Войти

Войти

Үбүлүөйдээх Кыайыы күнүгэр 95 караттаах саха алмааһыгар Сэбиэскэй Сойуус Дьоруойа Владимир Лонгинов аата иҥэриллибитин туһунан СӨ Ил Дархана Айсен Николаев иһитиннэрии оҥордо.

Владимир Лонгинов 1919 сыллаахха Горнай  улууһун  Бэс Күөлүгэр төрөөбүтэ, Уус Алдан улууһун Тандатыгар улааппыта. Сэрии иннинэ  Томпо сэлиэнньэтигэр үп үлэһитэ этэ.  1941 сыллаахха Дьокуускайдааҕы байыаҥкамаат ыҥырыытынан  аармыйаҕа барбыта. 
Владимир Лонгинов Воронежскай фронт 47-с  аармыйатын 722-с ытыы  полкатын, 206 ытыы дивизиятын пулеметнай расчетун хамандыыра этэ. Украина Воронеж куоратын босхолооһуҥҥа кыттыбыта.
Владимир Лонгиновка Сэбиэскэй Сойуус Дьоруойа аат 1943 сыллаахха алтынньы 25 күнүгэр иҥэриллибитэ. Ленин уордьанынан наҕараадаламмыта. 1943 сыллаахха өстөөҕү кытары сэриигэ сэтинньи 18 күнүгэр дьоруойдуу охтубута. Черкасскай уобалас Каневскай оройуонун Пшеничники сэлиэнньэҕэ бырааттыы көмүүгэ В.Д. Лонгиновка пааматынньык туруоруллубута.
Кини аатынан Уус Алдан улууһун Бороҕон сэлиэнньэтигэр уонна Танда бөһүөлэгэр уулуссалар ааттаммыттара, пааматынньыктар туруоруллубуттара, Бээрийэ оскуолатыгар мемориальнай дуоска ыйаммыта. 2005 сыллаахха ыам ыйын 5 күнүгэр бэрэсидьиэн В.А. Штыров, В.Д. Лонгинов аатын Бэс Күөлүн орто оскуолатыгар иҥэрбитэ.  Маны сэргэ Дьокуускай куорат биир уулуссата Владимир Лонгинов аатын сүгэр. Бүгүҥҥү өрөгөйдөөх, үбүлүөйдээх Улуу Кыайыы 75 сылын бэлиэтиир күммүтүгэр “Алроса” хампаанньа уонна СӨ Ил Дархана Айсен Николаев, өрөспүүбүлүкэ салалтата биир дойдулаахпыт Владимир Лонгинов аатын үйэтитэр бырайыактара, биһиэхэ  уус алдаттарга ураты суолталаах!

Тарҕат:

Добавить комментарий