Хас биирдии кэрэ аҥаар куруук кыраһыабай сэбэрэлээх буолуон баҕарара саарбаҕа суох. Ол туһугар ким тугу билэринэн, сатыырынан араас ньымалары туһанабыт. Олортон сирэй тириитигэр аналлаах кириэмнэринэн соттуу биир сүрүн үгэспит диэххэ сөп. Аныгы үйэҕэ кэсмиэтикэ атыылыыр маҕаһыын хас хардыы аайы баар буолла. Киһи хараҕа халтарыйар элбэҕин, арааһын ааҕан сиппэккин. Аны омуктуу суруктаах-бичиктээх буолан, оннооҕор эдэр дьон мунаахсыйабыт.
Суруналыыс идэлээх Сунтаар кыыһа Антонина Дормидонтова, “Antuar” диэн сирэй тириитигэр аналлаах, бэс туораахтаах, кытыаннаах, сахалыы быһаарыылаах кэсмиэтикэни оҥорон таһаарбыт. Эдэр урбаанньыт туох да өйөбүлэ суох ыра санаа оҥосто сылдьыбыт идиэйэтин олоххо киллэрбит. Ол туһунан маннык кэпсиир.
Тоҕо чуолаан кэсмиэтикэ оҥорорго быһаарынныҥ?
– 2013 сылтан кэриэйэ кэсмиэтикэтин атыылыырынан дьарыктаммытым. Бу кэсмиэтикэ миэхэ эталон курдук. Ол саҕаттан кэсмиэтикэ оҥорор ыра санааланан, ону олоххо киллэрбиппиттэн олус үөрэбин. Сорох дьон “Хайа, наһаа түргэнник таҕыстыҥ дии” дииллэр. Дьиҥэ, хас да сылы быһа толкуйдаан, үөрэтэн баран таһаардым. Бэйэм даҕаны итэҕэйбэт курдукпун. “Antuar” диэн ааттаах, маннык логотиптаах буолуохтаах диэммин өйбөр оҥорон көрөр этим. Састаабыттан саҕалаан элбэх үлэ ыытылынна. Бу барыта биир күннээх буолбатаҕа чахчы. Логотибар ханнык өҥ барсарын талан, ону дьүөгэбэр уруһуйдатан, брендированнай фартуктары, футболкалары эҥин үлэһэн... Ити курдук кыра-кыралаан оҥоро сылдьыбытым. Ааспыт сылтан күүскэ ылсан туран үлэлээтим. Туох да өйөбүлэ суох барытын бэйэм оҥордум. Көмө көрдүүрбэр аккаастабыт дьоҥҥо махтанабын. “Хайдах гынан кинилэрэ суох бэйэм таһаарабын?” диэн кыһыйан-абаран туран үлэлээммин, сыл аҥаарын иһигэр олоххо киллэрдим. Ардыгар бэйэм-бэйэбиттэн сөҕөбүн. Сыалбын-сорукпун ситиһэн, ыра санаабын илиибэр тутан турарбыттан олус дьоллонобун. Биллэн турар, иннибэр өссө элбэх үлэ күүтэр. Ол туһугар туох баар күүспүн-уохпун ууран туран үлэлии-хамныы сылдьабын.
“Antuar” диэн ааты хайдах таллыҥ?
– Бэйэм ааппын уонна Уарова диэн кыыс эрдэҕинээҕи араспаанньабын холбоон “Antuar” диэн ааттаабытым.
Оттон састаабын туһунан кэпсээ эрэ.
– Эппитим курдук кэриэйэ кэсмиэтикэтин олус сөбүлүүбүн. Ол иһин онно олоҕуран оҥорбутум. Холобур, кэриэйэ кириэмнэригэр “аллантоин” диэн баар. Бу – тириини сымнатар. Ордук кураанах, сааһырбыт тириигэ аналлаах кириэмнэргэ баар буолааччы. Ону бэйэм кэсмиэтикэбэр эмиэ киллэрдим. Уопсайынан, “Antuar” сыттыын-сымардыын, төһө туһалааҕынан кэриэйэ кэсмиэтикэтин кытта биир кэккэҕэ турар таһымҥа тахсыан баҕарабын. Салгыы сайдан иһиэҕим диэн бигэ эрэллээхпин уонна сыаллаахпын-соруктаахпын. Ол курдук, бу сайынтан 100 % Саха сиригэр оҥоһуллар буолуохтаах.
Атын кэсмиэтикэлэртэн уратыта диэн тугуй?
– Бастатан туран, саха сиригэр оҥоһуллубут кэсмиэтикэ аата сахалыы буолуохтаах диэммин, “Кыайыы”, “Дьол”, “Таптал”, “Чэгиэн”, “Чэбдик”, “Харысхал”, “Чөл”, “Алгыс”, “Үтүө”, “Дэлэй”, “Истиҥ”, “Кэскил”, “Эрэл”, "Ситиһии" диэн ааттары биэрдим. Дойду таһымыгар тахсар түгэммэр, ааттарын олох уларытыам суоҕа. Тоҕо диэтэххэ, нуучча дойдутугар сахалыы ааттаах кэсмиэтикэ болҕомтону тардыа, аата кини уратыта буолуо дии саныыбын. Оннооҕор “Intercharm” диэн бүтүн Арассыыйатааҕы быыстапкаҕа “Вивьен Сабо” бөдөҥ маарка хаһаайката Наталья Ракоч, “Арассыыйа ырыынагар тахсар буоллаххытына, омук быһыытынан уратыгытын сүтэримэҥ” диэн эппитэ.
Оттон уратытын туһунан этэр буоллахха, “Кыайыы” диэн уу (гидролат) састаабыгар Сунтаарым бэһин сүмэтэ баар. Балтыларбын кытта бэс туорааҕын хомуйан, “хаһан собуокка тиийиэр диэри туһалаах элэмиэннэрин сүтэрэн кэбиһэрэ буолуо” диэн куттана-куттана ыыппыппыт. Оттон “Таптал” диэн кириэмҥэ эмиэ дойдум кытыана баар. Туттубут кыргыттар “Сыһыым сыта кэлэр дии” диэччилэр.
Инникитин олоччу бэйэбит үүнээйибитинэн оҥоһуллар буоллаҕа дии.
– Оннук. Саха сирин үүнээйитинэн бэйэбит оҥорор буолуохпут. Оччоҕо атын собуоттары наймыласпаппын. Атын дьонтон тутулуга суох буолуохпун баҕарабын. Бастаан “Эфир альфа” диэн гидролат уонна эфирнэй арыы оҥорор тэрили ылыам. Онтон булкуйар, куурдар, хатарар улахан тэрили ылыахпын баҕарабын. Сыаната биир хостоох кыбартыыра саҕа. Сунтаарга, Кутана нэһилиэгин аттыгар, Хадаҥҥа от хомуйарга анаан сир уларсаары сылдьабыт. Кэпсэтиитэ номнуо бара турар. Табылыннаҕына бэс ыйыттан от хомуйуутун саҕалыахпыт. Онон, барыта Саха сиригэр хомуллубут отунан оҥоһуллуохтаах. Дойдубут ото-маһа атын үүнээйилэргэ холоотоххо быдан туһалаахтар уонна көдьүүстээхтэр. Олору туһанан кэсмиэтикэ оҥорор тоҕо кыаллыа суоҕай? Холобур, Татарстаҥҥа, Казанҥа хас да собуот баар. Мин наада буоллаҕына Менделеев аатынан институкка химик-технолог идэтигэр үөрэнэргэ бэлэммин.
“Antuar” сүрүн сыалын-соругун туһунан билиһиннэр эрэ.
– Бастакынан, кэрэ аҥаардар бэйэлэригэр эрэллээх буолалларыгар көмөлөһөбүт. Ол аата киһи тас көрүҥэ, сэбэрэтэ тубустаҕына, ис дууһата, санаата эмиэ уларыйар. “Мин кыраһыабайбын, кэрэбин” диэн бэйэтин таптыыр буолар уонна бэйэтигэр эрэлэ күүһүрэр. Киһи быһыытынан сайдарга бастаан бэйэни таптыахха, убаастыахха наада.
Иккиһинэн, тыа сиригэр үлэ миэстэтин таһаарыы буолар. Этэн аһарбытым курдук инникитин барытын бэйэбит оҥорор буолабыт. Ол курдук оту хомуйууттан саҕалаан оҥорон таһаарыы барыта манна оҥоһуллуохтаах. Онон, чуолаан тыа сиригэр үлэ миэстэтэ тахсыаҕа. Сайыҥҥы кэмҥэ дьон эбии харчылаһаары үлэлиэхтэрэ этэ дии саныыбын. Тыа сиригэр олорор усулуобуйа тупсуон баҕарабын. Онон тыа сирин сайыннарар, үлэ миэстэтин таһаарар соруктаахпыт.
Билигин ханна оҥоһулларый?
– Пенза куоракка кэсмиэтикэ оҥорор собуот баар. Онно састаабын таҥан ыыппытым. Онон химик-технолог оҥорон бастакы кириэмнэри ыыппыта. Ону бэйэм туттан көрөн бараммын бигэргэппитим.
Арааһа төһө элбэҕий?
– Көннөрү тириигэ аналлаах “Чэгиэн” суунар күүгэн, “Таптал” кириэм, “Кыайыы” бэс сүмэтин уута, “Дэлэй” аллантоиннаах альгинат мааска, “Кэскил” гиалуроннаах сүмэһин баар. Сыалаах тириигэ – “Чөл” суунар күүгэн, “Ситиһии” кириэм, “Баай-дуол” розмарин сибэккитин уута, “Истиҥ” күөх туойдаах альгинат мааска, “Эрэл” гиалуроннаах сүмэһин. Оттон 35-тэн үөһээ саастаах кэрэ аҥаардарга “Чэбдик” суунар күүгэн, “Саргы” кириэм, “Алгыс” сытыган эрбэһин сибэккитин уута, “Үтүө” каолиннаах альгинат мааска, “Тускул” гиалуроннаах сүмэһин уонна кыһыҥҥы кэмҥэ сымнатар “Махтал” кириэм, “Харысхал” суунар күүгэн, “Күүс” моргун сибэккитин уута, “Сарыал” спирулиннаах альгинат мааска уонна “Дьол” гиалуроннаах сүмэһин баар.
Тыйыс усулуобуйаҕа олорор саха дьахтарын тириитигэр тугу сүбэлиэҥ этэй?
– Биһиги тириибит ордук куурар-хатар, билимтиэ (чувствительнай) уонна булкаас (комбинированнай) буолар. Ол килиимэттэн, аспытыттан, ууттан тутулуктаах. Ону таһынан, гормон эмиэ оруоллаах буолуон сөп. Кэрэ аҥаардар бастаан сирэйдэрин тириитин тиибин быһааран баран, онно сөптөөх кэсмиэтикэни туттуохтаахтар. Үгүстэр ону улахаҥҥа уурбаттар уонна аҥаардас рекламаны итэҕэйэн атыылаһаллар. Мин билигин бэйэм эрэ кэсмиэтикэбинэн туттабын. Кэлиҥҥи кэмҥэ олох кырааскаламмат буоллум. Кэсмиэтикэм “сирэйэ” буоларбын өйдүүбүн. Дьон бастаан миигин көрөр буоллаҕа дии.
Улаатан эрэр оҕолор наһаа хатаалланаллар. Онтон сылтаан бэйэлэригэр эрэлэ суох, симик буолаллар. Кинилэргэ тугу сүбэлиэҥ этэй?
– Улаатан эрэр оҕолорго хатаал тахсара гормон кэһиллиититтэн буолуон сөп. Сыалаах тириигэ аналлаах “Чөл”, “Ситиһии”, “Баай-дуол”, “Истиҥ”, “Эрэл” туттан көрөллөрүгэр сүбэлиибин. Ону таһынан, гигиенаны тутуһуохтарын наада.
Сыаналара төһөнүй? Ханна атыыланалларый?
– Дьокуускайга офиспытыгар уонна antuarcosmetics.com диэн саайпыт нөҥүө атыыланар. Ону таһынан, Үөһээ Бүлүүгэ, Сунтаарга бэйэтигэр, Кутанаҕа, Намҥа, Аммаҕа, Бүлүүгэ атыыланар. Сирэй суунар күүгэн 399 солк., кириэм 499 солк., уу 299 солк., мааска 499 солк. уонна гиалуроннаах сүмэһин 599 солк.
Хас үлэһиттээххиний?
– Билигин бэһиэбит. Биир маркетолог кыыспыт Москубаҕа олорор.
Эн курдук саҕалааччы урбаанньыттарга тугу сүбэлиэҥ этэй?
– Нууччалыы эттэххэ “я фанат своего дела”. Ол курдук киһи дьарыгын ис сүрэҕиттэн сөбүлүүр буолуохтаах. Туохтан да толлубакка үлэлээтэххэ, санаа хоту барыта табыллан иһэр. Бэйэҕитигэр эрэллээх буолуҥ.
Антонина, интэриэһинэй кэпсээниҥ иһин махтанабын. Кэскиллээх үлэҕэр үүнүүнү, сайдыыны баҕарабын.
Венера Охлопкова, Кыым.ру
