастыҥ тылларын этэ ыраахтан-чугастан бар дьоно тоҕуоруһа муһунна.
Дора Иннокентьевна 1959 с. ахсынньы 3 күнүгэр Дьокуускай куоракка төрөөбүтэ. Аҕата Иннокентий Иннокентьевич Дьяконов Кэбээйи Тыайатыттан, ийэтэ Васильева-Дьяконова Мария Тимофеевна Үөһээ Бүлүү Кэнтигиттэн төрүттээхтэр. Доралаах бииргэ төрөөбүттэр 14-тэр эбит.
Кэбээйи бараммат баай хара тыатын, маардарын-сыһыыларын батан улааппыт кыыс олоххо ураты дьулуурдаах, атыттартан арыый атын айдарыылаах киһи буолан сиэн-хотон тахсыбыт. Айылҕата анаабыт талаанын сайыннаран, билигин кинини билбэт киһи Саха сиригэр суоҕа чахы.
Түгэнинэн туһанан, сахалыы мындыр өйдөөх, тобуллаҕас толкуйдаах, сайаҕас санаалаах, бар дьонун араҥаччыһыта Эдьиий Дораны олоҕун бэлиэ күнүнэн ис сүрэхпититтэн истиҥник эҕэрдэлиибит! Санаабытыҥ – сатана, туппутуҥ – туола, алҕаабытыҥ – аналын ситэ, арчылаабытыҥ саталана туруохтун. Олох оргуйар үөһүгэр бу курдук кэрэни кэрэхсии, саҥаны салгыы, бар дьоҥҥор дурда-хахха буола сырыт.
Чөл туруктаах, этэҥҥэ буол!
Мария Васильева хаартыскаҕа түһэриитигэр дьоро киэһэ бэлиэ түгэннэрин көрүҥ.
