Киирии

Киирии

Күн-дьыл ахсым ат атара айанынан сиэллэрэр. Ол да иһин, былыргы кырдьаҕастар киһи олоҕун түннүгүнэн чыычаах көтөн ааһар” тэттик кэмигэр холуур буоллахтара.

Санаабар, соторутааҕыта эрэ оскуола боруогун аан бастаан атыллыыр долгутуулаах балаҕан ыйым 1-кы күнэ буола турарга дылыта. Оттон бүгүн орто оскуоланы бүтэрэн, олох киэҥ суолугар үктэммиппит номнуо отут сыла ааһа охсубут!

Бастакы кылааска 41 буолан үөрэххэ киирбиппит. Бастакы учууталбыт Ульяна Ипатьевна Акимова барахсан хайдах тииһинэн-түгэнэн, барыбытыгар “а” буукубаттан саҕалаан, ааҕарга-суруйарга үөрэппитин, ахсааны баһылаппытын, алын сүһүөх кылааһы этэҥҥэ түмүктэппитин санаан, киһи сөрү диэн сөҕөр, үөрэр, долгуйар. Үһүс кылаас кэнниттэн икки аҥы оскуолаҕа арахсыбыппыт. Анарааларбыт (кэлин улахан оскуолаҕа киирэрбитигэр “а” диэн буолтара) – Екатерина Григорьевна Поповаҕа, биһиги “б”-лар – Элгээйи аҕыс кылаастаах оскуолатыгар Нина Васильевна Николаеваҕа түбэһэр дьолломмуппут. Анаабыт курдук, иккиэн нуучча тылын уонна литэрэтиирэтин учууталлара этэ. Ол кэнниттэн “б”-лар классрукпут сотору-сотору уларыйан, салайан ааспыттара: матымаатык Гаврил Николаевич Иванов, устуоруктар – Альбина Григорьевна Иванова, Анатолий Афанасьевич Артемьев.

odnokl

Ахсыс кылаас кэнниттэн урукку бииргэ ааҕа-үөрэммит оҕолорбутун кытта биир оскуолаҕа үөрэнэр буолбуппут. Классводпут география учуутала Надежда Митрофановна Никифорова буолбута. Оччолорго биологияны дириҥэтэн үөрэтэр оскуола буола сайдан, биһигини таһынан өссө химия учуутала Татьяна Иннокентьевна Кириллина салайааччылаах “в” кылаас баар буолбута. Онно өрөспүүбүлүкэ араас муннуктарыттан кэлбит оҕолор киирбиттэрэ. Инньэ гынан оскуоланы бүтэрэрбитигэр балай эмэ элбэх – 70-тан тахса буолан бүтэрбиппит.

Күн бүгүн сорохторбут учуутал идэтин баһылаан үлэлии-хамсыы, айа-тута сылдьаллар. Сорохпут үөрэммит оскуолабытыгар үлэлиир. Хайа да улууска тиий – бииргэ үөрэнэ сылдьыбыттарбытын көрсөрбүт – баар суол. Бары сөбүлүүр идэбитин баһылаан, ыал-күүс буолан, оҕолонон-урууланан, сорохторбут бэлиэр хастыы да сиэннэнэн, оччотооҕу мэник-тэник оҕолор кэскилбит кэҥиир. Бэйэбит сыыйа түспэтийэбит.

uchitelya

Арай оскуоланы бүтэрбит үбүлүөйдээх сылбыт үүннэҕинэ, тутуу баттаһа күннээҕи түбүктэн тэйэн “орой-мэник” оҕо буолан, мэниктээн, кэрэ кэммитин санатыһан ыларбытын олус күндүтүк саныыбыт.

Ол быһыытынан бу эҥээрдэр соторутааҕыта – Атласовтар уһаайбаларыгар, дойдубутугар олохсуйбуттар – “Тещин языкка” көрсөн аастыбыт.

odnoklElg

Тэрийэн-бэрийэн ыыппыт үөлээннээхтэрбитигэр (сотору итинник да дэһэр буолуохпут турдаҕа) уонна оҕобутугар Петяҕа, ырыаһыт Игорь Егоровка тэрээһиммитин киэргэтэн барбыккытыгар улаханнык махтанабыт! Бары тутуспутунан сылдьан, күлэ-үөрэ күүтэр күрэҥсийбит баттахтаах кырдьар сааспытын этэҥҥэ уонна дьоллоохтук көрсөр гына, бэйэ-бэйэҕэ көмөлөсүһэ, бэйэни харыстана сылдьыаҕыҥ диэн, баҕа санаабын тиэрдэбит.

Куорат 88-тара

Тарҕат:

Ырытыыгын суруй

Защитный код
Обновить

Бүтэһик сонуннар