Войти

Войти

«Google» хампаанньа «Play Market» маҕаһыыныгар Бэрдьигэстээх олохтооҕо Саргылана Петрова “Тылла таай” диэн бэйэтэ айан таһаарбыт оонньуута таҕыста.

Саргылана Петрова идэтинэн фармацевт, Бэрдьигэстээх 39 №-дээх аптекатыгар үлэлээбитэ. Билигин Дьокуускай куоракка олорор.

Саргылаана, үтүө күнүнэн! Тылы сайыннарар, ийэ тылбыт саппааһын байытар, олус интэриэһинэй, ураты умсугутуулаах таайбараҥ оонньууну толкуйдаабыккын. Оонньууну хайдах оҥорбутуҥ туһунан кэпсиэҥ дуо?
–Бастаан биллэриинэн “WorldSkills” (квалификацияны үрдэтэр, эбии үөрэхтээһини сайыннарар соруктаах норуоттар икки ардыларынааҕы некоммерческай ассоциация) бырайыагынан Дьокуускай куоракка сааһыттан тутулуга суох пенсионердары үөрэтэбит диэн биллэриини көрөн суруттарбытым. Сотору буолаат, үөрэнэ ыҥырбыттара. Ким да суоҕа буолуо диэн тиийбитим төрдүө эбиппит. Аҕам саастаах дьону интернет нөҥүө үлэлииргэ, араас бырагыраамалары туһанарга, сайт арыйарга о.д.а. үөрэтэллэр. Нэдиэлэ курдук үөрэнэн истэхпитинэ коронавирус дьаҥа тарҕанан үөрэхпит тохтоон, билигин кэтэхтэн “ютуб” ханаалтан сорудах ылан үөрэнэбит.
Бэриллибит сорудахтары толороору куйаар ситимигэр киирэн ону-маны көрө олорон “продвинутый курс” диэн үөрэх бырагырааматын булан, 600 солк. атыыласпытым. Манна үөрэнэн баран, сахалыы тыллары таайар оонньууну оҥоруохха сөп эбит диэн санаа киирбитэ. Сахалыы биктэриинэ толкуйдаан онньуубун “Тылла таай” диэн ааттаатым. Оонньуу 30 кэрдиистээх. Разработчиктар консолларыгар Gooqle play console диэҥҥэ регитрацияланан 25 $ төлөөн баран, төһө баҕар сыһыарыыны угуохха сөп. Оонньуубун укпутум кэннэ нэдиэлэни быһа бэрэбиэркэлээн баран аккаастаабыттара. Сахалыы тыла элбэх буолан, үчүгэйдик өйдөөбөтөхтөр этэ. Быһаарыытын нууччалыы тылбаастаан ыыппытым кэннэ тута көҥүллээн «Google Play» сыһыарыыга таһаардылар.

WhatsApp Image 2020 04 27 at 09.17.41 1

–Оонньууну дьон-сэргэ хайдах ылынна?

Бастаан бииргэ үлэлии сылдьыбыт дьүөгэлэрбэр ыыппытым. Оонньоон көрөн баран тута сэргээбиттэрэ, сөбүлээбиттэрэ. Оонньоон көрбүт дьон 30 кэрдииһи барытын таайбыттар, онон билигин сорудаҕын элбэтээри ону толкуйдуу сылдьабын. Күнү быһа төбөбөр сахалыы тыллары толкуйдуубун. Эдэр дьон бытааннык таайаллар эбит, уолум билигин да бүтэрэ илик, 12 кэрдиискэ сылдьар. Оонньуум табыллыбытыттан сүргэм көтөҕүллэн салгыы таабырыннары, биктэриинэлэри оҥоро сылдьабын. Манна III кылааска үөрэнэр сиэним хартыыналары оҥорууга сүбэ-ама биэрэн көмөлөһөр.

Саргылана, кэпсээниҥ иһин улахан махтал. Төрөөбүт сахаҥ тылын сайыннаран, оонньуу толкуйдаан киэҥ эйгэҕэ таһаарбытыҥ улахан суолталаах, кэскиллээх дьыала.

Кэнники сылларга төрөөбүт тылбыт туттуллар эйгэтэ кыараан, тыл толору кыаҕа туһаныллыбат буолла. Ханнык баҕарар оонньуу иитэр-үөрэтэр ис хоһоонноох буолар. Билиҥҥи сайдыылаах кэмҥэ оҕо телевизор, компьютер, интернет нөҥүө билиини-көрүүнү ылар бириэмэтэ. Онуоха, Саргылана толкуйдаабыт оонньуута киэҥ эйгэҕэ тахсан, сахабыт тыла биһиги омукпут бэлиэтэ, уратыта буоларын көрдөрдө. Оонньуу нөҥүө ийэ тылбыт саппааһын байытан, аныгы кэм ыччата сахалыы ыраастык саҥарарыгар төһүү күүс буолан, дьон-сэргэ сөбүлээн оонньуур оонньуута буолуо диэн эрэнэбит. Саҥа айыллыбыт сахалыы өй оонньуулара толкуйдата, сайыннара киэҥ эйгэҕэ көччүйэ көттүннэр.

WhatsApp Image 2020 04 27 at 09.17.40 1

Google Play`сыһыарыыга киирдэххэ бу курдук суруллубут.
Для приложения, слова надо угадать на якутском языке. Приложение создано для людей знающих якутский язык. Угадайте слова на якутском языке. Якутский язык является родным языком народа саха. В современном мире родные языки малочисленных народов мира находятся на грани исчезновения. Наше приложение будет якутским контентом в области IT технологий. Желаем приятного времяпровождения с нашим приложением.
Оонньууга бу ссылканан киир.
http://play.google.com/store/apps/details?id=com.tyworldquiez.tyllataai

Ыстатыйа тахсаары турдаҕына Саргылана эрийэн “Өссө биир оонньуубун көҥүллээн таһаардылар” диэн үөрүүлээх сонуну иһитиннэрдэ. “Ойууну таай” диэн өссө биир оонньуу күн сирин көрдө. https://quickappninja.com/z8y9k/

Аэлита Андреева, ulus.media/

Тарҕат:

Добавить комментарий

Бүтэһик сонуннар