Дьыл дьыллыын алтыһар
Сулус сулуска саһар,
Быыһык кэм түбэһэн
Туох барыта иһийэн...
Хоту дойдум үгэһинэн
Кыһыҥҥы уутугар нуктуура,
Тымныы өссө тэбиэһирэн
Бурҕайа, бурҕачыта уһуутуура
Орто дойдуттан сүппүккүн
Күн сириттэн барбыккын,
Ким даҕаны эппэтэҕэ
Сурах даҕаны суоҕа...
Арай хойуут бассааптан
Тэҥсик сураҕы ааҕан,
Соҥуоран өөр олортум
Барбатах абабыттан хомойон
Тиһэх суолгар атаарбатах
Хом санаа аны ааспат,
Эн тускунан тыл эппэтэх
Аалар санаа сүппэт...
Эдэркээн даҕаны этибит
Олоҕу саҕалаан эрэрбит,
Күөх хонууга хаамсарбыт
Көҕүһэ хоһоон ааҕарбыт
Туҥуй сүрэх тэбиитэ
Бастакы таптал иэйиитэ,
Баара бөлөх хоһооннор
Атын туспа “долгуннар”
Курус санаа тууйар
Ону иһит куйаар,
Үгүс үйэ ааһыаҕа
Эн аатыҥ ааттаныаҕа
“Кут-сүр” чэчириэҕэ
Төрүттээбит үөрэҕиҥ тиллиэҕэ,
Атаҕар бигэтик туруоҕа
Саха саҥнаах саныаҕа
Ол буолуоҕа киһи дьоло –
Сирдээҕи сүппэт соло?
Ааспат хомолто кууһар...
Миэхэ бааргын Лааһар
Дьуур, ахсынньы 27 күнэ 2019 сыл.
