Ил Дархан Айсен Николаев ааһан эрэр сылга хорсун быһыыны оҥорбут дьону ааттаата. Бу туһунан СӨ бырабыыталыстыбатын пресс-сулууспата иһитиннэрэр.
Ол курдук, билиҥҥи кэм дьоруойдарын билиһиннэрэр эбит буоллахха маннык:
– Арассыыйа Пуочтатын Кэбээйитээҕи салаатын начаалынньыга Афанасий Полятинскай уһук сытар нэһилиэктэргэ дьон суруктарын, баһыылкаларын тиэрдээри 350 км сатыы хаампыт.
– Бороҕон нэһилиэгэр ДьУоКХ силиэсэрэ Юрий Калининскай умайа турар дьиэттэн үс киһини быыһаабыт.
– Нерюнгритааҕы лиссиэй 11-с кылааһын үөрэнээччитэ Кирилл Бобарыкин уһуну-киэҥи толкуйдаабакка ыалдьыбыт киһиэхэ бастакы суһал көмөнү оҥорбут.
– Орто Халыма улууһугар “Полярные авиалинии” хампаанньа Ми-8 бөртөлүөтүн экипаһа: хамнадыыр Сергей Трибой, инструктар-пилот Семён Семёнов, борт-мэхээнньик Алексей Винокуров тоҥо сыспыт дьону быыһаабыттар.
– Мэдиссиинэ национальнай киинигэр кардиохирургтар Чингиз Степанов уонна Леонид Павлов, намыһах температура көмөтүнэн криотехнология ньыматынан сүрэххэ эпэрээссийэ оҥорон 12 киһини быыһаабыттар.