Эн @ananaaaaass диэни билэҕин? Саҥа истэр буоллаххына, бастаан Инстаграмҥа киирэн, итинник ааттаах страницаны булан, кини көрдөөх вайннарын көрөргөр сүбэлиибит. Дьэ, ол кэнниттэн биирдэ бу матырыйаалы ааҕаар.
Хайа, көрдүҥ? Сөбүлээтиҥ? Кимин-тугун билиэххин баҕардыҥ? Дьэ, оччоҕо бу сытыы-хотуу кыыс бэйэтин билиһиннэрэн суруйбутун аах.
“Аатым Настя Дьяконова диэн. 2005 сыл бэс ыйын 12 күнүгэр Анна уонна Николай Дьяконовтарга бастакы оҕонон төрөөбүтүм. Күн сирин Дьокуускайга көрбүтүм. Билигин Чурапчыга олоробун, С.К. Макаров аатынан улуустааҕы гимназия VIII кылааһыгар үөрэнэбин. Үөрэхпэр үчүгэйбин. Физкультура уонна нуучча литературатын уруоктарын сөбүлүүбүн. “Дайыы” үҥкүү ансаамбылыгар дьарыктанабын.
Видеоролик устан, бастакы холонуум II кылааска этэ. Бииргэ үөрэнэр дьүөгэбин кытта аһылык бэлэмниирбитин ютуб ханаалыгар укпуппуппут. Онно барахсаттары үөхпүттэр аҕай этэ. Кыра буоламмын, хомойон ытаабытым уонна хаһан да тугу да устуо суох буолбутум... Ол эрээри бу үөрэх дьылын күһүнүгэр, ол андаҕайбыт күммүттэн оруобуна 5 сыл ааспытын кэннэ, дьээбэҕэ “Ожидание & реальность” диэн вайн устан таһаарбытым. Ону доҕотторум олус сэргээбиттэрэ. Онтон үөрэн, аны сөбүлүүр дьарыкпынан үлүһүйэн барбытым.
Вайннарым сюжетын күннээҕи олохтон ылабын. Ийэ уонна оҕо, учуутал уонна үөрэнээччи сыһыаннарын көрүдьүөстээн көрдөрөбүн. Оруолларга барытыгар бэйэм оонньуубун, дьиэбэр устабын. Ону биирдэ киэҥник биллэр @bala5an_off бэйэтин паблигар, @chrksh_chksh сториһыгар таһаарбыттар этэ. Дьэ, ол күнтэн ыла сурутааччым ахсаана элбээн, көрөөччүм үксээн барбыта. Билигин 29 тыһыынча буолан эрэр. Онтон наһаа үөрэбин уонна өссө үчүгэй вайннары айарга дьулуһабын.
Сорохтор: “Сурутааччыҥ элбээбит, босхо суши, пицца сиир буолбуккун”, -- дииллэр. Дьиҥэр, биирдэ эмэ оннук гыныахха сөп буолуо. Ол эрээри мин сурутааччыларым – бэйэм курдук оҕолор. Кинилэргэ туһалаах, сөптөөх эрэ рекламалары таһаарар оруннаах дии саныыбын. Холобура, кинигэ, үөрэх, куруһуок туһунан. Уонна бу диэн эттэххэ, наһаа элбэх рекламаны таһаарар блогердартан дьон сылайар, тэйэр. Вайн устарга миэхэ ким да өй укпатаҕа, күһэйбэтэҕэ. Сөбүлээн, баҕаран туран дьарыктанабын. Бэйэбин блогер курдук санаммаппын.
Билигин Интэриниэт ситимигэр наһаа элбэх куһаҕаны суруйаллар. Тэлэбиисэргэ эмиэ наар ыарыыны, кыаллыбаты, табыллыбаты, өлөрсүүнү, уорууну, о.д.а. көрдөрөллөр. Ити “негатив” барыта саҥа улаатан эрэр кэнчээри ыччат өйүгэр-санаатыгар куһаҕаннык дьайыан сөп. Ол иһин оҕолору, улахан дьону оннук курус эйгэттэн аралдьытан ылаары, санааларын көтөҕөөрү, үөрдээри, урукку “Ералаш” киинэлэр курдук роликтары устабын. Мин олоххо тутуһар тосхолум – “Больше позитива, меньше негатива» диэн.
Биллэн турар, 29 тыһыынча кэриҥэ сурутааччым иһигэр үөҕээччилэр да бааллар. Оннук хейтердэргэ кыһаллыбат буола сатыыбын. Инстаграмҥа көрөн, оҕолор уулуссаҕа билэр буолбуттар. Бииргэ хаартыскаҕа түһэллэр. Бастаан кыбыстар этим, билигин үөрэнним. Оҕолорго этиэм этэ, бэйэҕит сөбүлүүр дьарыккытынан үлүһүйүҥ диэн – ол баҕа санаа туолуутугар хайаан да тиэрдэр эбит”.
Бэлэмнээтэ Анисия Иевлева
